ورالدا «بارىس» جوباسى بويىنشا جاڭا كەمە جاسالۋدا

«ورال «زەنيت» زاۋىتى» ا ق باس ديرەكتورىنىڭ ورىنباسارى بوگدان حومكونىڭ ايتۋىنشا، مۇنداي كەمە كاسپي تەڭىزىندە شەكارا كۇزەتى ءۇشىن قۇراستىرىلادى.

جاڭا كەمە كۇردەلى ناۆيگاتسيالىق قۇرال-جابدىقپەن، ارتيللەريالىق جانە زەنيتتىك قارۋلارمەن جاراقتاندىرىلادى. كەمەنىڭ ۇزىندىعى 42 مەتر بولسا، ءجۇزۋ جىلدامدىعى 30 ۋزەلگە دەيىن جەتەدى. سۋ ىعىستىرىمدىلىعى 240 توننانى قۇرايدى. بۇعان دەيىن «بارىس» جوباسى بويىنشا ءتورت كەمە جاسالعان بولاتىن. ولار كاسپي تەڭىزىندە ءوز قىزمەتتەرىن اتقارۋدا.

جالپى، تەك قورعانىستىق ەمەس، ازاماتتىق ماقساتتاعى ونىمدەردى دە شىعاراتىن «زەنيتتەن» «تۇلەپ ۇشقان» كەمەلەر سانى جيىرمادان استى.

ايتا كەتەيىك، وتكەن جىلى جەڭىس مەيرامىنا وراي ەكيپاجى 23 ادامنان تۇراتىن، سالماعى 250 توننالىق «سارىارقا» كەمەسى سۋعا ءتۇسىرىلىپ، كاسپيدى بەتكە العان بولاتىن. زاۋىت كەمە جاساۋ ءوندىرىسىن قازىرگى زامانعى وسكەلەڭ تالاپتارعا ساي جىل سايىن جەتىلدىرىپ كەلەدى.

اۆتور: ەلجان ەرالى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى