شىمكەنتتە ادام قاعىپ ولتىرگەن اۆتوبۋس جۇرگىزۋشىسى ەكى جارىم جىلعا سوتتالدى
وتكەن جىلدىڭ 1 - قاراشاسىندا شىمكەنتتە بىرىمەن-ءبىرى جارىسىپ، «وتىرار» ايالداماسىندا تۇرعان قىزدى قاعىپ ولتىرگەن قوعامدىق كولىكتىڭ جۇرگىزۋشىنە قاتىستى ءال-فارابي اۋداندىق سوتى ۇكىم ەتتى.
№19 قالالىق قوعامدىق كولىكتىڭ بۇرىنعى جۇرگىزۋشىسى نۇرتاي سەيسەنبايەۆ ەكى جارىم جىلعا باس بوستاندىعىنان، سونىمەن قوسا 3 جىلعا كولىك جۇرگىزۋ كۋالىگىنەن ايىرىلدى. ۇكىمدى اۋداندىق سوتتىڭ ءتوراعاسى مۇرات-ءالى بەكنازاروۆ وقىدى. سوت وتىرىسىندا سوت ۇكىمىمەن ايىپتالۋشى تاراپ تا، جابىرلەنۋشى تاراپ تا كەلىسەتىندەرىن جەتكىزدى.
ەستەرىڭىزگە سالا كەتەيىك، ايىپتالۋشى نۇرتاي سەيسەنبايەۆ ق ر ق ك 296-بابى، ياعني، «كولىك قۇرالدارىن جۇرگىزۋشى ادامداردىڭ جول قوزعالىسى جانە كولىك قۇرالدارىن پايدالانۋ ەرەجەلەرىن بۇزۋى» بويىنشا جاۋاپقا تارتىلعان ەدى. ول وتكەن جىلدىڭ قاراشا ايىندا ارىپتەستەرىمەن جارىسامىن دەپ قالاداعى «وتىرار» ايالداماسىندا تۇرعان جولاۋشى لاۋرا ءاشىروۆانى قاعىپ كەتكەن. 28 جاستاعى بويجەتكەن وقيعا ورنىندا مەرت بولعان ەدى.
