سوتقا كەلتەحات ارقىلى شاقىرتۋ بيۋدجەتتىڭ ميلليونداعان تەڭگەسىن ۇنەمدەدى
مۇنداي جاڭا جۇيە تەلەگراممالاردى قولدانۋدى ازايتىپ، بيۋدجەت قارجىسىن 128 ميلليون تەڭگەگە ۇنەمدەگەن.
بۇل تۋرالى 28 - قاڭتار كۇنى ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگتە ايتىلدى. بريفينگكە جوعارعى سوت سۋديالارى: مورياك شەگەنوۆ، نۇرجان قايىپجان جانە جوعارعى سوت جانىنداعى سوتتاردىڭ قىزمەتىن قامتاماسىز ەتۋ دەپارتامەنتىنىڭ باسشىسى ءىلياس يسپانوۆ قاتىستى.
باسپا ءسوز قىزمەتىنىڭ حابارلاۋىنشا، وتكەن جىلى رەسپۋبليكاداعى اۋداندىق جانە وعان تەڭەستىرىلگەن سوتتارعا 1177133 ازاماتتىق جانە اكىمشىلىك ىستەر مەن وتىنىشتەر كەلىپ تۇسكەن.
بۇل 2013 - جىلعا قاراعاندا 8,6 پايىزعا ارتىق. سونىمەن قاتار، مۇنداي ستاتيستيكالىق مالىمەت مەدياتوردىڭ قاتىسۋىمەن قارالاتىن ازاماتتىق ىستەردىڭ 4 ەسەگە دەيىن ارتقانىن كورسەتىپ وتىر.
سۋديا شەگەنوۆتىڭ ايتۋىنشا، 2014 - جىلى سوتتارعا كەلىپ تۇسكەن 1,2 ميلليونعا جۋىق ءوتىنىش پەن ىسكە قاتىستى شىعارىلعان سوت اكتىلەرىنىڭ 98,7 پايىزى - زاڭدى ءارى نەگىزدى. سونىمەن قاتار ول وتكەن جىلى ازاماتتاردىڭ سۋديالار قىزمەتىنە شاعىمدارىنىڭ سانى 5 پايىزعا ازايعانىن ايتتى.
ايتا كەتەيىك، جوعارعى سوت جاڭا ازاماتتىق ءىس جۇرگىزۋ كودەكسىن ازىرلەپ، پارلامەنت ماجىلىسىنە جىبەردى. كودەكستىڭ جاڭا جوباسى كۇردەلى ەمەس ساناتتاعى ىستەر بويىنشا بۇيرىق ارقىلى ءىس جۇرگىزۋدى قولدانۋ سالالارىن كەڭەيتۋدى، سونداي-اق ىستەردىڭ جەكەلەگەن ساناتتارى بويىنشا سوت ءىسىن جۇرگىزۋدىڭ جەڭىلدەتىلگەن ءتارتىبىن ەنگىزۋدى كوزدەيدى. جاڭا كودەكس 2016 - جىلدان باستاپ قولدانىسقا ەنەدى.
ەسكە سالا كەتەيىك، ق ر جوعارعى سوتىنىڭ رەسپۋبليكا بويىنشا سوت ورگاندارىنىڭ 2014 - جىلعى جۇمىسىن سەگىز ولشەم بويىنشا باعالاپ، ۇزدىك وڭىرلىك سوتتاردىڭ رەيتينگىن جاساعانى حابارلانعان بولاتىن. باعالاۋ ناتيجەسى بويىنشا شىعىس قازاقستان وبلىسىنىڭ سوتتارى الدىڭعى جىلعىداي كوش باسىنا شىقتى. ەكىنشى ورىندا - سولتۇستىك قازاقستان وبلىسىنىڭ، ءۇشىنشى ورىندا - جامبىل وبلىسىنىڭ سوت ورگاندارى.
