استانادا تۋبەركۋلەز سىرقاتى تومەندەدى

وعان قوسا بىلتىرمەن سالىستىرعاندا اۋىرۋ %18,6 تومەندەگەن، دەپ حابارلادى astana.gov.kz.

 وتكەن جىلدىڭ قىركۇيەگىندە وتكەن قر قاۋىپسىزدىك كەڭەسى جانىنداعى ساراپتامالىق كەڭەس وتىرىسىندا قازاقستاننىڭ سانيتارلىق ەپيدەميالىق جانە ۆەتەرينارلىق قىزمەتتەرىنىڭ دامۋىن مەملەكەتتىك قولداۋ جونىندە شارالار كەشەنىن قابىلداۋ تاپسىرماسى قويىلعان بولاتىن.

بۇل شارالار جاڭا ينفەكتسيالىق اۋرۋلاردىڭ تاراۋىنا جول بەرمەۋگە باعىتتالۋى ءتيىس: ەبولا بەزگەگى، قىزىلشا ەپيدەمياسى، تۋبەركۋلەز، وبا جانە ت. ب. مۇنداي اۋرۋلار حالىق دەنساۋلىعىنا قاتەر تۋعىزىپ، قازاقستان ەكونوميكاسىنىڭ تۇراقتىلىعىن بۇزادى.

تۋبەركۋلەز ماسەلەلەرىن زەرتتەيتىن ۇلتتىق ورتالىق جۇرگىزگەن تۋبەركۋلەزگە قارسى قىزمەتتەر جۇمىسىنىڭ ينديكاتورلارىن رەيتينگتىك باعالاۋ ناتيجەلەرى بويىنشا، استانا قالاسى ۇزدىكتەر قاتارىندا، 2014 - جىلدىڭ 9 ايىنىڭ قورىتىندىسى بويىنشا قازاقستان رەسپۋبليكاسىنىڭ بارلىق ايماقتارى اراسىندا 2 - ورىندا.

حالىق تۇرمىسىنىڭ سانيتارلىق ەپيدەميالىق شارتتارىن جاقسارتۋدان بولەك، تۋبەركۋلەزبەن كۇرەسۋدىڭ ەڭ ءتيىمدى ادىستەرىنىڭ ءبىرى - ۆاكتسينا قويۋ بولىپ تابىلادى. اسىرەسە، بالالارعا ەرەكشە كوڭىل ءبولۋ كەرەك. تۋبەركۋلەزگە قارسى ەكپە بالا ورگانيزمىنىڭ تۋبەركۋلەز تاياقشالارىنا قارسى تۇرۋىن كۇشەيتىپ، بالانى تۋبەركۋلەزدى مەنينگيت پەن وكپەنىڭ شاشىراندى تۋبەركۋلەزىنەن قورعايدى.

بالا تۋىلا سالا اۋرۋعا قارسى يممۋنيتەت تۋدىراتىن ب ت س ج ەكپەسى قويىلادى. ب ت س ج ەكپەسى بۇل تۋبەركۋلەز اۋرۋىن تۋدىرمايتىن، ءبىراق وسى اۋرۋ تۇرىنە قارسى يممۋنيتەت تۋدىراتىن السىرەتىلگەن ۆاكتسينالىق شتامم. كوپ ادامدار مانتۋ رەاكتسياسىن ەكپە دەپ قاتەلەسەدى، الايدا، بۇل ەكپە ەمەس، يممۋنيتەتتىڭ تۋبەركۋلەزگە قارسى قىسىمىن تەكسەرىپ، اۋرۋدى ەرتە انىقتاۋعا ارنالعان تەرىنىڭ اللەرگيالىق سىناماسى .

استانادا بتسج ۆاكتسيناسى جاڭا تۋىلعان سابيلەردىڭ %96 ىنا قويىلادى. ۆاكسينادان باس تارتقان %4 ۆاكتسينا قويۋدىڭ ماڭىزىن تۇسىنبەي، بالالارىن اۋرۋ قاتەرىنە ۇشىراتادى. وسى باعىتتا حالىقتىڭ يممۋنوپروفيلاكتيكانىڭ ماڭىزى جونىندەگى حاباردارلىعىن ارتتىرۋ ماقساتىندا كولەمدى جۇمىس جۇرگىزىلۋدە. سونداي- اق، قازىرگى كەزەڭدە استانادا مەكتەپ وقۋشىلارىنا ەكپە قويىلۋدا.

تۋبەركۋلەزدى ەمدەۋ ەلىمىزدە تەگىن جۇزەگە اسىرىلادى: تۋبەركۋلەزگە قارسى ءدارى-دارمەكپەن قامتاماسىز ەتۋ مەملەكەت بيۋدجەتى ەسەبىنەن جۇرگىزىلەدى. اۋرۋعا بايلانىستى جۇمىسقا قابىلەتتىلىگىن ۋاقىتشا جوعالتقان ازاماتتاردىڭ جۇمىس ورنى زاڭنامامەن بەكىتىلگەن ۋاقىتقا دەيىن ساقتالادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى