فينالدا - ءبىر-اق قازاق قالدى

كەشە كەشكىسىن AIBA APB جوباسىنىڭ العاشقى چەمپيوندىق اتاقتارىن ساراپقا سالاتىن، 10 سالماق دارەجەسىندەگى بوكسشىلار جۇبىن جاريالادى. سولاردىڭ اراسىندا بىزدەن تەك 60 كەلى سالماق دارەجەسىندەگى بەرىك ءابدىراحمانوۆ بار ەكەن. بۇل تۇرعىدا ءبىراز ەل بىزدەن اسىپ ءتۇسىپتى.

ەندى، قاي ەلدەن قانشا بوكسشى فينالعا شىعاتىنىنا نازار اۋدارايىق:

رەسەي - 4 بوكسشى

تۇركيا - 2

گەرمانيا - 2

قىتاي - 2

قازاقستان - 1

وزبەكستان - 1

يتاليا - 1

مەكسيكا - 1

فرانسيا - 1

ارگەنتينا - 1

يران - 1

ماروككو - 1

ماۆريكي - 1

كەنيا - 1

ارينە، بۇل - جاڭا جوبانىڭ العاشقى ماۋسىمى. سوندىقتان ءبىزدىڭ باپكەرلەر بۇعان مەيىلىنشە كوپ كوڭىل بولمەگەن بولار. بالكىم، ءالىپتىڭ ارتىن باعۋدى ءجون ساناعان دا شىعار.

ايتسە دە... فينالعا ءبىر-اق بوكسشىمىزدىڭ شىققانى قىنجىلتادى. نەگىزى، 81 كەلى سالماق دارەجەسىندەگى ادىلبەك نيازىمبەتوۆتىڭ فينالعا شىعاتىن ءجونى بار ەدى. الايدا ول جاراقاتىنا بايلانىستى شارشى الاڭنان تىس قالدى...

49 كەلىدەگى ءبىرجان جاقىپوۆتىڭ دا فينالدا اتوي سالاتىنداي قابىلەتى بار-تىن. ءبىراق فينالدا ەكى بىردەي قىتاي بوكسشىسى ايقاساتىن بولىپتى. دۇرىس پا، بۇرىس پا، تورەلىگىن ايتا المايمىز...

52 كەلىدە باق سىناعان ءىلياس سۋلەيمەنوۆتى دە «فينالدا كورەتىن بولارمىز» دەپ ۇمىتتەنگەنبىز. ەندى «فينالعا مەكسيكا بوكسشى ەمەس، نەگە ءبىزدىڭ ءىلياس شىقپادى» دەگەن وكىنىش وزەگىمىزدى ورتەيدى.

باسقاسى باسقا، ءبىراق ءوزىمىز ەل ىشىندە «قازاقتىڭ سالماعى» اتاپ كەتكەن 69 كەلى سالماق دارەجەسىندە بىردە-ءبىر كۇرزى جۇدىرىقتى جىگىتىمىزدىڭ جوقتىعى جانىمىزعا باتادى... 69 كەلىنىڭ فينالىندا تۇركيا تارلانى مەن كەنيا قىرانى ايقاسادى. قازاق جوق...

ەندى تەك APB جوباسىنىڭ ەكىنشى بولىگىنە ۇمىتپەن قارايمىز. سەبەبى بوكستان قازاقستان ۇلتتىق قۇراماسىنىڭ باس باپكەرى مىرزاعالي ايتجانوۆ «كوكتەمگى بولىگىندە بار كۇش-جىگەرىمىزدى سالامىز» دەگەن بولاتىن...

اۆتور: نۇرعازى ساسايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى