جاپون ەلى تۇتقىنداردى ايىرباستاۋى مۇمكىن بە؟
ولار قوياتىن كەزەكتى تالاپتىڭ مەرزىمى ءوز ۋاقىتىنا جەتىپ قالدى.
جاپون جۋرناليسى مەن يوردان ۇشقىشى لاڭكەس سادجيدا ار-ريشاۋيگە ايىرباستالۋى ءتيىس. سودىرلاردىڭ شارتى بويىنشا ايەلدى تۇركيا شەكاراسىنا جەتكىزۋلەرى قاجەت.
بەيسەنبىگە قاراعان ءتۇنى «يسلام مەملەكەتى» ۇيىمىنىڭ ساربازدارى جاپونيا بيلىگىنە باعىتتالعان كەزەكتى ۇندەۋىن جولدادى.
ءۇنتاسپادا «يوردانيا اباقتىسىندا وتىرعان سادجيرا ار- ريشاۋي 29 - قاڭتار كۇنى قاس قارايماي تۇرىپ، تۇرىك شەكاراسىنا اكەلىنسىن» دەپ جازىلعان. شارت ورىندالماسا، يوردانيا ۇشقىشى مۋاز ءال-كاساسبەح ومىرىمەن قوشتاسۋى مۇمكىن.
توكيو بيلىگى كادردان تىس داۋىس جاپون ءتىلشىسى كەندزي گوتونىكى بولۋى ىقتيمال ەكەندىگىن مالىمدەدى. وسىعان وراي پرەمەر-مينيستر سيندزو ابە شۇعىل جيىن وتكىزىپ، جاپون ءتىلشىسىن قۇتقارىپ قالۋ ءۇشىن بارلىق كۇش جۇمىلدىرىلۋىن تاپسىردى.
سيندزو ابە، جاپونيا پرەمەر- ءمينيسترى:
- «يسلام مەملەكەتى» سودىرلارىنىڭ ءبىزدىڭ ەش كىناسى جوق ازاماتتارىمىزدى ءوز پايداسىنا پايدالانىپ وتىرعانىن كەشىرە المايمىز. ءبىزدىڭ ەل حالىقارالىق قاۋىمداستىقتارمەن بىرلەسە بەيبىتشىلىكتى ساقتاۋ جولىندا ايانىپ قالمايدى.
جاپونيادا كەندزي گوتو افريكا مەن تاياۋ شىعىس ەلدەرىنەن كوركەم فيلم شىعاراتىن ءوز جەكە كومپانياسى بار جۋرناليست رەتىندە تانىمال. بىلتىر كۇزدە ول سيرياعا اتتانعان ەكەن. سودان باستاپ ونىمەن بايلانىس ۇزىلگەن. جاپون ءتىلشىسىنىڭ تۋىستارى مەن ەل تۇرعىندارى ۇكىمەت كەندزي گوتونى بوساتىپ الادى دەگەن ۇمىتتە.
دزيۋنكو يسيدو، تۇتقىن كەندزي گوتونىڭ اناسى:
- مەن ۇلىمنىڭ ۇيگە ورالاتىنىنا سەنىمدىمىن. كەندزي جاۋ ەمەس. پرەمەر- مينيستر سيندزو ابەنىڭ بۇل تۇرعىدا ايانىپ قالمايتىنىنا كۇمانىم جوق.
«يسلام مەملەكەتى» ساربازدارى ءۇشىن بۇل ءبىرىنشى جاعداي ەمەس. سوڭعى 5 جىلدا ولار قانشا ادامدى تۇتقىنعا العانىن ەشكىم ءدوپ باسىپ ايتا المايدى. ءبىراق اڭگىمە مىڭداعان ادام جونىندە ەكەنى بەلگىلى. ءبىراق جاپونيا ازاماتتارى تۇتقىنعا ءبىرىنشى رەت الىنىپ وتىر. مۇنىڭ بارلىعى توكيونىڭ تاياۋ شىعىس ەلدەرىنە 2,5 ميلليارد، ونىڭ ىشىندە 200 ميلليون دوللارىن وسى ۇيىممەن كۇرەسكە بولەتىندىگىن جاريا ەتكەن سوڭ پايدا بولدى. بۇگىن تومەنگى پالاتادا وتكەن بيۋدجەت كوميتەتىندە ابە جاپونيا لاڭكەستەرگە مويىنسۇنبايتىنىن جەتكىزىپ، بوسقىندارعا تاعى دا قارجى بولەتىنىن العا تارتتى.
سيندزو ابە، جاپونيا پرەمەر-ءمينيسترى:
- ەگەردە جاپونيا سودىرلاردىڭ ىرقىنا كونەتىن بولسا، ولار تاعى دا ءبىزدىڭ ازاماتتارعا قىرعيداي تيەتىن بولادى جانە وسى ارقىلى ويلارىنا كەلگەنىن جاسايتىنداردىڭ مىسى باسىم تۇسەرى حاق.
جاپونيا مەن يوردانيا «يسلام مەملەكەتىنىڭ» سودىرلارىمەن قانداي دا ءبىر مامىلەگە كەلە الا ما؟ تۇتقىنداعىلار بوساي ما؟ لاڭكەس سادجيدا ار-ريشاۋي بوستاندىقتا نەمەن شۇعىلدانۋى مۇمكىن؟ بۇل سۇراقتارعا ەشكىم ناقتى جاۋاپ بەرە المايدى.
www.24.kz
