ءۇندىستاندا سەلفي جاساعىسى كەلگەن ستۋدەنتتەردى پويىز باسىپ كەتتى
تەمىرجول بويىندا ءۇش ستۋدەنت قازا تاپتى. ولار جاقىنداپ كەلە جاتقان پويىزبەن بىرگە وزدەرىن سۋرەتكە تۇسىرگىسى كەلگەن، ءبىراق ولاردىڭ ءىسى قايعىلى اياقتالدى.
وقيعا 26 - قاڭتاردا ۋتتار-پرادەش شتاتىندا تاڭعى ۋاقىتتا بولدى.
ايتا كەتەيىك، كەشە بۇل ەلدە رەسپۋبليكا كۇنى تويلانىپ جاتقان.
ءتورت ستۋدەنت دەلي قالاسىنان اگرۋعا قاراي جولعا شىعىپ، اتاقتى ءتاج-ماحال كەسەنەسىنە بارعىسى كەلگەن. دوستاردىڭ ءبىرى پويىزدىڭ الدىندا تۇرىپ سەلفي جاساپ، ونى ينتەرنەتكە جۇكتەۋدى ۇسىنادى.
ءۇش جىگىت پويىزدىڭ جولىنا جاقىن تۇرىپ، كەلە جاتقان پويىزدىڭ الدىندا سۋرەتكە تۇسكىسى كەلەدى. ءسويتىپ، ولار پويىزدىڭ جاقىنداعانىن بايقاماي قالعان. ءتىرى قالعان ستۋدەنت پوليتسەيلەرگە ءوز دوستارىن قىرىنان ءتۇسىرىپ تۇرعاندىقتان، قاۋىپ تۋرالى ەسكەرتىپ ۇلگەرمەگەنىن ايتىپ بەردى.
ءتارتىپ ساقشىلارى قازا تاپقان ستۋدەنتتەردىڭ 20-22 جاستا بولعانىن ناقتىلادى - ولار كوللەدجدە ءبىلىم الىپ جۇرگەن. قازىرگى ۋاقىتتا بولعان وقيعانىڭ جاي-جاپسارى انىقتالىپ جاتىر.
ەسكە سالا كەتەيىك، 2014 - جىلى تامىز ايىندا مەكسيكادا ءبىر جىگىتتىڭ ەبەدەيسىز جاعدايدا ولگەنى تۋرالى حابارلانعان ەدى. ول تاپانشامەن سەلفي تۇسىرگىسى كەلىپ، بايقاۋسىزدا ءوزىن اتىپ العان. قۇقىق قورعاۋ ورگاندارىنىڭ قىزمەتكەرلەرى بۇل جايتتىڭ قىلمىس ەمەس، قايعىلى وقيعا ەكەنىن رەسمي تۇردە مالىمدەدى، ءبىراق ونىڭ ءمان-جايى انىقتالىپ جاتىر.
