ەندى كاسىپكەرلەرگە ءموردىڭ قاجەتى جوق

بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە ق ر ۇلتتىق ەكونوميكا ۆيتسە-ءمينيسترى تيمۋر جاقسىلىقوۆ ءمالىم ەتتى.

مەملەكەت باسشىسى 2014 - جىلعى 29 - جەلتوقساندا قول قويعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قازاقستان رەسپۋبليكاسىندا كاسىپكەرلىك قىزمەت ءۇشىن جاعدايدى تۇبەگەيلى جاقسارتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى زاڭى اعىمداعى جىلعى 1 - قاڭتاردان باستاپ قولدانىسقا ەندى. وسى زاڭ بويىنشا، كاسىپكەرلەر ءۇشىن بىرشاما ماسەلەلەر جەڭىلدەتىلگەن.

«جەكە كاسىپكەرلىك سۋبەكتىلەر قىزمەتىنىڭ قۇرۋ مەن جويۋعا كەلەتىن بولساق، زاڭمەن كاسىپورىنداردى تىركەۋ مەرزىمى 1 ساعاتقا دەيىن قىسقاردى جانە 100 تەڭگە كولەمىندەگى مينيمالدى جارعىلىق كاپيتالدىڭ بولۋى تۋرالى تالاپ جويىلدى. سونداي-اق، جەكە كاسىپكەرلىك سۋبەكتىلەرى ءۇشىن ءموردىڭ مىندەتتى تۇردە بولۋى تۋرالى تالاپ جويىلدى. جەكە كاسىپكەرلىك سۋبەكتىلەرىن تاراتۋ ءراسىمى ايتارلىقتاي وڭايلاتىلدى، ەندى ءوز قىزمەتىن توقتاتقان سالىق تولەۋشى تاڭداۋ قۇقىعىنا يە بولادى سالىق ورگانىنىڭ تاراتۋ تەكسەرۋىن جۇرگىزۋى نەمەسە اۋديتورلىق ۇيىمنىڭ قورىتىندى جاساۋى ارقىلى تارايدى»، - دەپ اتاپ ءوتتى ول.

سونىمەن قاتار، ۆيتسە-ءمينيستردىڭ ايتۋىنشا، مەملەكەتتىك ورگاندارمەن ءوزارا ءىس-قيمىل جاساۋدا ازاماتتاردىڭ نەگىزسىز شىعىندارىن جويۋ ماقساتىندا قۇجاتتار كوشىرمەلەرىن مىندەتتى نوتاريالدى كۋالاندىرۋ، كوممەرتسيالىق ماقساتتا پايدالانىلمايتىن، پايدالانۋ مەرزىمى 7 جىلدان اسپايتىن جەكە اۆتوكولىكتى تەحنيكالىق بايقاۋ، سونداي-اق كولىك قۇرالىن باسقارۋعا سەنىمحات جويىلدى.

اۆتور: جاسۇلان جولدىبايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى