جامبىل وبلىسىندا قىتايلىق كومپانيامەن بىرلەسكەن جەل ەلەكتر ستانساسى سالىنادى
ءشانشي پروۆينتسياسىندا وتكەن ەكىجاقتى كەزدەسۋدە وبلىستىڭ ەكونوميكالىق مۇمكىندىكتەرىن كورسەتەتىن 30 دان استام ينۆەستيتسيالىق جوبا ۇسىنىلعان بولاتىن. قىتايلىق كاسىپكەرلەر اسىرەسە «جاسىل ەكونوميكا» مەن جەر استى قازبا بايلىقتارىن ءوندىرۋ سالالارىنا قىزىعۋشىلىق تانىتقان.
«قىتاي- قازاقستان» دوستىق پەن ىنتىماقتاستىق كەرۋەنى شەڭبەرىندە XINGHUO ءشانشي ىسكەرلىك كورپوراتسياسى وبلىس ەكونوميكاسىنا ءىرى كولەمدە ينۆەستيتسيا سالاتىنىن مالىمدەگەن. ال يانلين ۇلگىلى اۋىلشارۋاشىلىق ايماعى كوميتەتىمەن جامبىل وبلىسىندا جوعارى تەحنولوگيالى اگرارلىق- يننوۆاتسيالىق پاركىن قۇرۋ تۋرالى كەلىسىم جاسالدى. ورگانيكالىق جەمىس- جيدەكتەر مەن كوكونىستەردى ءوندىرۋ جانە قايتا وڭدەۋ، ەت جانە ءسۇت ونىمدەرىن شىعارۋ، مال شارۋاشىلىق كاسىپورىندارى كلاستەرىن قۇرۋ جونىندە ىنتىماقتاستىققا قول قويىلدى. اگرارلىق سەكتوردى دامىتۋعا باعىتتالعان بۇل جوبالار الداعى 3 جىلدا جۇزەگە اسۋى ءتيىس.
الماس ماديەۆ، وبلىستىق كاسىپكەرلىك جانە يندۋستريالدى- يننوۆاتسيالىق دامىتۋ باسقارماسىنىڭ باسشىسى:
- وبلىسىمىزعا جالپى كولەمى 400 ميلليون ا ق ش دوللارى كولەمىندە ينۆەستيتسيا تارتامىز دەگەن ويىمىز بار. مەموراندۋم ءتۇزىلىپ، وعان قاجەتتى قۇجاتتارعا قول قويىلدى. ونىڭ ىشىندە ءبىرىنشى جوبا - بىرلەسكەن جەل ەلەكتر ستانساسىن سالۋ جانە تۋريزمدى دامىتۋ. ءشانشي پروۆينتسياسى مەن ءبىزدىڭ وبلىس اراسىنداعى ۇلى جىبەك جولىن وسىلايشا جاڭعىرتپاقپىز. ساياحاتشىلار وسى جوبا اياسىندا تاريحي جادىگەرلەردى ارالاپ، مادەنيەتىمىزبەن ەتەنە تانىسۋعا مۇمكىندىك الادى.
