استانادا ادام باسىپ ولتىرگەن شەنەۋنىكتىڭ ۇلى كۇدىكتىدەن كۋاگەرگە اينالىپ شىعا كەلدى
«مەملەكەتتىك ساراپتاما» مەكەمەسى باسشىسىنىڭ ورىنباسارى بەرىك نۇرمانبەتوۆكە تيەسىلى جيپ 20 جاستاعى جىگىتتى قاعىپ مەرت قىلعان. اپات بولعاندا كولىكتە شەنەۋنىكتىڭ ۇلى ەكى دوسىمەن وتىرىپتى. ءبىر قىزىعى كولىك يەسىنىڭ بالاسى كىنالى ەمەس، كۋاگەر رەتىندە قاتىسۋدا.
پروتسەسكە مارقۇم ۇلاننىڭ ايەلى مەن اتا-اناسى دا كەلدى. جول اپاتى ءبىر جارىم جىل بۇرىن بولعان. قالا ىشىندە جوعارى جىلدامدىقپەن كەلە جاتقان جيپ جاياۋ جۇرگىنشىلەر وتەتىن جەردە 20 جاستاعى ۇلان بايجۇمانوۆتى قاعىپ، مەرت قىلادى. سول «لەكسۋس» استاناداعى «مەملەكەتتىك ساراپتاما» مەكەمەسى باسشىسىنىڭ ورىنباسارى بەرىك نۇرمانبەتوۆكە تيەسىلى ەكەن.
كولىكتە ۇلى نۇردوس نۇرمانبەتوۆ پەن ونىڭ ەكى دوسى وتىرعان. ءبىر قىزىعى قىلمىستىق ءىس شەنەۋنىكتىڭ بالاسىنا ەمەس، قاسىنداعى دياس كيۆەنوۆكە قاتىستى قوزعالىپتى. ۇلاننىڭ اتا-اناسى تەرگەۋشىلەردىڭ مۇنىسىنا كۇمانمەن قاراپ وتىر.
«رولدە كيۆەنوۆ ەمەس، نۇردوستىڭ ءوزى وتىرعان. ويتكەنى، اپاتتىڭ ەرتەڭىنە شەنەۋنىك اكەسى «استانادان 1 بولمەلى پاتەر بەرەيىن» دەگەن ۇسىنىس جاسادى. ءبىز باس تارتتىق»، - دەيدى مارقۇم ۇلان بايجۇمانوۆتىڭ اناسى كلارا قاماروۆا.
ءسويتىپ، كيۆەنوۆكە قاتىستى ءىس ەكى جىلعا جۋىق تەرگەلىپ، ەندى عانا سوتقا جەتتى. تەرگەۋشىلەر ونى «قۇرامىندا قىلمىستىق ارەكەت جوق» دەپ 5 رەت توقتاتقان. تەك ەلباسىنىڭ ارالاسۋىنان كەيىن قىلمىستىق ءىس قايتا اشىلدى دەيدى مارقۇمنىڭ اناسى.
«سوت وتىرىسىنىڭ پروتوكولىندا مەنىڭ سوزدەرىمدى بۇرمالاپ جازعان. سوندىقتان سوتقا دا سەنبەي وتىرمىز. قۇجاتتاردا ۇلانعا قاتىستى قىلمىستىق ءىس ونىڭ ولىمىنەن جارتى جىل بۇرىن، ياعني 16- قاڭتاردا قوزعالدى دەپ تۇر. ول ازداي تەرگەۋشىلەر كۇدىكتى رەتىندە مارقۇم ۇلىم ۇلان بايجۇمانوۆتىڭ ءوزىن تىركەپ قويعان»، - دەيدى مارقۇم ۇلان بايجۇمانوۆتىڭ اناسى كلارا قاماروۆا.
وسىلايشا تەرگەۋشىلەر مەن سوت ابدەن ابىگەرگە سالدى دەگەن جابىرلەنۋشى جاق ءىستى جۇرگىزىپ جۇرگەن سۋديادان باس تارتۋعا ارىز جازاتىندارىن جەتكىزدى.
ال، سوتقا كۋاگەر رەتىندە قاتىسىپ جۇرگەن نۇردوس نۇرمانبەتوۆتىڭ كولىگى اپاتقا العاش رەت ۇشىراپ وتىرعان جوق. شەنەۋنىكتىڭ ۇلى بۇعان دەيىن دە ءۇش بالانىڭ اناسىن جول بويىندا باسىپ كەتىپ، مەرت قىلعان. ول كەزدە قۇرىعى ۇزىن اكەسى مارقۇمنىڭ وتباسىنا اقشا بەرىپ قۇتىلعان ەكەن. ەگەر شەنەۋنىكتىڭ اتاقتى ادام قاققىش ۇلىن سول كەزدە كولىك جۇرگىزۋ قۇقىعىنان ايىرعاندا ۇلاننىڭ ءومىرى قىرشىنداي قيىلماس پا ەدى؟!
