رەسەيلىك قىز قازاقستاندىقتاردان كەشىرىم سۇرادى
«قۇرمەتتى وقىرماندار! ورىندى پىكىر جازعاندارعا العىس ايتامىن. وكىنىشكە وراي، تۇرعان ەلىمدە مەن تاپ بولعان دەرەكتەردى كورسەتۋ ارقىلى ەلدىڭ ەرەكشەلىكتەرىن ايتۋىم دۇرىس تۇسىندىرىلمەدى، كەيبىر جاعدايلاردا قاساقانا سولاي جاسالدى. بۇل ماقالا «ۇناتۋ ۇناتپاۋ» ماقالاسى ەمەس. مەن كەزدەسكەن، ءومىر سۇرگەن جانە جۇمىس ىستەگەن ەرەكشەلىكتەرگە باعا بەرمەدىم. باعانى قازاقستاندىقتاردىڭ وزدەرى بەرگەنى جانە وتە جاعىمسىز ماندە بەرگەنى وكىنىشتى.
مەن قازاقستانعا كەلگەن بارلىق ادامنىڭ نەگە ۇرىناتىنى تۋرالى جازدىم. مەن بايقاعان ەرەكشەلىكتەر ءتيىپ كەتىپ، رەنجىپ قالعانداردان كەشىرىم سۇرايمىن. اتى اي-دان باستالاتىن قىزداردان ارنايى كەشىرىم سۇرايمىن، ولاردىڭ ەپپل ونىمىمەن ەش قاتىسى جوق. بۇل شەت ءتىلىن مەڭگەرۋدىڭ ءادىسى سياقتى ولاردى ەسكە ساقتاۋدىڭ ءتاسىلى بولدى جانە جاقسى كومەكتەستى. ماقالانىڭ بۇرمالانعان ماندە قولدانىلا بەرۋى سەبەپتى، (ادەيى دە شىعار، ءبىراق بۇل جاعدايدى وزگەرتپەيدى) اشۋلى پىكىرلەردى توقتاتۋ ماقساتىندا رەداكسيادان ونى ءوشىرۋدى سۇرايمىن».
ەسكە سالا كەتەيىك، 16- قاڭتاردا Newslab.ru پورتالىندا كراسنويارسك قالاسىندا تۋعان تاتيانا بۋرناكينانىڭ سۇحباتى جاريالاندى. سۇحباتتا ول قازاقستان جايلى، ەلدەگى جۇمىسىنىڭ ەرەكشەلىكتەرى تۋرالى ايتىپ بەردى. الەۋمەتتىك جەلىلەردە بۇل سۇحبات سان الۋان پىكىر تۋدىردى - قازاقستاندىقتاردىڭ پىكىرى ەكىگە جارىلدى: بىرەۋلەر بۋرناكينانىڭ ارتىق ءسوز ايتقانىن، ال ەكىنشىلەرى ونىڭ سوزىندە شىندىق بار ەكەنىن جازدى.
ونىڭ سۇحباتىندا قازاق اتتارىن جاتتاۋ ادىسىنە بايلانىستى كوپتەگەن پىكىرلەر جازىلدى. سۇحباتتا ول قازاق اتتارى جايلى بىلاي دەگەن ەدى: «مەنىڭ ەستە ساقتاۋ قابىلەتىم وتە جاقسى، ءبىراق بۇل مەنىڭ قىزمەتكەرلەرىمە جاقپايدى. ال مۇندا - ايگەرىم، ايتولقىن، ايگۇل، اينۇر، جانار، الىشەر، ايدىن، تالعات، ەڭ قىزىعى قىرمىزى. تەكتەرى مەن فاميليالارىن ءتىپتى جاتتاۋعا قۇلىقسىز بولدىم. ەشقانداي اسسوتسياتسيا جوق، ادام ءوزىن تانىستىرادى، ءبىر سەكۋندتان كەيىن ونىڭ اتىن ۇمىتىپ قالامىن. نەگە ەكەنىن بىلمەيمىن، اسەل مەن مەرۋەرت قانا تۋعانىمداي بولدى. ماعان فرانسۋز باستىعىم كومەككە كەلدى. «تاتيانا، ءبارى دە وڭاي!»، - دەدى ول. «ەسكە ساقتاڭىز - ايفون، ايپاد، ايگەرىم، ايگۇل جانە كەلەسى». بۇل كومەكتەستى. ءبىراق تەكتەرىن مەن ءالى كۇنگە دەيىن بىلمەيمىن. تەك قانا اتىن ايتاتىن شەتەلدىك ادامنىڭ ءرولىن ويناپ ءجۇرمىن».
17- قاڭتاردا ەۋرازيالىق بانكتىڭ باسشىلىعى ورتا دەڭگەيدەگى جەتەكشى تاتيانا بۋرناكينانىڭ شەتەلدىك ينتەرنەت-باسىلىمىنا بەرگەن سۇحباتىن «كەلىسىلمەگەن» دەپ اتاپ، وسىعان بايلانىستى بۋرناكينا حانىممەن بانك باسشىلىعىنىڭ ەڭبەك قاتىناسىن ءۇزۋى تۋرالى شەشىم شىعارعانى حابارلاندى. بانك وكىلدەرى بۇل سۇحباتتىڭ بۋرناكينانىڭ جەكە كوزقاراسىن بىلدىرەتىنىن دە اتاپ ءوتتى. بانكتىڭ باسشىلىعى مەن قىزمەتكەرلەرىنىڭ ونىڭ پىكىرىن قولدامايتىنى جانە مۇنداي پىكىر ايتۋدى ورەسكەل دەپ سانايتىنى دا ايتىلدى.
tengrinews.kz
