قىتايدا قىزمەتتىك اۆتوكولىكتەر ءباسساۋداسى ءوتتى
قىتاي حالىق رەسپۋبليكاسىندا پاراقورلىقپەن كۇرەس كۇشەيىپ، شەنەۋنىكتەرگە جۇمسالاتىن شىعىن قىسقارتىلدى. ءتۇرلى دارەجەدەگى باسشىلار قىزمەتتىك كولىكتەرىنەن قاعىلىپ، قوعامدىق كولىكپەن جۇرۋگە مىندەتتەلدى. قىتايداعى شەنەۋنىكتەردىڭ باسىم بولىگى قىزمەتتىك كولىكتەرىنەن ايىرىلدى.
تەك بيىل مەملەكەتتىك مەكەمەلەردىڭ اۆتوپاركى 3200 اۆتوكولىككە ازايادى. بەيجىڭ بيلىگى ءتۇرلى دەڭگەيدەگى باسشىلاردىڭ ءجۇرىپ-تۇرۋىنا كەتەتىن بيۋجەت قارجىسىن شىعىنداماۋ ءۇشىن وسىنداي شەشىم قابىلدادى. ال جاياۋ قالعاندارى جۇمىسقا قوعامدىق كولىكپەن، ايتپەسە ۆەلوسيپەدتەن بارۋىنا دا بولادى.
ءباسساۋداعا الدىمەن 9 جىلدىق «فولكسۆاگەن» تىگىلدى. باستاپقى باعاسى 50 مىڭ يۋان، ياعني 8 مىڭ دوللار. ءاپ-ساتتە 10 مىڭ دوللارعا قاعىپ اكەتتى. مەملەكەتتىك قىزمەتشىلەر تەپكەن اۆتوكولىكتەردىڭ اۋكتسيونى 4 ساعاتقا سوزىلدى. 106 كولىك ساتىلدى. قىتاي قازىناسىنا 1 ميلليون دوللارعا جۋىق اقشا ءتۇستى.
بۇل - جالپى ءباسساۋدانىڭ باستاپقى باعاسىنان %70 عا ارتىق بولدى دەگەن ءسوز. تاياۋدا وسىنداي تاعى ءۇش اۋكتسيون ءوتىپ، 300 كولىكتى كوكتەم مەرەكەسىنە دەيىن ساتىپ جىبەرۋ جوسپارلانىپ وتىر. بۇل شارانى ورتالىق تارتىپتىك جانە تەكسەرۋ كوميسسياسى قاداعالايدى. باستاپقى باعانى تاۋەلسىز باعالاۋشىلار بەلگىلەيدى. قىتايدا مەملەكەتتىك مەكەمەلەردىڭ اۆتوپاركىندەگى كولىكتەردى ازايتۋ ماسەلەسى وسىدان 11 جىل بۇرىن تالقىعا تۇسە باستادى. ءبىراق شەنەۋنىكتەر بىلتىردان باستاپ قانا جەكە نە بولماسا قوعامدىق كولىكپەن جۇمىسقا بارۋعا مىندەتتەلدى.
ال اۋكتسيونعا قاتىسۋشىلار ءبىراز باسشىلاردىڭ جاياۋ قالعانى بىزگە جاقسى بولدى دەپ وتىر. قىتايدا ساتىلىمعا شىعارىلاتىن ءالى 2 ميلليونعا جۋىق مەملەكەتتىك كولىك بار. ءبىراق بۇعان دەيىن باسشىلاردى تاسىپ، ەندى جۇمىسسىز قالعان اۆتوكولىك جۇرگىزۋشىلەرىن ەڭبەكپەن قامتۋ باستى ماسەلەگە اينالاتىن ءتۇرى بار. ولاردى ۋاقىتىنان بۇرىن زەينەتكە شىعارۋ تۋرالى ۇسىنىس ايتىلۋدا.
اۆتورلارى: نۇربەك بەكەن، جاڭ ءسۇي
www.24.kz
