ۇشاق اپاتىنان امان قالعان قىزىمىز ءبىزدى تانىدى - ومارحان شاياحمەت ۇلى

«قىزىمىزدىڭ جاعداي اۋىر ءبىراق، تۇراقتى. ءبىزدى تانىدى. ءالسىز، ارينە. قازىر عانا وتا جاسالدى. تاڭەرتەڭ ءبىزدى ءبولىم مەڭگەرۋشىسى قابىلدادى. كەلەسى وتاعا قان قاجەت دەپ ايتتى. «قازاقمىس» قىزمەتكەرلەرى تاپسىرىپ ۇلگەرىپتى. استانا قالاسىنىڭ دەنساۋلىق ساقتاۋ باسقاراماسى كوپ ءىس تىندىرىپ جاتىر. ولارعا ريزاشىلىعىمدى ايتامىن. سەمەيگە 2012-جىلى كوشىپ كەلگەنبىز. ءبىزدىڭ ۇلىمىز اسكەري قىزمەتكەر، سول جاقتان بولمە العان. سوندا تۇرىپ جاتىرمىز. اسەم شەمونايحادا باس گەولوگ بولىپ ىستەدى. سودان سوڭ بالحاشقا قونىس اۋداردى. «قازاق مىستا» 5 جىل قىزمەت اتقاردى. ول كۇيەۋگە شىقپاعان. قۇداي بار، ەندى وندا جاڭا ءومىر باستالادى، ەڭ باستىسى ول - ءتىرى»، - دەدى ول.

«قىزىم بىزگە ءبىر توپ قىزمەتكەرلەرمەن كەن وشاعىنا بارا جاتقانىن حابارلادى. ءبىز تاڭەرتەڭگى ساعات 4-5 شاماسىندا الاڭداي باستادىق، سەبەبى ول ءار ساعات سايىن حابارلاسىپ، جاعدايىمىزدى سۇراپ وتىراتىن. ءبىراق ودان حابار جوق. كەيىن 7-8 ساعات شاماسىندا جاڭالىقتاردان كەن وشاعىنا بارا جاتقان ۇشاقتىڭ قۇلاعانىن ەستىدىك. ءبىر جولاۋشى ءتىرى قالدى دەدى. وسىدان سوڭ ءبىز ينتەرنەت ارقىلى جاڭالىقتاردى باعىپ وتىردىق، سول جەردەن قىزىمىز تۋرالى اقپارات تاپتىق. ول ءبىر قۇدىرەتتىڭ كۇشىمەن ءتىرى قالعان. 6 ادام كوز جۇمدى، ول جەتىنشى ادام امان قالىپتى. ءتىرى قالىپ قانا قويماي، ءبىر مەترلىك ومبى قاردان سىنعان اياقتارىمەن قاردىڭ استىنان ۇيالى تەلەفونىن تاۋىپ الىپ، توتەنشە جاعدايلار قىزمەتىن شاقىرتقان»، - دەيدى ول بۇگىن استانادا تىلشىلەرگە بەرگەن سۇحباتىندا.

ايتا كەتەيىك، بۇگىن تاڭەرتەڭ اسەم استاناعا ءنومىرى 1- قالالىق اۋرۋحاناسىنا جەتكىزىلگەن بولاتىن.

20- قاڭتاردا جامبىل وبلىسى شۋ اۋدانىندا بالقاش- شاتىركول باعىتىنا بەت العان «وليمپ-ەير» كومپانياسىنىڭ ا ن-2 ۇشاعى اپاتقا ۇشىراعان. سونىڭ ىشىندە «قازاقمىس» كورپوراتسياسىنىڭ «بالقاش ءتۇستى مەتالل» گەولوگى اسەم شاياحمەتوۆا دا بولعان. اپاتتان كەيىن ول دەرەۋ «112» تەلەفونى بويىنشا قۇتقارۋ قىزمەتىنە حابارلاسىپ ۇلگەرگەن. وقيعا ورنىنا كەلگەن جامبىل وبلىسى ت ج د جەدەل دەن قويۋ بريگاداسى اۋە اپاتىنان جالعىز امان قالعان جولاۋشىنى شۋ قالاسىنداعى ورتالىق اۋداندىق اۋرۋحاناعا جەتكىزگەن.

اۆتور: جاسۇلان جولدىبايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى