تالدىقورعاندا جاڭا سالتانات سارايى مەن دراما تەاتر بوي كوتەرەدى - فوتو
ايتا كەتەلىك، بيىلعى جىلى وبلىس ورتالىعى تالدىقورعان قالاسىندا جاڭادان «سالتانات سارايى»، «دراما تەاتر» مەن «كورمە كەشەنى» بوي كوتەرمەك.
وسىعان وراي، ەلىمىزدىڭ ءار ايماعىنان جيناقتالعان 10 عا جۋىق كونكۋرسقا قاتىسۋشى ارحيتەكتورلار وزدەرىنىڭ جوعارىدا اتالعان 3 عيماراتتىڭ كەشەندىك جوباسىن ازىرلەپ، كورمەگە ۇسىندى.
شارا بارىسىندا وبلىس اكىمى اماندىق باتالوۆ بايقاۋدىڭ ماڭىزدىلىعىنا توقتالدى.
- ءبىز الداعى ۋاقىتتا قالامىزدا ءبىرقاتار جاڭا عيماراتتاردى سالۋدى جوسپارلاپ وتىرمىز. جاستاردىڭ وتباسىن قۇرىپ، جاڭا ومىرگە اتتاعان قادامدارى اسەم عيماراتتان باستالعانى دۇرىس. وسى سەبەپتەن دە بىزگە «سالتانات سارايى» قاجەت.
بۇگىنگى كوميسسيا قۇرامىندا ەلىمىزدىڭ ۇزدىك ارحيتەكتورلارى قاتىسىپ وتىر. ەلباسى ن. نازاربايەۆ استانانى قالاي كورىكتى، اسەم ەتىپ تۇرعىزدى. ءبىز دە تالدىقورعاندى سولاي جاساۋعا ءتيىسپىز. بۇگىنگى كورمەدە ۇسىنىلىپ وتىرعان ءبىرقاتار ەسكيزدەر اراسىنان ءبىز تاڭداۋ جاساپ جانە كوميسسيا شەشىمىن ەسكەرە وتىرىپ قالامىزدىڭ كليماتىنا ىڭعايلى دەگەن جوبانى تاڭدايتىن بولامىز. كونكۋرسقا قاتىسۋشىلاردىڭ بارلىعى ولارعا قويىلعان قاتاڭ تالاپتاردى ساقتاي ءبىلدى. الداعى ۋاقىتتا جوبالىق- سمەتالىق قۇجاتتار ازىرلەنەتىن بولادى. سودان كەيىن قۇرىلىس جۇمىستارىن باستايمىز، - دەدى وبلىس اكىمى اماندىق باتالوۆ.
كورمەدە قازاقستان رەسپۋبليكاسى ارحيتەكتورلار وداعىنىڭ پرەزيدەنتى اقمىرزا رۇستەمبەكوۆ قۇتتىقتاۋ ءسوز سويلەپ، وبلىس اكىمى اماندىق باتالوۆ قۇرىلىس باسشىلارىنا قۇرمەت گراموتالارىن تابىس ەتتى.
