شۆەيتساريادا دۇنيەجۇزىلىك ەكونوميكالىق فورۋم باستالدى

40 مەملەكەتتىڭ باسشىلارى مەن 2500 دەن استام دەلەگات جاھانداعى جۇمىسسىزدىق پەن قارجى داعدارىسى سىندى تۇيتكىلدەردى شەشۋ جولدارىن قاراستىرۋدا.

بۇل جولعى فورۋمدا مەملەكەت باسشىلارىنىڭ شەشىمىن كۇتىپ تۇرعان جاڭا ماسەلەلەر از ەمەس. باستى نازاردا ەۋروپا ورتالىق بانكىندەگى وزگەرىستەر مەن الەمدىك نارىقتاعى مۇناي باعاسىنىڭ قۇلدىراۋى بولىپ وتىر. ساياساتكەرلەر فورۋمدا الداعى ون جىلعا ارنالعان جالپى الەمدىك گەوساياساتقا قاتىستى تۇشىمدى پىكىرلەر مەن ءتيىمدى ۇسىنىستار ايتىلاتىنىنا سەنەدى.

«الەمدەگى جاھاندىق جاعدايدى جاقسارتۋ ءۇشىن جينالىپ وتىرمىز. بۇل فورۋمدا ەۋروپاداعى احۋال، تاياۋ شىعىس پەن سولتۇستىك افريكاداعى جاعداي تالقىلاناتىن بولادى. سونىمەن قاتار دامۋشى ەلدەردىڭ قاتارىنداعى قىتاي مەن قازىرگى امەريكانىڭ الپاۋىت ەكونوميكاسى باستى نازاردا بولماق»، - دەدى فورۋم باسشىسى فيليپپ رەسلەر.

دۇنيەجۇزىلىك ەكونوميكالىق فورۋمنىڭ نەگىزىن قالاۋشى كلاۋس شۆابتىڭ ايتۋىنشا، الەمدىك ەكونوميكانىڭ دامۋىنا اسەر ەتەتىن قىتاي ەكونوميكاسى، سونىمەن قاتار ۋربانيزاتسيا ماسەلەسى تالقىلانادى. ماسەلەن، جەر شارىنىڭ 50%- دان استام حالقى قالالاردا ءومىر سۇرەدى. كليماتتىڭ وزگەرۋى، قارجى نارىعىنداعى تۇراقسىزدىق سياقتى كوكەيتەستى ماسەلەلەر داۆوستا ورتاعا سالىناتىن بولادى. جۇمىسسىزدىق ماسەلەسى دە بۇل جيىننان تىس قالمايدى. ب ۇ ۇ- نىڭ مالىمەتى بويىنشا قازىرگى تاڭدا الەمدە 201 ميلليون ادام ەكى قولعا ءبىر كۇرەك تابا الماي ءجۇر. ۇيىم 2019 - جىلى ولاردىڭ سانى 212 ميلليون ادامعا جەتەدى، دەپ بولجام جاسايدى. سونداي- اق، الەمدە قاۋىپ ءتوندىرۋ ماسەلەسى بويىنشا ەكىنشى ورىندا تۇرعان جاھانداعى سۋ تاپشىلىعى مەن جۇقپالى اۋرۋلاردان ارىلۋدىڭ شەشىمىن ىزدەيدى.

سونىمەن قاتار، بۇل كەزدەسۋدەن كەيىن ادامزاتتىڭ الداعى ءومىرى قالاي بولاتىنى انىقتالادى. الەم ەكونوميكاسى قيىن كەزەڭدى باستان وتكەرگەلى وتىر. ارينە، بۇل جاعداي وسى جىلعى فورۋمداعى كەزدەسۋدە قاتىسۋشىلاردىڭ بارلىعىنا دا ءوز اسەرىن تيگىزبەي قويمايدى. فورۋم سەنبى كۇنىنە دەيىن جالعاسادى. ءتورت كۇن ىشىندە ونەركاسىپ، قارجى، عىلىم، يننوۆاتسيا سالاسىنداعى ءوسىم مەن تۇراقتىلىق جانە ىنتىماقتاستىق جايىندا دەلەگاتتار اراسىندا 280 نەن استام رەسمي كەزدەسۋلەر وتەدى.

ايتا كەتۋ كەرەك، بيىلعى فورۋمدى ۇيىمداستىرۋ ءۇشىن قىرۋار قارجى جۇمسالدى. وعان جۋىردا فرانك باعامىنىڭ كۇرت ءوسۋى سەبەپ بولدى. ال جۋىردا پاريجدە لاڭكەستىك ارەكەتتەن وننان استام ادام قازا تاپقاننان كەيىن فورۋم بارىسىندا داۆوستا قوعامدىق قاۋىپسىزدىك بۇرىنعىدان دا كۇشەيتىلە ءتۇستى. قالاداعى ءتارتىپتى ساقتاۋ ءۇشىن 4500 ادام جۇمىلدىرىلدى. سەبەبى جىل سايىن وتەتىن فورۋمنىڭ قورىتىندىسىمەن كەلىسپەيتىن حالىق ەرەۋىلگە شىعۋدى ادەتكە اينالدىرعان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى