عارىشتىق بايلانىس جۇيەسى ەل دامۋىنا تىڭ سەرپىن بەرەدى
عارىشتىق كەڭىستىكتە قازاقستاننىڭ «قازسات-2» جانە «قازسات-3» جاساندى جەرسەرىكتەرى بار. وسىنىڭ ارقاسىندا ەلىمىز بايلانىس جۇيەسى سالاسىندا تولىققاندى تاۋەلسىز. ءتىپتى كورشىلەس مەملەكەتتەردىڭ سۇرانىسىن دا قاناعاتتاندىرۋعا قاۋقارلى.
ايتا كەتۋ كەرەك، ت م د ەلدەرى اراسىندا جاساندى جەر سەرىگى قازاقستان، رەسەي جانە ءازىربايجان ەلدەرىندە عانا بار.
ۆيكتور لەفتەر، «رەسپۋبليكالىق عارىشتىق بايلانىس ورتالىعى» ا ق- نىڭ پرەزيدەنتى:
- ءبىزدىڭ كومپانيا وتكەن جىلى تەك 10 جىلدىعىن اتاپ ءوتتى. دەگەنمەن، وسى ارالىقتا عارىش بايلانىسىن دامىتۋ باعىتىندا قىرۋار جۇمىس اتقارىلدى. بۇگىندە ءبىزدىڭ قىزمەتكەرلەر شەتەلدىك مامانداردىڭ كومەگىنسىز- اق ءوز ەركىمەن دەربەس جۇمىس ىستەي الادى. ياعني قازاقستاندا بۇل باعىتتا ءتيىستى توپ جاساقتالدى دەۋگە تولىق نەگىز بار.
بۇل توپ استانادان 100 شاقىرىم جەردە جۇمىس ىستەيدى. 2005 - جىلى اقكول قالاسىنىڭ ىرگەسىندە عارىش اپپاراتىن باسقاراتىن جانە بايلانىس جۇيەسىن ساراپتايتىن ءبولىم قۇرىلدى. ال وتكەن جىلى الماتى قالاسىندا ءدال وسىنداي قوسىمشا ورتالىق جاساقتالدى. بۇگىندە قازاقستان الدىندا دامىعان 30 ەلدىڭ قاتارىنان كورىنۋ مەجەسى تۇر.
البەتتە، بۇل جەردە عارىش سالاسىنداعى جەتىستىكتەر دە ەسكەرىلەدى. قازاقستان وسى باعىتتا اتقارعان قىرۋار جۇمىستىڭ ارقاسىندا قازىردىڭ وزىندە الپاۋىت ەلدەر ساپىندا.
باۋىرجان قۇدابايەۆ، «رەسپۋبليكالىق عارىشتىق بايلانىس ورتالىعى» ا ق- نىڭ ۆيتسە- پرەزيدەنتى:
- ەلباسىمىز قازاقستان 30 دامىعان مەملەكەتتىڭ قاتارىنا كىرۋ جوسپارىن قويعان. قازىرگى زاماندا ءبىزدىڭ 2 جەرسەرىگىمىز بار. سول جوسپاردى ورىنداپ وتىرمىز. عارىش توبى بار مەملەكەتتەر از، ءبىز سول 15 مەملەكەتتىڭ قاتارىندامىز. عىلىم مەن تەحنيكا دامىعان زاماندا جاساندى جەرسەرىكتەرىنىڭ كومەگىمەن كوپتەگەن عىلىمي جاڭالىقتاردى اشۋعا بولادى. باسقاشا ايتقاندا، عارىشتىق بايلانىس سالاسى - يننوۆاتسيانىڭ تەمىرقازىعى.
وسى جەتىستىكتەرمەن قازاقستاننىڭ عارىش سالاسى شەكتەلمەك ەمەس. قازىردىڭ وزىندە «قازسات-4» اپپاراتىن قۇراستىرۋ ءۇشىن ماماندار زەرتتەۋ، زەردەلەۋ جۇمىستارىنا كىرىسكەن. ول قۇرىلعىنى بەرىك ءارى زامان تالابىنا ساي ەتۋ - باستى ماقسات.
اۆتورلارى: دوستىق تالعات ۇلى، جاسۇلان اڭقوجانوۆ
