سىن نەلىكتەن نامىسىمىزعا تيەدى؟
قان قىسىمى كوتەرىلۋگە بەيىم ادامداردىڭ بىردەن قانى باسىنا شاۋىپ، جۇرەگى سوعىپ، كوزى قاراۋىتىپ كەتەتىن كەزدەرى دە بولادى. مۇندايدا فلەگماتيككە قىزىعاسىز: ماڭعازدانىپ، ويلانىپ-تولعانعانشا ۋاقىت ءوتىپ كەتەدى. ال مەلانحوليكتى سىن كۇيزەلىسكە تۇسىرمەسە بولعانى.
سىندى قالاي قابىلداۋ كەرەك؟
«سىن تۇزەلمەي، ءمىن تۇزەلمەيدى» دەمەكشى، سىننىڭ دا سىنى بار. دەگەنمەن سىن ايتىلعان بويدا اقتالۋعا نە ۇرسىسا كەتۋگە دايىن تۇرماعانىڭىز ءجون. جەڭىلىپ قالدىم دەپ ويلاماڭىز. ودان دا تەرەڭ تىنىس الىپ، ءوزىڭىزدى سابىرعا شاقىرىڭىز. وسى ايتىلعان سىننىڭ سىزگە كەلتىرەتىن پايداسىن ويلاڭىز. ءسىز مۇنداي جاعدايدا ۇتىلمايسىز، كەرىسىنشە ۇتاسىز. وسى جاعدايدى باسقا ءبىر ادامداردىڭ اراسىندا بولعانىن ەلەستەتىپ كورىڭىز. ەگەر سىن ءسىزدىڭ جەكە باسىڭىزدى كەمىتۋگە (مىسالى، مۇرنىڭ پۇشىق، كوزىڭ قىسىق دەگەن سەكىلدى) باعىتتالماسا، سىننىڭ %50 ىن دۇرىس دەپ قابىلداۋعا بولادى. الداعى ۋاقىتتا مۇنى ەسكەرە الاسىز. سوندىقتان سىنشىنىڭ سوزدەرىن تارازىلاپ، كەيبىر ءسوزى تۇسىنىكسىز بولسا، انىقتاپ سۇراڭىز. مۇنداي قارىم-قاتىناس سىنشىنى دا ويلاندىرادى. ول دا ءوزىنىڭ ەت قىزۋمەن ايتقان سوزدەرىنە كەشىرىم سۇراۋى مۇمكىن.
ەگەر سىن مۇلدە ادىلەتسىز ايتىلسا، وعان دا قام جەمەڭىز، الگى ادامنىڭ ىشكى پسيحولوگيالىق قايشىلىقتارىنان تۋىنداعان شىعار، سول سەبەپتى ءمان بەرمەۋگە تىرىسىڭىز.
سىندى قالاي ايتۋ كەرەك؟
بىرىنشىدەن، بىرەۋگە سىن ايتار الدىندا ءوزىڭىزدى سول ادامنىڭ ورنىنا قويىپ كورىڭىز. ول سىننىڭ پايدالى جاعى بار ما؟ الدە كەتكەن ەسەڭىزدى قايتارۋ ءۇشىن سىناپ وتىرسىز با؟
البەتتە سىن ايتىلۋ كەرەك، ءبىراق ەلدىڭ كوزىنشە بىرەۋدىڭ جەر-جەبىرىنە جەتۋ ەتيكاعا جاتپايدى.
ەكىنشىدەن، سىننان دۇرىس قورىتىندى شىعارىپ، جاعدايدىڭ وزگەرەتىنىنە سەنىمدى بولساڭىز عانا ايتىڭىز. ابدەن ادەتكە ءسىڭىپ كەتكەن جايتتى تۇزەتەم دەپ بەكەرگە اۋرە بولماعان ابزال. مىسالى، ۇنەمى جۇمىسقا كەشىگىپ كەلەتىن ارىپتەسىڭىزدىڭ ءمىنىن تۇزەتۋگە اكىمشىلىك قانا قۇقىلى. ادىلەتتىلىك ورناتام دەپ جۇيكەڭىزدى توزدىرىپ، ۋاقىتىڭىزدى جۇمساماڭىز.
ۇشىنشىدەن، ديپلوماتيالىق ساياساتتى مەڭگەرىڭىز: الدىمەن كىسىنىڭ جاقسى جاعىن، سودان كەيىن بىرتىندەپ، سىنعا كوشىڭىز. سۇحباتتاسىڭىز ءسىزدىڭ قامقورلىعىڭىزدى سەزىنگەنى دۇرىس.
تورتىنشىدەن، سىنىڭىزدى تۇسىنىكتى تۇردە ناقتى ايتىڭىز.
بىرەۋدىڭ جاقسى قىلىعىنا، ىسىنە قۋانىڭىز. «بىتكەن ىسكە سىنشى كوپ» بولاتىنى جادىڭىزدا بولسىن.
massaget.kz
