مۇناي باعاسى ارزانداي تۇسۋدە
بۇعان ساۋد ارابياسىنىڭ جاڭا باسشىسى سالمان يبن ابدەل-ءازيز ءال ساۋدتىڭ «قارا التىن» ءوندىرىسىن بۇرىنعى دەڭگەيدە ۇستاپ تۇرۋ شەشىمى سەبەپ بولۋدا، دەپ حابارلادى ر ي ا نوۆوستي.
ماسكەۋ ۋاقىتى بويىنشا 7.07 دەگى جاعداي بويىنشا سولتۇستىكتەڭىزدىك Brent قوسپاسىنا ناۋرىز ايىنداعى فيۋچەرستەر قۇنى 0,95 پايىزعا دەيىن تومەندەپ، باررەلىنە 48,33 دوللاردى قۇرادى. WTI ماركالى جەڭىل مۇنايىنا ناۋرىز ايىنداعى فيۋچەرستەر قۇنى 1,13 پايىزعا تومەندەپ، باررەلىنە 45,08 دوللاردى قۇرادى.
ساۋدتىڭ التىنشى كورولى ابداللا وتكەن اپتادا 91 جاسىندا دۇنيەدەن وزىپ، ونىڭ ورنىن ءىنىسى سالمان باستى، ول بۇرىنعى باسشىنىڭ جۇرگىزگەن ساياساتىن ودان ءارى جالعاستىراتىنىن مالىمدەگەن. مۇنىڭ اياسىندا مۇنايدىڭ الەمدىك باعاسى كوتەرىلگەن بولاتىن، الايدا كەيىنىرەك ينۆەستورلاردىڭ قاۋىپتەنۋىنە اكەلگەن نارىقتاعى «قارا التىننىڭ» شەكتەن تىس مولايۋى باعانىڭ ودان ءارى قۇلدىراۋىنا سەبەپ بولدى.
«2008 - جىلعى قارجى داعدارىسى كەزەڭىندەگى مولشەردەن دە اسىپ تۇسكەن قوردىڭ جينالۋ جىلدامدىعىن تومەندەتۋ ءۇشىن الدىمەن مۇناي ءوندىرىسىن باياۋلاتۋ قاجەت. ساۋد ارابياسىنىڭ نارىعى وتكەن اپتادا بۇعان زورعا دەن قويعانىنا قاراماستان، شەشىم وزگەرىسسىز قالدى. سەبەبى كورول سالمان بۇل پىكىرىنەن اينىماي وتىر» ، - دەپ مالىمدەدى بلۋمبەرگ اگەنتتىگىنە Samsung Futures Inc تالداۋشىسى حون سۋن كي.
و پ ە ك-تىڭ ءىرى ءوندىرۋشى ەلى ساۋد ارابياسى مۇنايعا الەمدىك باعانىڭ تومەندەۋى اياسىندا مۇناي ءوندىرۋدى قولداۋدى ۇيىمداستىرۋ ستراتەگياسىن ۇستانادى، وسىلايشا نارىقتاعى ءوز ۇلەسىن ساقتاعىسى كەلەدى. ۆەنەسۋەلا سياقتى شاعىن ءوندىرۋشى ەلدەر، كەرىسىنشە، شارالار قابىلداۋعا، «قارا التىننىڭ» قۇنىن ۇستاپ تۇرۋعا ۇندەۋدە.
