قازاقستاندا رەسپۋبليكالىق اۆتوجولداردىڭ ۇشتەن ءبىرى اقىلى بولادى - ج. قاسىمبەك

بۇگىن ءماجىلىستىڭ ەكونوميكالىق رەفورما جانە وڭىرلىك دامۋ كوميتەتىنىڭ كەڭەيتىلگەن وتىرىسىندا ق ر ينۆەستيتسيالار جانە دامۋ ءمينيسترىنىڭ ءبىرىنشى ورىنباسارى جەڭىس قاسىمبەك وسىلاي ءمالىم ەتتى.

ەسكە سالا كەتەيىك، وتىرىس بارىسىندا «نۇرلى جول - بولاشاققا باستار جول» جاڭا ەكونوميكالىق ساياساتىنىڭ شەڭبەرىندەگى كولىك ينفراقۇرىلىمىن دامىتۋ ماسەلەلەرى تالقىلانعان بولاتىن.

«كولىك ينفراقۇرىلىمىن دامىتۋدىڭ 2022 - جىلعا دەيىنگى مەملەكەتتىك جوسپارىنا سايكەس، رەسپۋبليكالىق ماڭىزعا يە اقىلى اۆتوكولىك جولدارىن 7 مىڭ شاقىرىمعا دەيىن ارتتىرۋ كوزدەلەدى. بۇل شامامەن ەلىمىزدىڭ رەسپۋبليكالىق ماڭىزعا يە 23 مىڭ شاقىرىم جولدارىنىڭ ۇشتەن بىرىنە تەڭ»، - دەدى مينيستر ورىنباسارى.

ونىڭ ايتۋىنا قاراعاندا، اقىلى جولداردىڭ قاتارىندا «استانا- تەمىرتاۋ»، «الماتى- قاپشاعاي»، «استانا- پاۆلودار» جانە باسقا دا جۇك قاۋىرتتىلىعى مەن قوزعالىس ترافيكتەرى جوعارى جولدار بار. وسىعان وراي، ۆەدومستۆو وكىلىنىڭ ايتۋىنشا، اعىمداعى جىلدىڭ ءبىرىنشى جارتىسىندا كولىكتىڭ بارلىق تۇرلەرى ءۇشىن ءبىرىنشى تەحنيكالىق ساناتتاعى اۆتوكولىك جولدارىنىڭ قايتا ەنگىزىلگەن اقىلى جۇيەسى قوندىرعىلارىنا جوبالىق قۇجاتتامالار ازىرلەۋ جۇمىستارى اتقارىلاتىن بولادى.

«بۇدان بولەك، مينيسترلىك رەسپۋبليكالىق جەلى بويىنشا جول ۋچاسكەلەرىنەن اقى الۋ جۇيەسىن ەنگىزۋ ءۇشىن ينۆەستورلار تارتۋ ماسەلەسىن قاراستىرۋدا. سونىڭ ىشىندە بۇگىنگى كۇنى ەكىنشى تەحنيكالىق ساناتتاعى اۆتوموبيل جولدارىنان 12 توننادان اساتىن جۇك كولىكتەرى ءۇشىن اقى تولەۋدىڭ اشىق جۇيەسىن ەنگىزۋ مۇمكىندىكتەرى دە قارالۋدا»، - دەيدى ج. قاسىمبەك.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى