قازاقستان مەن ا ق ش اسكەرى بىرلەسكەن وقۋ-جاتتىعۋ وتكىزەدى
«الماتى قالاسىنداعى 61993 اسكەري ءبولىمىنىڭ بازاسىندا ا ق ش قارۋلى كۇشتەرى وكىلدەرىنىڭ قاتىسۋىمەن «دالا قىرانى-2015» حالىقارالىق تاكتيكالىق-ارنايى بىتىمگەرشىلىك وقۋ-جاتتىعۋىن جوسپارلاۋ باستالدى. 8 ادامنان تۇراتىن ا ق ش دەلەگاتسياسىن مايور دجاستين كولبەرت باستاپ كەلدى»، - دەلىنگەن حابارلامادا. بۇل ءىس-شارانىڭ ماقساتى «دالا قىرانى-2015» حالىقارالىق تاكتيكالىق-ارنايى بىتىمگەرشىلىك وقۋ-جاتتىعۋىنىڭ جوسپار-نيەتىن تالقىلاۋ، جوسپارلاۋ جانە بەكىتۋ ەكەنى ايتىلعان.
قورعانىس مينيسترلىگى وكىلدەرىنىڭ مالىمەتىنشە، بيىل قازاقستان تاراپىنان «قازبات» بىتىمگەرشىلىك باتالونىنىڭ بارلىق جەكە قۇرامى جانە ق ر ق ك اەروۇتقىر اسكەرلەرى «قازبريگ» بىتىمگەرشىلىك بريگاداسى شتابى قاتىسادى دەپ جوسپارلاندى.
«ەستەرىڭىزگە سالا كەتسەك، «دالا قىرانى-2015» وقۋ-جاتتىعۋى «قازبريگتىڭ» بەيبىتشىلىكتى قولداۋ جانە بىرىككەن قولباسشىلىقپەن كوپ ۇلتتى كۇشتەر قۇرامىندا مىندەتتەردى اتقارۋ قابىلەتىن تەكسەرۋگە باعىتتالعان»، - دەلىنگەن باسپا ءسوز حابارلاماسىندا.
اتالعان وقۋ-جاتتىعۋ 2003-جىلدان بەرى وتكىزىلىپ كەلەدى. جىل سايىن وقۋ-جاتتىعۋعا 1500 دەن استام ادام جۇمىلدىرىلىپ، شەت مەملەكەتتەردىڭ اسكەري باقىلاۋشىلارى، ناتو ءتۇرلى شتابتارىنىڭ ساراپشىلارى، قازاقستان رەسپۋبليكاسىندا تىركەلگەن اسكەري-ديپلوماتيالىق كورپۋس شاقىرىلادى.
