يتالياندىقتار «استانا وپەرا» ونەرىن جوعارى باعالادى- فوتو
الەۋمەت ارتىستەر بيلەگەن كەزدە ولاردىڭ تەحنيكالىق دەڭگەيىنە عانا ەمەس، سونداي- اق اكتەرلىق شەبەرلىگىنە، ۇلتتىق ەرەكشەلىككە تاڭداي قاقتى. كلاسسيكالىق نومەرلەرمەن قاتار گالادا، ك. كۇمىسبەكوۆتىڭ مۋزىكاسىنا قويىلعان ع. بورىبايەۆانىڭ حورەوگرافياسىنداعى «ءبيشى قايىڭ» جانە ن. ا. تىلەنديەۆتىڭ مۋزىكاسىنا قويىلعان ز. رايبايەۆتىڭ حورەوگرافياسىنداعى «اتا تولعاۋى» بيلەرى بار. يتالياندىق كورەرمەن وزدەرى ءۇشىن تاڭسىق قازاق بيلەرىنىڭ ورىندالۋىن ۇلكەن قىزىعۋشىلىقپەن قاداعالاپ، جارقىراعان كوستيۋمدەرگە كوز تويدىرۋمەن بولدى.
جاس ارتىستەر - حالىقارالىق كونكۋرستاردىڭ لاۋرەاتتارى ايگەرىم بەكەتايەۆا مەن ەركىن راحمەتوللايەۆ «اققۋ كولى» بالەتىندەگى نومەرلەرىن تاماشا ورىنداپ شىقتى. ۆ. ۆاينونەننىڭ حورەوگرافياسىنداعى «جاڭعاق شاققىش» بالەتىنەن اداجيو ۇسىنعان ق ر ەڭبەك سىڭىرگەن قايراتكەرى تايىر گاتاۋوۆ پەن نازەركە ايمۇحامەدوۆاعا كورەرمەن كوپكە دەيىن قوشەمەت كورسەتىپ، جىبەرمەدى. ۆ. سولوۆيەۆ- سەدويدىڭ «تاراس بۋلبا» بالەتىنەن گوپاك ورىنداعان ەركىن راحمەتوللايەۆ، ارمان ورازوۆ، سەرىك ناقىسپەكوۆ پەن ەلدار سارسەمبايەۆ الەۋمەتكە ەرەكشە جالىن، كوڭىل كۇي سىيلادى. ا. اداننىڭ «جيزەل» بالەتىنەن Pas de deux ورىنداپ شىققان ق ر ەڭبەك سىڭىرگەن قايراتكەرى گاۋھار ۋسينا مەن حالىقارالىق كونكۋرستاردىڭ لاۋرەاتى دوسجان تابىلدى كورەرمەننىڭ ىستىق ىقىلاسىنا بولەندى.
گالا بالەتتىڭ باعدارلاماسىن «قىپشاقتار ءبيى» - ا. ءبوروديننىڭ «يگور كنياز» وپەراسىنان كورىنىس اياقتادى. ترۋپپا بارىن سالىپ بيلەدى. سوليستەر بىرنەشە مارتە تاعزىم ەتىپ، گۇلىن جاۋدىرعان كوپشىلىكتىڭ ءار نومەر سايىن شاپالاعى تولاستاعان جوق. كونسەرتتەن كەيىن ولار قولتاڭبالارىن تاراتىپ، باسپا ءسوز وكىلدەرىمەن جۇزدەسىپ جاتتى.
تاڭدانىسىن جاسىرماعان يتالياندىق پاولو مارينو ەسىمدى كورەرمەن «استانا وپەرا» ترۋپپاسىنىڭ ساپارى گەنۋيا قالاسى ءۇشىن شىنىمەن دە ماڭىزدى وقيعا ەكەنىن اتاپ ءوتتى. - «ءبىز بۇگىن كاسىبي تۇرعىدا شىڭدالعان ۇجىمدى تاماشالادىق دەپ ەسەپتەيمىن، قازىر ءبىز كوبىنە مودەرندى تاماشالايتىندىقتان، بۇل بىزدە سيرەك قويىلادى، كوپتەن بەرى ساعىنىپ جۇرگەن كلاسسيكالىق بالەتتەن ءبىراز سۋسىندادىق»، - دەدى ول.
بالەتقۇمار تەرەزا گرەكو «استانا وپەرا» ترۋپپاسىنىڭ ونەرىنە وسىمەن ەكىنشى رەت كۋاگەر بولعانىن ايتادى. «وتكەن كەشتە مەن «سپارتاك» سپەكتاكلىن تاماشالادىم، بيشىلەردىڭ دەڭگەيى جاقسى، ارتىستەر قاتارىن بۇزعان جوق، نىق- نىق جانە ءتۇزۋ قيمىلدادى. بۇگىن مەن گالا بالەتتە بولدىم، قازاق ءبيى ءبىز ءۇشىن بۇرىن- سوڭدى كورمەگەن ونەر ەكەنىن ايتقىم كەلەدى، كەرەمەت ەكەن. قىمبات كوستيۋمدەر، ۇلتتىق ناقىشتار، ءسان- سالتاناتقا كوزىڭ تويمايدى. ترۋپپانىڭ شەبەرلىگىندە ءمىن جوق، مەن ءتانتى بولدىم! «استانا وپەرا» ۇجىمىنا بۇگىنگى كەش ءۇشىن العىسىمدى بىلدىرگىم كەلەدى»، - دەدى ت. گرەكو.
