اۆستراليا بىرىنشىلىگىندە ز. دياس پەن ي. شۆەدوۆا ءوزارا سىنعا تۇسە الا ما؟
بىردەن ايتايىق، بۇل جەردە، اسىرەسە، زاريناعا اسا مىقتى قارسىلاس تاپ بولىپ وتىر. الەمدىك رەيتينگتە كوش باستاۋشىلاردىڭ ءبىرى، رەسەيلىك ماريا شاراپوۆا - تەننيس تاريحىندا ءتورت بىردەي ۇلكەن دۋلىعا تۋرنيرىن (اۆسترالياعا قوسا ا ق ش اشىق بىرىنشىلىگى، ۋيمبلدون، رولان گارروس) ۇتقان ساناۋلى سپورتشىلاردىڭ ءبىرى. قازىردەن-اق ۇلىلاردىڭ قاتارىنا قوسىلعان ماريا - قيىن ساتتەردىڭ وزىنەن جول تابا بىلەتىن، شەبەرلىگى كەمەل تەننيسشى.
ءبىراق ونىڭ دا سۇرىنەتىن كەزى بولادى. بيىلعى اۆستراليا چەمپيوناتىنىڭ العاشقى كەزدەسۋلەرىندە وزىمەن بۇرىن جولىعىسپاعان «جۇمباق» سپورتشىلارمەن شەبەرلىك بايقاسقان ول ەكىنشى اينالىمدا وتانداسى الەكساندرا پانوۆادان ۇتىلىپ قالا جازدادى. ەكى ماتچبولىن پايدالانا الماعان ا. پانوۆانى ازەر دەگەندە جەڭىپ، ءۇشىنشى اينالىمعا شىقتى. بۇل م. شاراپوۆانىڭ وزىنە جاقسى ساباق بولعانداي. ەندى سودان قورىتىندى شىعارىپ، ءوزى بۇرىن كەزدەسپەگەن قازاقستاننىڭ ءبىرىنشى راكەتكاسى، جيىرما ءبىر جاسار زارينا دياستىڭ ويىنىن باپكەرى ەكەۋى تالقىلاپ، ماتچ تىزگىنىن بىردەن قولعا الۋعا تىرىساتىنى انىق.
زاريناعا كەلسەك، ونى ءبىر-اق جىلدىڭ ىشىندە شىرقاۋ بيىككە كوتەرىلگەن تەننيسشىلەردىڭ ءبىرى دەۋگە ابدەن بولادى. ەگەر وتكەن جىلعى اۆستراليا اشىق چەمپيوناتىنىڭ الدىندا ز. دياس دۇنيەجۇزىلىك رەيتينگتە نەبارى 152- ورىندا تۇرسا، قازىر ول - الەمنىڭ 31- راكەتكاسى. وسى ورلەۋ جولىن ءدال وتكەن جىلعى اۆستراليا جارىسىنان باستادى. ىرىكتەۋ سايىستارىنان كەيىن چەمپيوناتتىڭ ءۇشىنشى اينالىمىنا دەيىن جەتكەن قازاق قىزىن (ز. دياس قازىردىڭ وزىندە سول تابىسىن قايتالاپ وتىر) رۋمىنيالىق، بۇگىندە الەمنىڭ ءۇشىنشى راكەتكاسى سيمونا حالەپ توقتاتا الدى. كەيىن ۋيمبلدون تورىندە ءتورتىنشى اينالىمدا تاعى دا وسى س. حالەپ ز. دياستىڭ جولىنا تۇردى. وتكەن جىلى ا ق ش- تىڭ اشىق بىرىنشىلىگىندە ءۇشىنشى اينالىمعا دەيىن بارعان زارينانى رەسەيلىك ەكاتەرينا ماكاروۆا ءارى قاراي جىبەرمەسە، رولان گارروستا چەحيالىق پەترا كۆيتوۆا العاشقى سىننان اسىرمادى. بۇلاردىڭ ءبارى - كوش باسىنداعى، الدىڭعى وندىقتىڭ ىشىندە كەلە جاتقان مىقتى ويىنشىلار.
زارينانىڭ ءوزى دە وتكەن جىلدى تۇيىندەگەن ساتتە ماريا شاراپوۆاداي اتاقتى تەننيسشىلەرمەن كەزدەسۋگە دايىن ەكەندىگىن مالىمدەگەن بولاتىن. تايسالاتىن نەسى بار، سونىڭ ءساتى بۇگىن تۋىپ تۇر. ونىڭ ۇستىنە م. شاراپوۆا مەن ز. دياستىڭ ماتچىن ۇيىمداستىرۋشىلار اۆستراليا چەمپيوناتىنىڭ باستى كورتى - رود لەيۆەر الاڭىندا ءتورتىنشى كەزەككە قويىپ وتىر. بۇل - كەزدەسۋدى تورتكۇل دۇنيە كورەدى دەگەن ءسوز. مۇندا، ارينە، بولجاۋشىلاردىڭ ءبارى دەرلىك م. شاراپوۆا جەڭەتىنىن ايتۋدا. دەگەنمەن، ەگەر قازاق قىزى عايىپتان تايىپ شەبەرلىگى اسىپ، اتى شۋلى قارسىلاسىن جەڭىپ كەتىپ جاتسا، وندا تاعى ءبىر قازاقستاندىق ياروسلاۆا شۆەدوۆا نەمەسە قىتايلىق پەن شۋايدىڭ بىرەۋىمەن ءتورتىنشى اينالىمدا جولىعىسادى. ياعني قوس قازاقستاندىق تەننيسشىنىڭ ءوزارا سىنعا ءتۇسۋى دە مۇمكىن.
دۇنيە جۇزىلىك ساتىدا 66- ورىندا تۇرعان ءيا. شۆەدوۆا مەن الەمنىڭ 21- راكەتكاسى پ. شۋايدىڭ كەزدەسۋى 2- كورتتا ءبىرىنشى بولىپ وتەدى. پ. شۋاي - م. شاراپوۆاداي ازۋلى بولماسا دا، قىتاي ەلىنىڭ وسى چەمپيوناتتا قالعان جالعىز ءۇمىتى. سوندىقتان ول دا بارىن سالادى. قازاقستاندىقتار ءبىرىنشى اينالىمدا الەمنىڭ 16- راكەتكاسى، چەحيالىق ليۋسي شافارجوۆانى ۇتقان ياروسلاۆاعا ءۇمىت ارتادى.
چەمپيونات. كوم سايتىنان الىنعان مالىمەتكە قاراعاندا، ايەلدەر جارىسىندا ءۇشىنشى اينالىمعا وتكەندەر اراسىندا ا ق ش- تىڭ ءباسى باسىم. قالعان ۇزدىك 32 ويىنشىنىڭ جەتەۋى - امەريكاندىق، تورتەۋى - چەحيالىق. سولاردىڭ ىشىندە الەمنىڭ ءبىرىنشى راكەتكاسى، امەريكاندىق، ۇلكەن دۋلىعا تۋرنيرىن جەكەلەي سىندا 18 مارتە ۇتقان سەرەنا ۋيليامس جولىنداعىلاردىڭ ءبارىن جايپاپ كەلە جاتسا، باس جۇلدەدەن ۇمىتكەرلەر قاتارىندا سونداي-اق رەسەيلىك م. شاراپوۆا، رۋمىنيالىق س. حالەپ، چەحيالىق پ. كۆيتوۆا، پولياك اگنەشكا رادۆانسكا، كانادالىق ەجەني بۋشار، سلوۆاكيالىق، اۆستراليا چەمپيوناتىنىڭ وتكەن جىلعى فيناليسى دومينيكا سيبۋلكوۆانى اتاۋعا بولادى.
بۇلاردىڭ قاتارىنا كەشە الەمنىڭ سەگىزىنشى راكەتكاسى، دانيالىق، تەگى پولياك، كەزىندە ءوزى دە كوش باستاعان كارولينا ۆوزنياتسكيدى تىزە بۇكتىرگەن بەلورۋسسيالىق، اۆستراليا چەمپيوناتىن 2012 جانە 2013-جىلدارى ەكى مارتە ۇتقانىمەن، وتكەن جىلعى ساتسىزدىكتەر اياعىنا تۇساۋ بولىپ، سودان ەندى عانا ايىعىپ كەلە جاتقان ۆيكتوريا ازارەنكو قوسىلدى. دەمەك، باس جۇلدە بىرەۋ، ۇمىتكەر بارشىلىق. سوندىقتان وسال قارسىلاس جوق، بۇل - وسى ايدىڭ اياعىندا مارەگە جەتەتىن اۆستراليا چەمپيوناتى كۇن سايىن قىزا تۇسەدى دەگەن ءسوز.
اۆتور: ەلجان ەرالى
