ماڭعىستاۋدا سابيلەرگە تۇرىك سەريالدارى كەيىپكەرلەرىنىڭ ەسىمى ءجيى قويىلعان
اقتاۋ قالالىق ادىلەت باسقارماسىنىڭ تالداۋىنا قاراعاندا، 2014 - جىلى ەر بالالارعا سۇلەيمان، مانسۇر، مۇستافا، يبراحيم، ەليف، ابدۋل ازيز ەسىمدەرى كوپ قويىلعان. قىز بالالارعا ۆاليدا، ياسمين، ايلين ەسىمدەرى ءجيى بەرىلىپتى.
جاڭا تۋعان نارەستەلەرگە سول سياقتى مۇسىلمان دىنىنە قاتىستى ەسىمدەر دە كوپ قويىلعان. ايتالىق، ەر بالالار مۇحاممەد، مۇحاممەد حانافيا، نۇريسلام، يمان ەسىمدەرىن ءجيى يەلەنسە، قىز بالالارعا ايانا، ايشا، ءمادينا، رايانا، مۋنيرا، ءامينا، ماليكا ەسىمدەرى قويىلعان.
«قوسارلى ەسىمدەردى قويۋ دا سانگە اينالدى. مىسالى، ەگەر بۇرىن قاسىمجومارت ەسىمى بىرگە جازىلاتىن بولسا، ەندى اتا-انالار ونى ءبولىپ جازۋدى سۇرايدى. سونداي-اق ءابىل مانسۇر ەسىمى تانىمال بولىپ تۇر»، - دەيدى اقتاۋ قالالىق ادىلەت باسقارماسىنىڭ باسشىسى ايشا ەلەمەسوۆا.
ادىلەت باسقارماسى ماماندارىنىڭ مالىمەتىنشە، ۇلدارعا كاۋسار، بەرەكەت، بەيبارىس، دامير ەسىمدەرى دە ءجيى قويىلادى. سلاۆيان ەسىمدەرى اراسىندا ۇلداردىڭ دانيلا، دانيەل، ارسەني، اندرەي، قىز بالالاردىڭ اناستاسيا، اننا، سوفيا، دانيەلا، سنەجانا، انگەلينا ەسىمدەرى كەڭ تاراعان.
ەسكە سالا كەتەيىك، بۇعان دەيىن ق ر ۇلتتىق ەكونوميكا مينيسترلىگىنىڭ ستاتيستيكا كوميتەتى 2014 - جىلى سابيلەرگە كوپ قويىلعان ەسىمدەردى جاريا ەتكەن بولاتىن. وتكەن جىلى ءاليحان مەن ايزەرە ەڭ تانىمال ەسىمدەر اتاندى.
ءاليحان ەسىمى 2798 ۇلعا، ايزەرە ەسىمى 6276 قىز بالاعا قويىلعان. ايزەرە سوڭعى ەكى جىل ىشىندە ەڭ تانىمال ەسىم اتانىپ وتىر. ال ءاليحان الدىڭعى جىلدارى كوشباسشى بولعان ەراسىل ەسىمىن ىعىستىردى.
ستاتيستيكا كوميتەتى ءوزىنىڭ رەسمي سايتىندا ازاماتتاردىڭ جەكە باس مالىمەتتەرىنە قاتىستى قىزىقتى دەرەكتەر الۋدى دا ۇسىنادى. «بۇل قىزىقتى» دەگەن ءبولىمنىڭ «مەن سياقتى نەشە ادام بار؟» تاراۋىنداعى ءتيىستى جولاقتاردى تولتىرعان كەزدە قازاقستاندا وزىڭىزبەن اتتاس قانشا ادامنىڭ بار ەكەنىن بىلۋگە بولادى.
tengrinews.kz
