پەتروپاۆلداعى مۇسىلماندار قاسيەتتى ءماۋلىت مەرەكەسىن ورىس دراما تەاترىندا اتاپ ءوتتى
وعان رەسەي فەدەراتسياسى مەن قازاقستان قالالارىنان كەلگەن قوناقتار قاتىستى.
ءماۋلىت سالاۋات نامازىن وقۋدان باستالدى. ءدىني قىزمەتكەرلەر قۇراننان ءۇزىندى ايتىپ، پايعامبار تۋرالى باياندادى. قۇدايدىڭ ەلشىسى مۇحاممەد پايعامباردىڭ تۋعان كۇنىن يسلام ءدىنى پايدا بولعان سوڭ 300 جىلدان كەيىن تويلانا باستادى. ناقتى كۇن بەلگىسىز. سوندىقتان ءماۋلىت مەرەكەسى ءبىر اي اتالىپ وتىلەدى.
«ءماۋلىت ايىندا قۇراندى بىلەتىندەر وسكەلەڭ ۇرپاققا مۇحاممەد پايعامبار قالاي ءومىر سۇرگەنىن، قانداي ىستەرگە شاقىرعانىن ايتۋ كەرەك. يسلام - ۇلكەنگە قۇرمەت، كىشىگە ىزەت كورسەتىپ، ءاردايىم ءادىل جانە ادال بولۋعا شاقىراتىن ءدىن. قۇرمەتتى سولتۇستىك قازاقستاندىقتار، مەرەكە قۇتتى بولسىن!» - دەدى « قىزىلجار» ورتالىق مەشىتىنىڭ باس يمامى كەنجەتاي دۇيسەنباي.
وبلىس اكىمى ەرىك سۇلتانوۆتىڭ اتىنان جيىلعان مۇسىلمان قاۋىمىن ونىڭ ورىنباسارى انارحان دۇيسەنوۆا قۇتتىقتادى.
شاراعا جيىلعاندار اقىندار ايتىسىنا ءتانتى بولدى. تەاتردا كەلگەن قوناقتارعا داستارحان جايىلدى.
