ەلىمىزدىڭ بىرنەشە جەتەكشى وقۋ ورنى مادەنيەت مينيسترلىگىنىڭ قاراماعىنا بەرىلدى
شىعارماشىلىققا ونسىز دا جانىمىز جاقىن دەگەن مەكەمە ونەر وردالارىنىڭ ناعىز ءوز وتاۋىن تاپقانىنا قۋانىپ وتىر.
بۇل تالاي ونەر تارلاندارىن تاربيلەگەن قاراشاڭىراق تەمىربەك جۇرگەنوۆ اتىنداعى قازاق ۇلتتىق ونەر اكادەمياسى. وسى وقۋ ورنىن قازىرگى مادەنيەت ءمينيسترى باسقارعانىن ايتا كەتەيىك. ەندى اراعا جىل سالىپ اكادەميا ارىستانبەك مۇحامەدي ۇلىنىڭ تىكەلەي قاراماعىنا قايتا ءوتىپ وتىر.
قۇرمانعازى اتىنداعى قازاق ۇلتتىق كونسەرۆاتورياسى مەن استاناداعى قازاق ۇلتتىق ونەر ۋنيۆەرسيتەتى دە، ەندىگى جەردە مادەنيەت جانە سپورت مينيسترلىگىنە باعىنىشتى. سونىمەن قاتار الماتىداعى مۋزىكا كوللەدجى، حوروەگرافيالىق ۋچيليشە، ساندىك قولدانبالى ونەر كوللەدجى، ەسترادالىق سيرك كوللەدجى مەن احمەت جۇبانوۆ پەن كۇلاش بايسەيىتوۆا اتىنداعى مەكتەپ ينتەرناتقا بيۋجەتتەن اقشا ءبولىپ، وقۋ باعدارلامالارىن جاساپ ەمتيحان وتكىزۋ ماسەلەلەرىن مادەنيەت مينيسترلىگى شەشەدى. قىسقاسى ءانشى، ءبيشى، كۇيشى، سۋرەتشى، سيرك پەن كينو ارتىستەرىن ازىرلەۋدى موينىنا العان ۆەدومستۆا ونەردى قارىشتاۋ كۇتىپ تۇر دەپ سەندىردى.
ءدىنيسلام بولاتحان ۇلى، ق ر مادەنيەت جانە سپورت مينيسترلىگىنىڭ دەپارتامەنت ديرەكتورى:
- وسى وقۋ ورىندارىنا ەرەكشە قامقورلىق جاساۋ. ياعني، ولاردىڭ ىشكى پروبلەمالارىنا تەرەڭ ءۇڭىلىپ تەرەڭ ءتۇسىنۋ. ەشقانداي ستۋدەنت دالادا قالمايدى. وقىتۋشىلار ءوز جۇمىستارىن جالعاستىرا بەرەدى. قايتا كەرىسىنشە، مادەنيەت مينيسترلىگى سولاردىڭ جۇمىس ىستەۋىنە بار جاعدايدى جاساپ وتىراتىن بولادى.
«ك ت ك» ارناسى
