قىزىلوردادا تۇرعىن ءۇي قۇرىلىسى ءۇش ەسەگە ارتادى
ايتا كەتەيىك، بۇل تۇرعىن ءۇيدىڭ قۇرىلىسى «سامۇرىق-قازىنا» جىلجىمايتىن مۇلىك قورىنىڭ قارجىلاندىرۋىمەن قاراشا ايىندا باستالعان بولاتىن. بۇل تۋرالى وبلىستىق اكىمدىكتىڭ باسپا ءسوز قىزمەتى حابارلادى.
«قولجەتىمدى باسپانا-2020» مەملەكەتتىك باعدارلاماسى اياسىندا سالىناتىن باسپانانىڭ ءار شارشى مەترى 131537,4 تەڭگە شاماسىندا بولادى.
قوردىڭ باسشىلىعى قۇرىلىس جۇمىستارىن ساپالى جۇرگىزىپ، نىساندى مەرزىمىنەن بۇرىن تاپسىرامىز دەيدى.
- بۇل باعدارلامانىڭ ارتىقشىلىقتارى كوپ. باسپانا كەزەگىندە تۇرعانداردىڭ جالاقىلارى تالاپقا ساي كەلسە، بولعانى. قىزىلوردادا ءبىر شارشى مەترىنە ايىنا 1200 تەڭگە تولەيدى. ءبىر ءۇي 30 شارشى مەتر بولاتىن بولسا، ايىنا 30 مىڭ تەڭگەدەن استام قارجى تولەيتىن بولادى، - دەدى «سامۇرىق- قازىنا» جىلجىمايتىن مۇلىك قورى» ا ق باسقارما ءتوراعاسى ب. پالىمبەتوۆ.
بۇگىنگى كۇنى اتالمىش قور قىزىلوردادان باسقا استانا، الماتى مەن قاراعاندى، شىمكەنت، اقتاۋ جانە وسكەمەن قالالارىندا تۇرعىن ءۇي قۇرىلىسىنىڭ جوبالارىن ىسكە اسىرۋدا. وسى باعدارلاما اياسىندا 2016 - جىلدىڭ اياعىنا دەيىن ەلىمىزدە قوسىمشا 600 مىڭ شارشى مەتردەن استام تۇرعىن ۇيلەر پايدالانۋعا بەرىلەتىن بولادى.
جەرگىلىكتى باسشىلىق تۇرعىن ۇيگە مۇقتاج وتباسىلاردى باسپانامەن قامتاماسىز ەتۋ ماقساتىندا «قازاقستان يپوتەكالىق كومپانياسى» «سامۇرىق-قازىنا» جىلجىمايتىن مۇلىك قورى» اكسيونەرلىك قوعامىمەن بىرلەسكەن جۇمىستاردى ودان ءارى جالعاستىرماق. ماسەلەن، ساۋلەت شاعىن اۋدانىنان تاعى جالپى اۋدانى 3,3 گەكتار جەر تەلىمى ءبولىنىپ، «قازاقستان يپوتەكالىق كومپانياسى» ا ق ارقىلى 9 بەس قاباتتى تۇرعىن ءۇي بوي كوتەرەدى. باسقارما ءتوراعاسى جەر تەلىمىنىڭ ورنىن بارىپ كوردى. قالا اكىمى ن. نالىبايەۆ جاڭا تۇرعىن ءۇيدىڭ قۇرىلىستارى كوكتەمدە باستالاتىنىن ايتتى. جاقىن ارادا قۇرىلىسى باستالاتىن تۇرعىن ءۇيدىڭ جوبالىق قۇنى 4,2 ميلليارد تەڭگە. بۇل 490 وتباسىن جاڭا باسپانامەن قامتاماسىز ەتۋگە مۇمكىندىك بەرەدى.
جالپى، وتكەن جىلى 900 گە جۋىق وتباسى باسپانالى بولدى. بيىل تۇرعىزىلاتىن تۇرعىن ءۇي وتكەن جىلمەن سالىستىرعاندا ءۇش ەسەگە ارتادى.
