تۇرىك كينوسىنا ءتۇسىپ جۇرگەن جالعىز قازاق

شەتتە جۇرگەن قازاق بالاسىنىڭ تاريحي وتانىنا ورالۋى تۋرالى دەرەكتى فيلمدى وسى ەلدىڭ باس تەلەراديو كومپانياسى دا قارجىلاندىرماق.

باھادۇر قازىر «Ulan Istanbul» سەريالىنا ءتۇسىپ جاتىر. جاڭا كارتينا ەندى عانا باستالسا دا، تەلەكورەرمەننىڭ كوڭىلىن باۋراعان كومەديالىق تۇسىرىلىمدە قانداسىمىز قىتاي اسپازشىسىنىڭ ءرولىن سومدايدى. تەك بۇل جوبادا ەمەس، قالعان كينولارىندا دا ءباھادۇر جاپون، كارىس جانە قىتاي ازاماتتارىنىڭ ءرولىن ويناعان. تۇركياداعى جالعىز قازاق اكتەرىنىڭ شەبەرلىگىن ەلدىڭ تانىمال رەجيسسەرلارى جوعارى باعالاپ وتىر.

«وسى ءرولدى سومداپ بەرەتىن ادام تابا الماي جۇرگەنمىن. تۇركيادا قىتاي اكتەرى جوقتىڭ قاسى. كەيىن بىرنەشە رەجيسسەر ماعان ءباھادۇردى الۋعا كەڭەس بەردى. قازاق بالاسىنىڭ بويىنداعى تالانتتى بىردەن بايقادىم. سەريال رەيتينگىسىنىڭ جوعارى بولۋىنا ونىڭ قوسقان ۇلەسى از ەمەس. قازىر ءتىپتى تۇركيادا باھادۇردىڭ فاناتتارى كلۋب قۇرىپ العان» - دەيدى «Ulan Istanbul» سەريالىنىڭ باس رەجيسسەرى مۇرات ءونبۋل.

قازىر باھادۇر «اتاجۇرت جولىندا» اتتى تەلەجوبانى قولعا الدى. دەرەكتى فيلمنىڭ سەناريىن جازىپ، تۇسىرىلىمگە دايىندالۋدا. بۇل وي وعان اتامەكەنگە دەگەن ساعىنىشتان پايدا بولعان. تۇرىكتىڭ باس تەلەراديو كورپوراتسياسى قارجىلاندىراتىن فيلمدە شەتتە جۇرگەن قازاق بالاسىنىڭ اتاجۇرتقا ورالۋى كورسەتىلەدى.

«نەگىزگى اتاجۇرتىم شىعىس قازاقستان وبلىسى. ءبىر جىلدارى قازىرگى استانانى دا مەكەن ەتكەنبىز. سەمەي، وسكەمەن ودان كەيىن، قىتايعا وتەمىز. قىتايدا التاي جانە تارباعاتاي ءوڭىرىن پانالادىق. قيىن-قىستاۋ جىلدارى گيمالاي تاۋىنان اسىپ، ودان كەيىن ءۇندىستان، پاكىستان ارقىلى تۇركياعا كەلدىك. قازىر تالاي قازاقتى سەندەلتكەن كوش تۋرالى دا جوبا جاساسام دەپ ءجۇرمىن»، - دەيدى قازاق اكتەرى باھادۇر حاكىم.

باھادۇردىڭ ارمانى - قازاق كينوسىنداعى باستى رولدەردىڭ ءبىرىن سومداۋ. سونداي-اق قانداسىمىز قازاق اكتەرلەرىن تۇرىك ەلىنە كەڭىنەن تانىتىپ، قازاقستاندا كينو سالاسىنىڭ وتە قارقىندى دامىپ كەلە جاتقانىن كورسەتكىسى كەلەدى.

P. S. ول بىردە قىتاي، بىردە جاپون، بىردە وزبەك كەيپىنە ەنەدى. ءاسىلى، تۇرىكتەردىڭ كينولارىنان ءوز قانداسىمىزدى تاني الماس ەك. موڭعول تەكتەس سيپاتىنىڭ ارقاسىندا تالاي كارتيناعا ءتۇسىپ، تۇركيادا تانىلىپ ۇلگەردى. ول قاتىسقان فيلمدەردى تىزبەلەپ كورەيىكشى... «اكاتسيا ايالداماسىندا» ۆانگتىڭ، «بەتپەردەلى بەس كىسى» فيلمىندە ا ق ش اسكەرىنىڭ، «قالتارىستاعى كوشەلەر» تەلەحيكاياسىندا وزبەك مافياسىنىڭ ءرولىن، «امەريكالىقتار قاراتەڭىزدە» فيلمىندە لي تينگ اتتى اگەنتتىڭ ءرولىن سومدادى. «گ. و. ر. ا» فيلمىندە جاپون مەحمەتتى جانە «الا كولەڭكە قاراڭعىلىقتا» تاكتۋك، «ناپاقادا» ۆانگ لي رولدەرىن وينايدى. ءتىپتى، ايگىلى اراشتىڭ بەينەبايانىنا دا ءتۇسىپتى. بىلتىر كۇزدە عانا جارىققا شىققان «ەكى دوس» فيلمىندە قانداسىمىزعا باستى ءرول بۇيىرعان. مۇندا دا قىتايلىق كاسىپكەر رولىندە.

islam.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى