ءبىزدىڭ جاستاردىڭ اراسىندا بيلل گەيتس سياقتى يننوۆاتورلار، اباي قۇنانباي ۇلى سياقتى فيلوسوفتار ءجۇر - ءا. جاقسىبەكوۆ - فوتو
بۇل تۋرالى ەلوردا اكىمدىگىنىڭ باسپا ءسوز قىزمەتىنەن حابارلادى. كەزدەسۋ بەيرەسمي جاعدايدا ءوتتى. شارانىڭ تىزگىنىن دە وقۋشىلار ءوز قولدارىنا الدى.
جاس فيزيكتەر، ماتەماتيكتەر، ينفورماتيكتەر، ارحيتەكتورلار، سۋرەتشىلەر، ەكولولوگتار مەن سپورتشىلار ەلوردا باسشىسىنا وزدەرىنىڭ تابىستارى مەن جەتىستىكتەرى جايىندا اڭگىمەلەپ، بولاشاق جوسپارلارىمەن ءبولىستى.
اكىم قىزىققا تولى كەزدەسۋ ءۇشىن بالالارعا العىسىن ءبىلدىرىپ، كوپتەگەن سۇراقتارىنا جاۋاپ بەردى. جانە سپورتپەن، دەنە شىنىقتىرۋمەن شۇعىلدانۋ ولاردىڭ دەنساۋلىعى مەن قالىپتى دامۋىنا اسەرى مول ەكەنىن ەستەرىنە سالدى.
قالا اكىمى جاس كوشباسشىلاردى قول جەتكىزگەن ناتيجەمەن شەكتەلمەي، ودان ءارى العا باسۋعا شاقىردى.
«ءبىزدىڭ جاستاردىڭ اراسىندا بيلل گەيتس سياقتى يننوۆاتورلار، اباي قۇنانباي ۇلى سياقتى فيلوسوفتار، قانىش ساتبايەۆ سياقتى عالىمدار، مۇحتار اۋەزوۆ سياقتى جازۋشىلار ءجۇرۋى مۇمكىن.
سەندەردىڭ وقىپ، ءبىلىم الۋلارىڭ ءۇشىن، جەتىلىپ، دامۋلارىڭ ءۇشىن بارلىق مۇمكىندىكتەر جاسالىپ جاتىر. ەلباسىنىڭ تاپسىرماسىنا سايكەس بىرەگەي وقۋشىلار سارايى سالىندى، ءبىلىم بەرۋ گرانتتارىنىڭ سانى ارتتى، شاكىرتاقىنىڭ كولەمى ۇلعايدى، الەمدىك دەڭگەيدەگى ۋنيۆەرسيتەت بوي كوتەردى، ينتەللەكتۋالدى مەكتەپتەر سالىندى، «بولاشاق» باعدارلاماسى قابىلداندى، بۇل باعىتتا ءالى دە قىرۋار جۇمىستار جۇرگىزىلە بەرەتىن بولادى.
سەندەر - ءبىزدىڭ ەلوردانىڭ جارقىن وكىلىسىڭدەر، ەل سەندەرمەن ماقتانۋى كەرەك. بۇگىنگى تاڭدا 67 مىڭنان استام استانالىق وقۋشىلار ءتۇرلى دەڭگەيدەگى عىلىمي-شىعارماشىلىق سايىستار مەن وليمپيادالارعا قاتىسۋدا. استانا قالاسىنىڭ وقۋشىلارىنان قۇرالعان توپ 7 جىل قاتارىنان ءبىرىنشى ورىندار مەن اتاقتارعا يە بولىپ كەلەدى. وعان قوسا، جاقىندا وتكەن و. جاۋتىكوۆ اتىنداعى حالىقارالىق وليمپيادادا ءبىزدىڭ بالالار ماتەماتيكا مەن فيزيكا، ينفورماتيكادان جۇلدەلى ورىندارعا يە بولدى. سەندەردىڭ بولاشاقتارىڭنىڭ جارقىن بولۋى - بۇل قالامىزدىڭ، تۇتاس ەلىمىزدىڭ بولاشاعىنىڭ جارقىن بولۋى دەگەن ءسوز»، - دەدى ول.
ءسوز سوڭىندا ءا. جاقسىبەكوۆ «سەندەرگە تەك ساتتىلىك پەن جەڭىستەر تىلەيمىن!» - دەپ جاس جەتكىنشەكتەرگە ءوز تىلەگىن ءبىلدىردى.
