قۇلاعان ۇشاقتىڭ ءىرى بولشەگىن سۋدان الىپ شىعۋ وپەراتسياسى قايتا جانداندى

مەتەرەولوگيالىق باسقارمانىڭ وكىلى لۋكمان سولەح تاۋلىك بويى اۋا رايى قۇبىلمالى بولادى، الايدا كۇننىڭ العاشقى جارتىسى جاۋىن- شاشىنسىز بولادى، تولقىنداردىڭ بيىكتىگى 3 مەتردەن اسپايدى دەپ حابارلادى.

 قۇتقارۋشىلار 19 - قاڭتاردا تەڭىز تۇبىنەن 26 مەترلىك ۇشاقتىڭ ءىرى بولشەگىن شىعارۋ وپەراتسياسىنىڭ ءساتتى اياقتالاتىنىنا سەنەدى. ساراپشىلار وسى نىساننان جولاۋشىلار مەن ەكيپاج مۇشەلەرىنىڭ نەگىزگى بولىگىن تابامىز دەپ وتىر. ۇشاق بورتىندا بولعان 162 جولاۋشىنىڭ قازىرگى تاڭدا تەك 51 ءنىڭ عانا ءمايىتى تابىلدى. سوڭعى كۇندەرى ساقتالعان ناشار اۋا رايى قۇتقارۋشىلاردىڭ ەڭبەگىن ەش ەتتى. ءدال وسى ۋاقىتتا دجاكارتادا تەرگەۋ توبىنىڭ مۇشەلەرى «قارا جاشىكتىڭ» جازبالارىن زەردەلەۋدە. العاشقى قورىتىندىلار بولجام بويىنشا ءبىر اپتادان كەيىن بەلگىلى بولۋى مۇمكىن دەپ كۇتىلۋدە، الايدا رەسمي وكىلدەر ناقتى كۇن مەن بولعان وقيعانىڭ ناقتى سەبەبىن جاريالاماۋدى دۇرىس كورىپ وتىر.

 بەلگىلى بولعانى، ۇشاق يندونەزيالىق ديسپەتچەرلەر باقىلاپ وتىراتىن رادار ەكراندارىنان جوعالىپ كەتپەستەن بۇرىن ەكيپاج مۇشەلەرى داۋىلدى شەپتى اينالىپ ءوتۋ ءۇشىن بيىكتىكتى تومەندەتۋدى سۇراعان ەكەن. الايدا وتىنىشتەن باس تارتىلعان، سەبەبى ديسپەتچەرلەردىڭ ايتۋىنا قاراعاندا، باسقا ەشەلون بوس بولماعان كورىنەدى. بۇعان قاراماستان، الەمنىڭ كەز كەلگەن نۇكتەسىندەگى ۇشاقتاردىڭ قوزعالىسىن قاداعالايتىن تاۋەلسىز اۆياتسيالىق رەسۋرستار سول ۋاقىتتا ۇشاقتىڭ ماڭىندا ەشقانداي لاينەرلەردىڭ بولماعانىن ايتۋدا. كوپ ۇلتتى قۇتقارۋ وپەراتسياسىنىڭ سوڭعى مۇشەلەرى - قىتاي مەن ا ق ش- تىڭ اسكەري تەڭىز كۇشتەرى ىزدەۋ اۋدانىنداعى جۇمىستارىن اياقتادى.

 ەستەرىڭىزگە سالايىق، AirAsia كومپانياسىنا تيەسىلى ۇشاق وتكەن جىلدىڭ 28 - جەلتوقسانىندا يندونەزيالىق سۋرابايا قالاسىنان سينگاپۋرعا جول تارتقان ەدى. اۋەگە كوتەرىلگەننەن كەيىنگى 40 مينۋتتا ەكيپاج مۇشەلەرىمەن بايلانىس ءۇزىلىپ، لاينەر رادار ەكرانىنان جوعالىپ كەتكەن بولاتىن.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى