الماتى وبلىسىنىڭ اكىمى ايتىسكەر اقىنعا كولىك مىنگىزدى
كەزدەسۋدە «نۇر وتان» پارتياسىنىڭ ۇيىمداستىرۋىمەن ءوتىپ كەلە جاتقان «التىن دومبىرا» رەسپۋبليكالىق اقىندار ايتىسىنىڭ 2014 -جىلعى جەڭىمپازى بالعىنبەك يماشەۆقا جەڭىل اۆتوكولىكتىڭ كىلتى تابىس ەتىلىپ، وسى ايتىستا 1 - ورىن العان جانداربەك بۇلعاقوۆقا 1 ميلليون تەڭگە قارجىلاي سىياقى بەرىلدى،
دەپ حابارلادى وبلىس اكىمىنىڭ باسپا ءسوز قىزمەتىنەن.
كەزدەسۋ بارىسىندا وبلىس اكىمى ا. باتالوۆ الداعى ۋاقىتتا مادەنيەت سالاسىندا اۋقىمدى جۇمىستاردىڭ اتقارىلاتىندىعىن مالىمدەدى.
- كىتاپحانا - ءبىزدىڭ بايلىعىمىز، ءبىزدىڭ تاريحىمىز. سول ءۇشىن دە قالامىزدا جاڭا ۇلگىدەگى كىتاپحانا سالۋ ماسەلەسىدە ويىمىزدا بار. مادەنيەت سالاسىندا جۇمىس ىستەپ جۇرگەن جاس اكتەرلەردى دە جەكە تۇرعىن ۇيمەن قامتۋ ماسەلەسىن قولعا الاتىن بولامىز. تەاترعا قوسىمشا شتاتتىق بىرلىك بەرۋ، وڭىردە دانەش راقىشيەۆ اتىنداعى مۋزىكا سىنىبىن اشۋدى، جۇمىس ىستەپ تۇرعان ونەر مەكتەبىنە عيمارات سالۋعا مۇمكىندىگىنشە قولداۋ كورسەتىلەتىن بولادى. بۇدان باسقا ەلدى مەكەندەردەگى جەكەشەلەنىپ كەتكەن مادەنيەت ۇيلەرىن مەملەكەتكە قايتارۋ جونىندەگى جۇمىستاردى جۇيەلى جۇرگىزۋدى ءوڭىر اكىمدەرىنە تاپسىرامىن، - دەدى ا. باتالوۆ ءوزىنىڭ سوزىندە.
سونىمەن قاتار، وبلىس اكىمى مادەنيەت سالاسىندا قوردالانىپ قالعان ماسەلەلەردىڭ شەشىلۋ جولدارىن قاراستىرىپ، ونەر ۇجىمدارىنىڭ ساحنالىق كيىمدەرى مەن شىعارماشىلىق جۇمىستارىنا كەڭىنەن توقتالدى. اۋىلدىق ەلدى مەكەندەردە حالىقتىق ۇجىمداردى دامىتۋ مەن كەلەر ۇرپاقتى مادەني ءوسىرۋدىڭ ءتيىمدى جولدارىن قاراستىرۋ ماسەلەرى ءسوز بولدى.
جيىندا، تەاتر، مادەنيەت ۇيلەرىنىڭ وكىلدەرى، جازۋشىلار مەن كىتاپحانا قىزمەتكەرلەرى ءسوز الىپ، وزدەرىنىڭ ويلارىمەن ءبولىستى.
مادەنيەت سالاسىنداعى سان جىلعى ەلەۋلى ەڭبەكتەرى ءۇشىن ءبىرقاتار ازاماتتارعا وبلىس اكىمىنىڭ «قۇرمەت گراموتاسى» ، ق ر مادەنيەت جانە سپورت مينيسترلىگىنىڭ «مادەنيەت سالاسىنىڭ ۇزدىگى» جانە «كىتاپحانا سالاسىنىڭ ۇزدىگى» توسبەلگىلەرى تابىستالدى.
شارا بارىسىندا مادەنيەت سالاسىنداعى جۇمىستاردىڭ ءوسۋ دەڭگەيىن كورسەتەتىن كورمە ۇيىمداستىرىلىپ، ارنايى بەينەروليك كورەرمەندەر نازارىنا ۇسىنىلدى.
جيىنعا اۋدان، قالا اكىمدەرى، اۋداندىق، قالالىق مادەنيەت جانە تىلدەردى دامىتۋ بولىمدەرىنىڭ باسشىلارى، اۋداندىق مادەنيەت ۇيلەرىنىڭ ديرەكتورلارى مەن كوركەمدىك جەتەكشىلەرى، اۋداندىق كىتاپحانا ديرەكتورلارى مەن ادىسكەرلەرى، مۋزەيلەر مەن مۇراعات ديرەكتورلارى قاتىستى.
