ەلوردالىق «استانا وپەرا» بالەتىنىڭ ارتىستەرى يتالياندىقتاردىڭ زور قوشەمەتىنە بولەندى - فوتو

گەنۋيادا 21- قاڭتاردا بولعان «سپارتاك» بالەتتىك سپەكتاكلىنىڭ العاشقى كورسەتىلىمىندە ەكى جارىم مىڭنان استام كورەرمەن ۇزاق قول شاپالاقتاپ، قوشەمەت كورسەتتى.

سيۋجەتتىڭ قالاي وربىگەنىن، ارتىستەر شەبەرلىگىن مۇقيات قاداعالاپ وتىرعان كوپشىلىك باقتيار ادامجانعا (سپارتاك) ەرەكشە ىقىلاس ءبىلدىردى. شاپالاعىن اياماعان الەۋمەت، ونىڭ ۇلكەن تالانت يەسى ەكەنىن ايتىپ جاتتى. ەكىنشى قۇرامدا سپارتاكتى دوسجان تابىلدى سومدايتىنىن ايتا كەتەيىك، كراستى ق ر ەڭبەك سىڭىرگەن قايراتكەرى تايىر گاتاۋوۆ ورىنداسا، فريگيا - ق ر ەڭبەك سىڭىرگەن قايراتكەرى ءمادينا باسپايەۆا، ال ەكىنشى كۇنى انەل رۇستەموۆا بيلەيدى، ەگينا - ق ر ەڭبەك سىڭىرگەن قايراتكەرى - گاۋھار ۋسينا، ال ەكىنشى قۇرامدا ايگەرىم بەكەتايەۆا ورىندايدى. بالەتتىڭ بۇل جەتىستىگىنە ءوزىنىڭ اسقان شەبەرلىگىن پاش ەتكەن كوربەدالەتتىڭ قوسقان ۇلەسى دە مول.

«مەن ارتىستەردىڭ ونەرىنە قايران بولدىم. قويىلىم كەرەمەت، بالەت تاماشا. باستى پارتيانى ورىنداعان بيشىلەر اسقان شەبەر ەكەن. ءبىز «استانا وپەرا» تەاترىمەن ىنتىماقتاستىق قۇرۋعا مۇددەلىمىز جانە تەك بالەت ترۋپپاسىنا عانا ەمەس، سونداي-اق وپەرالىق ترۋپپاسىنا دا قىزىعىپ وتىرمىز»، - دەيدى ويىمەن بولىسكەن «كارلو فەليچە» تەاترىنىڭ ديرەكتورى ماۋريتسيو روي.

يتالياندىق بالەت سۇيەر قاۋىم افيشانى قالت جىبەرمەي قاداعالاپ كەلگەنىن ايتادى. «بۇل ەكى شارانى نازاردان تىس قالدىرۋعا بولمايدى. بۇگىن ءبىز «استانا وپەرا» بالەتتىك ترۋپپاسى ۇسىنعان ءبيدىڭ كەرەمەتتىگىنەن شەكسىز ءلاززات الدىق. وسى ارقىلى ءبىز قازاق ترۋپپاسىنىڭ دەڭگەيىمەن تانىستىق. ارتىستەردىڭ تەحنيكالىق مۇمكىندىگىنە، ولاردىڭ اكتەرلىق شەبەرلىگىنە ءتانتى بولدىق. وسى كەشتەن كەيىن «سپارتاكتىڭ» ءالى دە وزەكتى ەكەنىن سەنىمدى تۇردە ايتا الامىز. ءبىز 23- قاڭتاردا وتەتىن «گالا بالەتكە» دە بارماقشىمىز، نەگە دەسەڭىز، ۇلتتىق بالەتتى دە تاماشالاعان وتە قىزىق بولىپ تۇر، سونىمەن قاتار جاس بالەت ترۋپپاسىنىڭ ۇلى كلاسسيكتەردىڭ جاۋھارلارىن قالاي ورىندايتىنىن دا كورسەك دەيمىز».

«كارلو فەليچە» تەاترىنىڭ ارت ديرەكتورى، ماەسترو دجۋزەپپە اكۆاۆيۆا ترۋپپانىڭ گەنۋياعا كەلۋى، قوس تەاتر اراسىنداعى ىنتىماقتاستىقپەن بايلانىستى ەكەنىن اتاپ ءوتتى. - كەشە گەنۋيالىق تەاتردىڭ وركەسترىنە ايدار ءابجاھانوۆ ديريجەرلىك ەتتى، ال حور ماەسترو پابلو اسسانتەنىڭ جەتەكشىلىگىمەن ونەر كورسەتتى. قازاقستاندىق ترۋپپانىڭ بۇگىندە بىزدە ونەر كورسەتۋى - مادەني ىنتىماقتاستىقتىڭ كورسەتكىشى.

گاسترول بارىسىندا فويە تەاترىنا قويىلعان «ەكسپو-2017» ەكسپوزيتسيالارى باستى وقيعاعا اينالدى. كورمەنىڭ تاقىرىبى - «بولاشاق ەنەرگياسى».

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى