كەشە «امەريكاشا توناۋ» فيلمى كورەرمەندەرگە جول تارتتى - كەسكىن
ا ق ش پەن رەسەيلىك بۇل فيلم ساريك اندرەاسيان جەتەكشىلىگىمەن ءتۇسىرىلدى. باستى رولدەردە حەيدەن كريستەنسەن، ەدريان بروۋدي، دجوردانا بريۋستەر، ەيكون، توري كيتتلز اتتى اكتەرلەر وينايدى.
دجەيمس اتتى جىگىت جاڭا ءومىر باستاعالى از ۋاقىت ءوتتى. جاڭا جۇمىس تاۋىپ، جاڭا ماقسات قويعان دجەيمس ءوزىنىڭ بۇرىنعى عاشىعىن كەزدەستىرەدى. ءدال سول ۋاقىتتا ونىڭ جالعىز باۋىرى اباقتىدان شىعادى. وسى ساتتە ءبارى وزگەرەدى...
دجەيمس بۇرىنعى ادەتىنە قايتا سالىنعان اعاسىنا اقىل قوسۋعا تىرىسادى.
فيلم دراما، بويەۆيك، تريللەر جانرىندا ءتۇسىرىلدى. مۇندا ماحاببات، سۇيىسپەنشىلىك، باۋىرمالدىق، رەنىش سۋرەتتەلەدى.
فيلم جەتەكشىسىنىڭ باستى ماقساتى - كورەرمەندى تاڭعالدىرۋ. بۇل تۋىندىدا رەجيسسەر ءوز دەگەنىنە جەتتى دەگەن ويدامىن.
الايدا، بۇل ورايدا كەمشىلىكتەر دە جوق ەمەس.
بىرىنشىدەن، توناۋدى ۇيىمداستىراتىن كەيىپكەرلەردى ناعىز پروفەسسيونال، جاۋىز ەتىپ بەينەلەگەن. الايدا، ارەكەتكە كەلگەندە ولار ءبىراز قاتەلىكتەر جاسايدى.
ەكىنشىدەن، سەناري تولىق ويلاستىرىلماعان سەكىلدى. سەبەبى، كەيبىر جەرلەردە جەتىسپەۋشىلىكتەر ايقىن كورىنەدى. تۇلعالار، اكتەرلىك ويىنعا قاراپ، وسىنداي تۇجىرىم جاساۋعا تۋرا كەلەدى. اڭگىمە ناقتى نە جايىندا ەكەنىن فيلمدى كورگەندە بايقايسىزدار.
ۇشىنشىدەن، كەز كەلگەن «كريمينال» جانرىندا تۇسىرىلەتىن فيلمنىڭ بەلگىلى ءبىر ۇستانىمدارى بار. ادەتتە، بانك توناۋ الدىندا ۇرىلار ءبىر ەمەس بىرنەشە جوسپار ۇيىمداستىرادى. بۇل تۋىندىدا ايگىلى «ب پلانى» اتىمەن جوق.
بۇل جاقتاردى ەسكەرمەگەندە، فيلم جاقسى دەڭگەيدە تۇسىرىلگەن دەۋگە بولادى.
بىزگە «فورساج» مەديافرانشيزاسىنان تانىس دجوردانا بريۋستەر ءوزىنىڭ ويىنىمەن قۋانتادى. كريمينال، بويەۆيك جانرىنداعى فيلمدەردە ءوز ورنىن تاپقان اكتريسا ءدال وسى تۋىندىعا تاڭدالعانى دۇرىس دەپ ويلايمىن. ونىڭ بۇل فيلمدە ءوزىنىڭ ماڭىزدى ورنى بار. ادەتتەگى «ادەمى، باستى كەيىپكەردىڭ باسىن اينالدىراتىن قىز» بەينەسى ەمەس.
فيلمنىڭ باستى يدەياسى كريمينالدا ەمەس، درامادا جاتقان سەكىلدى. باۋىرمالدىق، اعالىق قارىم-قاتىناس، ساتقىندىق سەكىلدى ماسەلەلەر كورەرمەندى ۋايىمداتىپ تا، تولقىتىپ تا وتىرادى.
ادەتتە قىزدار بويەۆيك جانرى اتالاتىن فيلمدى اينالىپ وتەدى. الايدا، بۇل تۋىندى قىز قاۋىمىنا دا ۇنايدى دەگەن ويدامىن.
فيلم 18 جاسقا تولعان ازاماتتارعا ارنالعان.
