جاپونيا ءوز ازاماتىن لاڭكەس ايەلگە ايىرباستاۋ ارقىلى قۇتقارۋى مۇمكىن
بۇل تۋرالى جاپونيانىڭ پرەمەر- ءمينيسترى سيندزو ابە جاريا ەتتى دەپ حابارلايدى NHK تەلەارناسى.
«ءبىز ءۇشىن ەڭ ءبىرىنشى قۇندىلىق - ول ادام ءومىرى. سوندىقتان ءبىز يوردانيا بيلىگىمەن وسى ماسەلە جونىندە بىرگە جۇمىستار اتقارىپ جاتىرمىز»، - دەدى پرەمەر- مينيستر. بيلىك ەكىنشى تۇتقىننىڭ ولتىرىلگەندىگىن جوققا شىعارۋ نەگىزسىز دەپ وتىر. پرەمەر- مينيستر لاڭكەستەردىڭ تۇسىرگەن بەينەجازباسى شىنايى بولۋ مۇمكىندىگى زور ەكەنىن دە اتاپ ءوتتى.
ايتا كەتەيىك، 24 - قاڭتاردان 25 - قاڭتارعا قاراعان ءتۇنى لاڭكەستەر ءتىرى قالعان كەندزي گوتو قولىنا ولتىرىلگەن ارىپتەسىنىڭ سۋرەتىن ۇستاپ تۇرعان ەكىنشى بەينەجازبانى جاريالاعان بولاتىن. بەينەجازبادا گوتو ارىپتەسى يۋكاۆانىڭ ولىمىنە جاپونيانىڭ پرەمەر- ءمينيسترى سيندزو ابەنى ايىپتاپ، وتباسىن بيلىك قولىنا تابىستاپ، ونىڭ ومىرىنە قاستاندىق جاسايتىنداي قاتەلىك جاساماۋىن وتىنەدى.
بۇعان دەيىن «يسلام مەملەكەتى» توبىنىڭ لاڭكەستەرى ولتىرىلگەن ءتىلشى حارۋنا ياكاۆانىڭ فوتوسۋرەتى مەن ەكىنشى تۇتقىن كەندزي گوتونىڭ «يسلام مەملەكەتىنىڭ» جاڭا تالاپتارىن ءتۇسىندىرىپ وتىرعان جاڭا بەينەجازباسىن جاريا ەتكەن ەدى. لاڭكەستەر جاپون بيلىگىنە يوردانيا بيلىگىمەن كەلىسىپ، سول ەلدىڭ تۇرمەلەرىنىڭ بىرىندە قاماۋدا وتىرعان سادجيدا ار- ريشاۆي ەسىمدى لاڭكەس ايەلدى بوساتۋىن تالاپ ەتىپ وتىر.
ەستەرىڭىزگە سالا كەتەيىك، 20 - قاڭتاردا ولار ەكى جاپون ازاماتىن تۇتقىنعا الىپ، تىلشىلەر ءۇشىن 200 ميلليون ا ق ش دوللارى كولەمىندە قۇن تالاپ ەتكەن بولاتىن. لاڭكەستەر توكيوعا اتالعان سومانى تولىق وتەۋلەرى ءۇشىن 3 تاۋلىك بەرگەن. ال قۇن وتەلمەگەن جاعدايدا تۇتقىنداردىڭ كوزىن جوياتىندىقتارىنا ءسوز بەرگەن ەدى. 23 - قاڭتاردا «يسلام مەملەكەتىنىڭ» جاپون بيلىگىنە قويعان بۇل ۋلتيماتۋمىنىڭ مەرزىمى ءوتىپ كەتكەن ەدى.
www.24.kz
