ا. ەسىموۆ الماتى قالاسىنىڭ ۇستازدارىنا بالالاردى وقىتۋدىڭ زاماناۋي تاسىلدەرىن يگەرۋدى ۇسىندى

«وتكەن 2014 - جىل الماتىدا ءبىلىم بەرۋ جىلى دەپ ايشىقتالعان ەدى. ءبىزدىڭ يگى نيەتىمىز قالا جۇرتشىلىعى، اتا- انالار تاراپىنان كەڭ قولداۋ تاپتى. بۇل جىلى مۇعالىمدەردىڭ قول جەتكىزگەن جەتىستىكتەرى بارشىلىق. ماتەماتيكا، حيميا، فيزيكا، بيولوگيا پاندەرىنەن وتكەن پرەزيدەنتتىك وليمپيادادا الماتى قالاسىنىڭ كومانداسى ءبىرىنشى ورىنعا يە بولدى. جاۋتىكوۆ وليمپياداسىندا جۇلدەلى ورىن العان 49 وقۋشىنىڭ 15 ى الماتىدان»، - دەدى قالا باسشىسى احمەتجان ەسىموۆ.

ونىڭ ايتۋىنشا، ءبىلىم بەرۋ سالاسىنا 71 ميلليارد تەڭگە بولىنگەن. بۇل قالا بيۋدجەتىنىڭ 20 پايىزىن قۇرايدى. الماتىدا ءبىلىم بەرۋدى دامىتۋ جىلى اياسىندا 480 ورىنعا ارنالعان 4 جاڭا بالاباقشا سالىندى. «سايالى» ىقشاماۋدانىندا جالعىز باستى انالار مەن تۇنگى اۋىسىمدا اتا- انالاردى قولداۋ ءۇشىن العاش رەت بەس كۇندىك تاۋلىك بويى جۇمىس جاسايتىن 320 ورىنعا ارنالعان بالاباقشا اشىلدى.

«جاس قانات» ىقشاماۋدانىندا 1200 ورىنعا ارنالگان جاڭا مەكتەپ سالىنىپ، پايدالانۋعا بەرىلدى.

ءبىلىم بەرۋ ۇيىمدارىن ينتەراكتيۆتى قۇرالدارمەن، كومپيۋتەرلىك تەحنيكالارمەن، جاڭا ۇلگىدەگى وقۋ كابينەتتەرىمەن، جيھازدارمەن قامتۋعا 1,4 ميلليارد تەڭگە جۇمسالدى. 19 ءبىلىم بەرۋ ۇيىمىندا سەيسميكالىق كۇشەيتۋ جانە كۇردەلى جوندەۋ جۇمىستارىنا 5,9 ميلليارد تەڭگە كولەمىندە قارجى جۇمسالدى.

كاسىبي- تەحنيكالىق ءبىلىم بەرۋ سالاسىندا دا ىلگەرى جىلجۋ بايقالادى. قالاداعى 32 كاسىپتىك كوللەدجدىڭ باسشىلىعى بىرنەشە ءىرى كاسىپورىندارمەن كەلىسىمگە وتىرىپ، دۋالدى ءبىلىم بەرۋ جۇيەسىن ەنگىزگەن. اتالعان كوللەدجدەردىڭ 1200 تۇلەگى جۇمىسپەن قامتىلاتىن بولدى.

احمەتجان ەسىموۆ قالا ۇستازدارىنا بالالاردى وقىتۋدىڭ زاماناۋي تاسىلدەرىن يگەرۋدى ۇسىندى. دالىرەك ايتساق، الماتىداعى «حەلليبەرري» مەكتەپتەرىندە ستاندارتتان تىس وقىتۋ تاسىلدەرى اكىم تاراپىنان جوعارى باعالاندى. ول اتالعان ماسەلەنى نازارعا الۋدى ءبىلىم بەرۋ باسقارماسىنا تاپسىردى.

اۆتور: گۇلميرا عوسمانالي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى