تەننيس: زارينا دياس الەمنىڭ ەكىنشى راكەتكاسى ماريا شاراپوۆادان ايلاسىن اسىرا المادى

اتالمىش ماتچتى ەۋرو سپورت تەلەارناسى تىكەلەي ەفيردەن كورسەتتى. ءۇش پارتياعا سوزىلعان الدىڭعى ويىندا ويدا- جوقتا ۇتىلىپ قالا جازداعان م. شاراپوۆانىڭ بۇل جولى اسا جيناقى شىققانى بىردەن بايقالدى.

 ءبىرىنشى پارتيادا ءۇش برەيكتى ۇتقان رەسەيلىك تەننيسشى 6:1 ەسەبىمەن جەڭىسكە جەتتى. ەكىنشى پارتيادا زارينا قارسىلاسى دوپ بەرگەن كەزدە ءساتتى ويناپ، ءبىر برەيكتى پايدالانا ءبىلدى. الايدا بۇدان كەيىنگى التى بىردەي گەيمدە م. شاراپوۆا جەڭىسكە جەتتى. ءسويتىپ بۇل پارتيا دا 6:1 ەسەبىمەن اياقتالدى. زارينا كەيبىر تۇستاردا قاراپايىم قاتەلىكتەرگە بوي الدىردى. ونىڭ ايتارلىقتاي قارسىلىق كورسەتە الماۋىنا مۇنىڭ الدىندا ءۇش پارتياعا سوزىلعان ەكى كەزدەسۋ مەن كەشەگى وڭتۇستىك افريكالىق شانەل سحەپەرسپەن بىرگە ويناعان جۇپتىق ماتچ تا سەبەپ بولعان سياقتى. دەگەنمەن ز. دياستىڭ بيىل دا اۆستراليا چەمپيوناتىنىڭ ءۇشىنشى اينالىمىنا دەيىن جەتۋىن جاقسى تابىس دەپ ەسەپتەۋگە بولادى.

م. شاراپوۆا ءتورتىنشى اينالىمدا بۇگىن يا. شۆەدوۆانى ۇتقان قىتاي قىزى پەن شۋايدىڭ شاماسىن بايقاپ كورەدى. ەگەر م. شاراپوۆا مەن تاعى ءبىر رەسەيلىك ەكاتەرينا ماكاروۆا الداعى ويىندارىن ءساتتى وتكىزسە، جارتىلاي فينالدا ءوزارا شەبەرلىك بايقاسادى. سوندا كەمىندە ءبىر رەسەيلىك تەننيسشى فينالعا شىعادى. م. شاراپوۆا بۇل تۋرنيردى 2008 - جىلى ۇتقان بولاتىن.

اۆتور: ەلجان ەرالى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى