شىعىس قازاقستان مەكتەپتەرىندە تاعى دا ساباق توقتاتىلدى

مامانداردىڭ مالىمەتىنشە، 29 گرادۋس ايازعا بايلانىستى ريددەر قالاسىندا 1-11-سىنىپ جانە كوللەدج- ليتسەيلەردىڭ 1-2-كۋرس وقۋشىلارى ءۇشىن 1-2-اۋىسىمدارداعى ساباقتار توقتاتىلدى.

وسكەمەندە 37 گرادۋس اياز، كوكپەكتى اۋدانىندا 40 گرادۋس، شەمونايحا اۋدانىندا 36 گرادۋس، زىرياندا 39 گرادۋس، اياگوزدە 34 گرادۋس، جارما اۋدانىندا 34 گرادۋس، بەسقاراعاي اۋدانىندا 31, تارباعاتاي اۋدانىندا 31 گرادۋس، ءۇرجار اۋدانىندا 35 گرادۋس اياز بولۋىنا بايلانىستى مەكتەپ وقۋشىلارى مەن كوللەدج- ليتسەيلەردىڭ 1-2-كۋرس وقۋشىلارى ءۇشىن ەكى اۋىسىم بويىنشا دا ساباقتار كەيىنگە قالدى. سەمەي مەن كۋرچاتوۆ قالالارىندا 35-36 گرادۋس ايازعا بايلانىستى تەك ءبىرىنشى اۋىسىمدا وقيتىن وقۋشىلار ءۇشىن ساباقتار وتپەيتىن بولدى.

«قازگيدرومەتتىڭ» مالىمەتىنشە، 27 - قاڭتار كۇنى وڭىردە اۋا تەمپەراتۋراسى كۇندىز 24-29 گرادۋس، تۇندە 35-40 گرادۋس ايازعا دەيىن تومەن بولادى. سولتۇستىك- شىعىستان جانە شىعىستان سوققان جەلدىڭ جىلدامدىعى سەكۋندىنا 9-14 مەترگە دەيىن جەتەدى.

ەسكە سالا كەتەيىك، شىعىس قازاقستان جانە پاۆلودار وبلىستارىندا 26 - قاڭتار كۇنى دە مەكتەپ جانە كوللەدج وقۋشىلارى ءۇشىن ساباقتار بولماعان ەدى. اۋا تەمپەراتۋراسىنىڭ 29 گرادۋستان 41 گرادۋسقا دەيىن تومەندەۋى سەبەپتى سەمەي، ريددەر، وسكەمەن، كۋرچاتوۆ قالالارى مەن اياگوز، شەمونايحا، بورودۋليحا، جارما، قاتونقاراعاي، ۇلكەن نارىن اۋداندارىندا 1-11 - سىنىپ وقۋشىلارى، سونىمەن قاتار كوللەدجدەردىڭ 1-2 كۋرس ستۋدەنتتەرى ءۇشىن ساباقتار وتپەدى. پاۆلوداردا 26 - قاڭتاردا اۋا تەمپەراتۋراسى 35 گرادۋسقا دەيىن تومەندەدى.

وسىعان بايلانىستى ءبىرىنشى اۋىسىمدا وقيتىن 1-9 - سىنىپ وقۋشىلارى ساباقتان بوساتىلدى. 26 - قاڭتاردا استانادا دا ايازعا بايلانىستى مەكتەپتەردە جانە كوللەدجدەردىڭ تومەنگى كۋرستارىندا ساباقتار بولمادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى