جاقىن ارالىقتا تەڭگە باعامىنىڭ كۇرت وزگەرۋى كۇتىلمەيدى - ق. كەلىمبەتوۆ

 «ءبىز ۇستانعان ايىرباس باعامىنىڭ ساياساتى ىشكى ۆاليۋتالىق دالىزدەگى بەلگىلى ءبىر وزگەرىستەردى قامتىپ وتىر. سوندىقتان دا، ءبىز ءۇشىن بۇگىنگى كۇنگى بەرىكتىك قورىنىڭ ءوزى وسى ىشكى ۆاليۋتالىق دالىزدە قالۋعا مۇمكىندىك بەرەدى»، - دەپ سانايدى ۇ ب باسشىسى.

 بۇدان بولەك، باس بانكير بۇگىنگى تاڭدا ايىرباس باعامىنىڭ ساياساتى قانداي بولۋى كەرەكتىگىنە قاتىستى ءتۇرلى بولجامدار، جورامالدار ايتىلىپ جاتقانىنا دا توقتالدى. ونىڭ پايىمىنشا، بۇنداي بولجامنىڭ باسىم بولىگى نەگىزىنەن ۇلكەن ديەۆالۆاتسيالىق وزگەرىستەردى كۇتۋدەن ورىن الىپ وتىر، ال ونداي وزگەرىستەر ەكى فاكتورعا نەگىزدەلەدى - بۇلار مۇنايعا الەمدىك باعانىڭ تومەندىگى جانە رەسەي ءرۋبلىنىڭ قۇنسىزدانۋىنا قاتىستى.

«تاعى دا قايتالاپ ايتقىم كەلەدى، مەنىڭ ويىمشا، ءبىز ءۇشىن مۇناي باعاسى ماڭىزدى فاكتور بولىپ تابىلادى. دەگەنمەن، ءبىز ايىرباس باعامىنىڭ كۇرت وزگەرىسىنە جول بەرمەيمىز»، - دەدى ق. كەلىمبەتوۆ.

 بۇل رەتتە باس بانكير بىلتىرعى جىلدىڭ جازىندا ۆاليۋتالىق ايىرباس باعامى 1 دوللارعا 170-188 تەڭگە ارالىعىندا بەلگىلەنگەنىن اتاپ ءوتتى. «وسىنداي كەڭەيتىلگەن باعام ءدالىزى بىزگە كەلەشەككە نىق سەنىممەن قاراۋعا سەپتىگىن تيگىزىپ وتىر»، - دەدى ۇ ب ءتوراعاسى.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى