كۋبا رەۆوليۋتسياسىنىڭ كوسەمى فيدەل كاسترو: مەن ا ق ش-تىڭ ساياساتىنا سەنبەيمىن
ول وسىلايشا العاشقى ءسوزىن اقش ساياساتىنا ارنادى ءارى ستۋدەنتتەر قاۋىمىنا جولدادى. كۋبا توڭكەرىسىنىڭ كوسەمى فيدەل كاسترونىڭ حاتى كوممۋنيستىك پارتيانىڭ ورتالىق كوميتەتىنىڭ رەسمي باسپا ءسوز ورگانى - كۇندەلىكتى شىعاتىن «گرانما» گازەتىندە باسىلدى.
تارالىمى جارتى ميلليونعا جەتەتىن باسىلىمدا ستۋدەنتتەر قاۋىمىنا ارنالعان ۇندەۋ گاۆانا ۋنيۆەرسيتەتىنىڭ مىنبەرىنەن كوپشىلىككە رەسمي تۇردە وقىلدى.
«قۇراما شتاتتارىنىڭ ساياساتىنا سەنبەيمىن جانە ولارمەن ءبىر اۋىز دا سويلەسكەن ەمەسپىن. ءبىراق بۇل اسكەري قاقتىعىستاردى بەيبىت جولمەن شەشۋدەن مۇلدە باس تارتۋ دەگەندى بىلدىرمەيدى. ءبىز بارلىق الەم حالقىنىڭ اراسىنداعى ىنتىماقتاستىق پەن دوستىقتى ءارقاشان قورعايتىن بولامىز. مۇنداي ۇستانىم ءبىزدىڭ ساياسي قارسىلاستارعا دا قاتىستى»، - دەپ جازدى فيدەل كاسترو.
جاسى 88 گە كەلگەن فيدەل كاستروعا 638 رەت قاستاندىق جاسالعان. دەنساۋلىعىنا بايلانىستى بيلىك باسىنان ءوز ەركىمەن كەتكەن 2006 - جىلدان بەرى فيدەلدى ۇنەمى سىرتتاي جەرلەپ كەلەدى، ءبىراق بۇل قاۋەسەتتەر اركەز جوققا شىعارىلۋدا.
مىڭداعان كۋبالىق 40 جىلدان استام ۋاقىت بويى بيلىكتى ۋىسىندا ۇستاي بىلگەن ۇلكەن كاستروعا دەگەن سەنىمدەرىنىڭ ەش وزگەرمەگەنىن ايتتى.
حوسە انتونيو ۆەگا، گاۆانا تۇرعىنى:
- مەن فيدەل كاسترونىڭ ايتقانىنا سەنەمىن. مەنىڭ ويىمشا، ا ق ش-تىڭ كۋباعا قاتىستى جىلدار بويى جاساعان قىسىمىنا بايلانىستى قورقىنىشتىڭ بولۋى زاڭدى. ءبىراق ءومىر وزگەرىپ جاتىر. سوڭعى 50 جىلدا وقشاۋلانىپ قالعان حالىق وزگەرىستەر جاساۋ مۇمكىندىگىن كورىپ وتىر. ۆالەنتينا، گاۆانا تۇرعىنى:
- مەن ءبىزدىڭ كوسەمگە سەنەمىن. ونىڭ وسى ۇزاق جىلداردان كەيىن قازىر ءبىزدىڭ ەل مەن قۇراما شتاتتار اراسىندا بولىپ جاتقان وقيعالارعا قاتىستى ناقتى ءوز ويى بار.
ا ق ش پرەزيدەنتى باراك وباما مەن كۋبا باسشىسى راۋل كاسترو 2014 - جىلدىڭ جەلتوقسانىندا ەكى ەلدىڭ اراسىنداعى قارىم-قاتىناستى جاقسارتۋ پروتسەسىن باستاۋ تۋرالى مالىمدەگەن بولاتىن. ءبىراق امەريكالىق ساۋدا ەمبارگوسى تۋرالى كونگرەسس ءالى ءوز ۇستانىمىن رەسمي ايتقان جوق. ال كۋبالىقتار «بوستاندىق ارالىن» امەريكالىقتاردىڭ كوڭىل-كۇيىن كوتەرەتىن ەلگە اينالدىرۋ ەندى بولا قويماس» دەيدى.
www.24.kz
