بىرىككەن ۇلتتار ۇيىمىنا قارىزى بولعان قىرعىزستان داۋىس بەرۋ قۇقىعىنان ايىرىلدى
بۇل تۋرالى ب ۇ ۇ رەسمي سايتىندا حابارلاندى.
«قازىرگى ۋاقىتتا ۇيىمعا مۇشە 7 مەملەكەت باس اسسامبلەيانىڭ 69-1 سەسسياسىندا داۋىس بەرە المايتىن بولدى. بۇل گرەنادا، قىرعىزستان، مارشالل ارالدارى، بۇرىنعى ماكەدونيا يۋگوسلاۆيالىق رەسپۋبليكاسى، تونگا، ۆانۋاتۋ مەن يەمەن»، - دەپ اتاپ ءوتتى ب ۇ ۇ باس حاتشىسىنىڭ رەسمي وكىلى ستەفان ديۋجارريك.
ونىڭ سوزىنە قاراعاندا، بىرنەشە كۇن بۇرىن بۇل تىزىمنەن قارىزىن تولىق وتەگەن رۋاندا الىنىپ تاستالعان.
ب ۇ ۇ باس حاتشىسى پان گي مۋننىڭ اعىمداعى جىلدىڭ 12- قاڭتارىندا باس اسسامبلەيانىڭ ءتوراعاسى سەم كۋتەساعا جولداعان حاتىنا سايكەس داۋىس بەرۋ قۇقىعىن قايتارۋ ءۇشىن قىرعىزستان كەم دەگەندە $6731 تولەۋى قاجەت.
وسىعان بايلانىستى بۇگىن قىرعىز رەسپۋبليكاسىنىڭ جوگوركۋ كەنەش حالىقارالىق ىستەر بويىنشا كوميتەتىنىڭ ءتوراعاسى قانىبەك يماناليەۆ ۇكىمەتكە ب ۇ ۇ باس اسسامبلەياسىنا مۇشەلىك جارنانى تولەۋ بويىنشا جاعدايدى ءتۇسىندىرۋ ماقساتىندا حات جولدادى. ول قىرعىزستان رەسپۋبليكاسى ۇكىمەتىنىڭ ارەكەتسىزدىگى ەلدى ىڭعايسىز جاعدايدا قالدىرىپ، مەملەكەتتىڭ الەمدىك قاۋىمداستىق الدىنداعى بەدەلىن ءتۇسىرىپ وتىرعانىن ايتتى.
قىرعىز رەسپۋبليكاسىنىڭ قارجى مينيسترلىگىنىڭ باسپا ءسوز حابارلاماسىندا ەلدىڭ سىرتقى ىستەر مينيستىرلىگىنىڭ حاتىنا سايكەس قىرعىزستاننىڭ ب ۇ ۇ- نىڭ بيۋدجەتىنە تولەيتىن سالىمى $54 271 قۇرايتىنى جانە ول وسى ايدىڭ سوڭىنا دەيىن تولەنەتىنى جازىلعان.
