بەلگىلى ءانشى، كاسىبي رەجيسسەر زاۋرەش ەسبەرگەنوۆا دۇنيەدەن ءوتتى
كيەلى ونەرگە وزىندىك ءىز قالدىرعان كاسىبي رەجيسسەر، بەلگىلى ءانشى، «قۇرمەت» وردەنىنىڭ يەگەرى زاۋرەش ەسبەرگەن قىزى ەسبەرگەنوۆا بۇگىن 75 جاسقا قاراعان شاعىندا دۇنيەدەن ءوتتى.
ز. ەسبەرگەنوۆا 1940 - جىلى 27 - ساۋىردە ماڭعىستاۋ وبلىسى شەتپە اۋدانىنداعى «ءۇشتاعان» اۋلىندا دۇنيەگە كەلگەن. قازاقتىڭ قۇرمانعازى اتىنداعى ۇلتتىق كونسەرۆاتورياسىنىڭ تۇلەگى. رەسپۋبليكالىق ەسترادا-سيرك ستۋدياسىندا پروفەسسور ءناديا ءشارىپوۆانىڭ الدىنان ءدارىس العان.
ەڭبەك جولىن جامبىل وبلىستىق تەاترىنان باستاپ، كەيىن تورعاي، اتىراۋ وبلىستىق دراما تەاترىندا رەجيسسەرلىك ءارى اكتەرلىك ەڭبەگىمەن ءوزىن تانىتقان دارىن يەسى بالا كەزىنەن ارمان ەتكەن انشىلىك جولعا ءبىرجولاتا ءتۇسىپ، «قازاق كونسەرت» بىرلەستىگىنىڭ جانىنان قۇرىلعان ونەر توبىمەن قازاقستاننىڭ تۇكپىر-تۇكپىرىن ارالاپ، حالىق اندەرىمەن قوسا ماڭعىستاۋلىق كومپوزيتورلار - جەتى قايقىنىڭ اندەرىن تىڭداۋشىلارىنا تالماي ناسيحاتتاي ءبىلدى. سونداي-اق قازاقستان كومپوزيتورلارىنىڭ تاماشا اندەرىن تامىلجىتا ورىنداپ، كوپشىلىك كوڭىلىنەن شىقتى.
ونەرىن-ءومىرىم دەپ تۇسىنگەن زاۋرەش ەسبەرگەن قىزى «قازاقستان» تەلەارناسىندا رەجيسسەر جانە قازاق راديوسىندا مۋزىكا رەداكتورى رەتىندە دە ءوزىن كورسەتە ءبىلىپ، جان-جاقتىلىعىمەن ەرەكشەلەنگەن جان ەدى. ءتىپتى زەينەتكەرلىك جاسقا جەتكەننەن كەيىن دە ماڭعىستاۋ وڭىرىنە اتباسىن بۇرىپ، 2003 - جىلى اقتاۋ قالاسىندا جاڭا اشىلعان نۇرمۇقان جانتورين اتىنداعى دراما تەاترىنا رەجيسسەردىڭ كومەكشىسى بولىپ ورنالاسىپ، ونشاقتى جىل جەمىستى ەڭبەك ەتتى. بىرنەشە رەت ءوزىنىڭ جەكە شىعارماشىلىق كەشىن وتكىزدى، ساعىنىسىپ كورىسكەن جەرلەستەرىنە جەتى قايقىنىڭ اندەرىن ورىنداپ، كورەرمەن ىقىلاسىنا بولەندى.
قازاق راديوسىنىڭ «التىن قورىندا» ءانشى زاۋرەش ەسبەرگەنوۆانىڭ ءوز ورىنداۋىنداعى 30 عا جۋىق اندەرى مەن ارنايى حابارلارى ساقتالعان.
زاۋرەش ەسبەرگەن قىزى ءوزىنىڭ ءومىرى مەن ونەرى جايلى جازعان «ءومىرىمنىڭ جىبەك جولى» جيناعىنىڭ اۆتورى.
زاۋرەش ەسبەرگەن قىزى وتباسىندا ءۇش ۇل، ءبىر قىزدى دۇنيەگە اكەلگەن باقىتتى انا ەدى.
