ا ق ش مىقتى ما، رەسەي كۇشتى مە؟

ايەلدەر اراسىنداعى باسەكەدە شيرەك فينالعا ءۇش امەريكاندىق، ەكى رەسەيلىك تەننيسشى جولداما العان بولاتىن. كەشە الەمنىڭ ەكىنشى راكەتكاسى ماريا شاراپوۆا دۇنيەجۇزىلىك ساتىدا جەتىنشى ورىندا تۇرعان كانادالىق ەجەني بۋشاردى اسا قينالماي ۇتىپ، جارتىلاي فينالعا جولداما الدى.

تاعى ءبىر رەسەيلىك، رەيتينگتە ونىنشى ورىنداعى ەكاتەرينا ماكاروۆا وسى ويىندا كوپشىلىك ماماندار جەڭەدى دەپ ەسەپتەگەن رۋمىنيالىق، الەمنىڭ ءۇشىنشى راكەتكاسى سيمونا حالەپتى جولدان تايدىردى. ءسويتىپ ول سپورتتىق ومىرىندە العاش رەت ۇلكەن دۋلىعانىڭ جارتىلاي فينالىندا وينايتىن بولدى. بۇل - م. شاراپوۆا جەڭسە دە، ە. ماكاروۆا ۇتسا دا، فينالدا رەسەيلىك تەننيسشى باس جۇلدەنى ساراپقا سالادى دەگەن ءسوز.

ال بۇگىن قالعان ەكى جولدامانىڭ يەلەرى بەلگىلى بولادى. مۇندا اپالى-ءسىڭلىلى ۆينۋس پەن سەرەنا ۋيليامستىڭ جولى بولۋى ابدەن ىقتيمال. ول ءۇشىن ۇلكەن دۋلىعانى 18 مارتە، سونىڭ ىشىندە اۆستراليا اشىق بىرىنشىلىگىن بەس رەت ۇتقان الەمنىڭ ءبىرىنشى راكەتكاسى سەرەنانىڭ سلوۆاكيالىق، وسى چەمپيوناتتىڭ وتكەن جىلعى فيناليسى، دۇنيە جۇزىلىك رەيتينگتە 11- ورىندا تۇرعان دومينيكا تسيبۋلكوۆانى جەڭۋى كەرەك. ال 34 جاسار ۆينۋس وزىنەن 15 جاس كىشى، ون توعىز جاسار تاعى ءبىر امەريكاندىق، وسى تۋرنيردىڭ باستى جاڭالىعى مەديسون كيستى سىنعا سالادى.

مۇندا كەزىندە ۇلكەن دۋلىعانى جەتى رەت، سونىڭ ىشىندە ۋيمبلدون تۋرنيرىن بەس مارتە جەڭىپ العان ۆينۋستىڭ تاجىريبەسى پايداعا اسۋى مۇمكىن. قالاي ەتكەندە دە، كەمىندە ءبىر امەريكاندىق تەننيسشى جارتىلاي فينالعا شىعادى. سەرەنا دا قاراپ قالماس. سوندىقتان سەنبى كۇنگى فينالدا امەريكاندىق پەن رەسەيلىك ويىنشىنىڭ سوڭعى سىنعا ءتۇسۋى مۇمكىن جايت.

ەرلەر اراسىنداعى باسەكەلەر دە قىزۋ وتۋدە. كەشە چەحيالىق، الەمنىڭ جەتىنشى راكەتكاسى توماش بەردىح وزىنەن بەس ساتى جوعارى تۇرعان اتاقتى يسپاندىق رافاەل نادالدى سان سوقتىرسا، ۇلى بريتانيالىق، التىنشى ورىنداعى ەندي ماررەي اۆستراليالىق جاس تەننيسشى نيك كيروستى ۇتىپ، جارتىلاي فينالعا شىقتى.

بۇگىن الەمنىڭ ءبىرىنشى راكەتكاسى، سەربيالىق نوۆاك دجوكوۆيچ پەن كانادالىق، التىنشى ورىنداعى ميلوش راونيچتىڭ، دۇنيە جۇزىلىك ساتىدا سايكەسىنشە ءتورتىنشى جانە بەسىنشى ساتىدا تۇرعان، شۆەيتساريالىق، اۆستراليا چەمپيوناتىنىڭ وتكەن جىلعى جەڭىمپازى ستانيسلاس ۆاۆرينكا مەن جاپونيالىق كەي نيسيكوري جۇپتارى تاعى ەكى ۇمىتكەردى انىقتايدى. ەرلەر اراسىنداعى فينالدىق باسەكە جەكسەنبى كۇنى بولماقشى.

ايتا كەتەيىك، بيىلعى اۆستراليا چەمپيوناتى قازاقستاندىقتار ءۇشىن دە اسا ءساتسىز دەۋگە كەلمەس. ەلىمىزدىڭ ءبىرىنشى جانە ەكىنشى راكەتكالارى زارينا دياس پەن ياروسلاۆا شۆەدوۆا ءۇشىنشى اينالىمعا دەيىن جەتتى. بۇل ولاردىڭ دۇنيەجۇزىلىك رەيتينگتەگى ورىندارىن ساقتاپ قالۋعا، ءتىپتى جاڭارتۋعا مۇمكىندىك بەرەدى. الەمنىڭ 31- راكەتكاسى ز. دياس بيىل قالايدا ۇزدىك جيىرما تەننيسشىنىڭ قاتارىنا كىرەمىن دەپ مالىمدەمە جاساپ وتىر.

تاعى ءبىر جاقسى جاڭالىق، ءبىراز جىلعى ۇزىلىستەن كەيىن زارينا قازاقستان قۇراماسى ساپىندا اقپان ايىنىڭ باسىندا قىتايدا تەننيس فەدەراتسياسىنىڭ كۋبوگى ءۇشىن ەل نامىسىن قورعاماقشى. سودان كەيىن شتۋتگارت، مادريد، ريم قالاسىنداعى حالىقارالىق تۋرنيرلەردە كورتقا شىعادى. ارينە، باستى ماقسات ۇلكەن دۋلىعانىڭ قالعان تۋرنيرلەرى - ۋيمبلدون، رولان گارروس، ا ق ش-تىڭ اشىق چەمپيوناتىندا بارىنشا تابىستى ونەر كورسەتىپ، ۇپاي قورىن مولايتۋ بولسا كەرەك.

اۆتور: ەلجان ەرالى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى