ەۋرازيالىق ەكونوميكالىق وداق - تەڭدەسى جوق بىرلەستىك - ەۋروپالىق ساراپشىلار

ەۋروپالىق ساراپشىلاردىڭ پىكىرى وسىعان سايادى، دەپ حابارلادى www.24.kz.

قۇرامىنا قازاقستان، رەسەي، بەلارۋس جانە ارمەنيا ەلدەرى كىرەتىن ۇيىم 180 ميلليون تۇتىنۋشىنى قامتىپ وتىر.

بۇل تاقىرىپ بريۋسسەل قالاسىندا وتكەن بەلگيا- ليۋكسەمبۋرگ ساۋدا-ونەركاسىپ پالاتاسىنىڭ كونفەرەنتسياسىنا ارقاۋ بولدى. بەلگيانىڭ بريۋسسەل قالاسىندا باس قوسقان بىرنەشە ەلدىڭ كاسىپكەرلەرى، ساراپشىلارى مەن ۇكىمەت مۇشەلەرى «ەۋروپالىق جانە ەۋرازيالىق ەكونوميكالىق وداقتاردىڭ ساۋدا- ەكونوميكالىق قارىم- قاتىناسى» تاقىرىبى توڭىرەگىندە اڭگىمە قوزعادى.

«الەم كارتاسىندا پايدا بولعان ەۋرازيالىق ەكونوميكالىق وداق 180 ميلليون ادامدى قامتىپ وتىر. بۇل - وتە مىقتى ۇيىم. ەندى ونىڭ اياسىن ودان ءارى كەڭەيتۋ قاجەت»، دەدى بەلگيانىڭ سىرتقى ساۋدا جونىندەگى ءمينيسترى، مەملەكەتتىك حاتشى: پيتەر دە كرەم.

جيىن بارىسىندا قوس ۇيىمنىڭ ارىپتەستىگى جان- جاقتى تالقىلاندى. قاتىسۋشىلاردىڭ ايتۋىنشا، اراداعى الىس- بەرىستى ارتتىرۋعا بىرلەسكەن جوبالار كوپىر بولماق. بۇل ەڭ الدىمەن ەكى وداق تۇتىنۋشىلارىنىڭ جاعدايىن جاقسارتادى.

- قازاقستان - بەلگيا مەن ەۋروپانىڭ سەنىمدى سەرىكتەسى. سىزدەردە ينۆەستورلارعا جول اشىق. سوندىقتان دا ءبىزدىڭ كاسىپكەرلەر ءوز جوبالارىن قازاقستاندا جۇزەگە اسىرعىلارى كەرەك. بۇل تۇستا ەۋرازيالىق ەكونوميكالىق وداقتىڭ ءرولى وراسان، دەپ اتاپ ءوتتى «BEKAERT» كومپانياسى ديرەكتورلار كەڭەسىنىڭ ءتوراعاسى بەرت دە گراۆە.

كارى قۇرلىقتىڭ كاسىپكەرلەرى ەۋرازيالىق ەكونوميكالىق وداقتىڭ جۇمىسىنا ۇلكەن سەنىم ءبىلدىرىپ وتىر جانە ۇيىمعا مۇشە ەلدەرمەن بايلانىس ورناتۋعا ىنتالى ەكەندەرىن جەتكىزدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى