مۇقاعالي ماقاتايەۆ اتىنداعى «پوەزيا، مەنىمەن ەگىز بە ەدىڭ؟!» جاس اقىندار بايقاۋى جاريالاندى
شارا اقيىق اقىن مۇقاعالي ماقاتايەۆتىڭ مۇراسىن ناسيحاتتاۋ، ۇلى اقىننىڭ شىعارمالارى ارقىلى وسكەلەڭ ۇرپاقتى وتانسۇيگىشتىككە تاربيەلەۋ، جاس تالانتتاردى، اقىنداردى تانۋ، ولەڭ قۇدىرەتى ارقىلى مەملەكەتتىك ءتىلدىڭ مارتەبەسىن كوتەرۋ ماقساتىندا ۇيىمداستىرىلىپ وتىر.
بايقاۋ ەكى كەزەڭنەن تۇرادى. بايقاۋدىڭ ىرىكتەۋ كەزەڭى ۇستىمىزدەگى جىلدىڭ 17 - اقپانىندا وتەدى. رەسپۋبليكالىق بايقاۋ شىلدە ايىندا وتكىزىلەدى، ونىڭ ناقتى ۋاقىتى، وتەتىن جەرى قوسىمشا حابارلانادى. بايقاۋعا 20-30 جاس ارالىعىنداعى جاستار قاتىسا الادى.
بايقاۋ ءۇش تاپسىرما بويىنشا وتكىزىلەدى. «پوەزيا، مەنىمەن ەگىز بە ەدىڭ؟!» تاپسىرماسىندا قاتىسۋشىنىڭ م. ماقاتايەۆقا ارناعان ولەڭى وقىلۋى ءتيىس. بۇل اقىننىڭ پوەزيادا الاتىن ورنىن، سۋرەتكەرلىك بەينەسىن، قالامگەرلىك شەبەرلىگىن تانىتا الارلىق شىعارما بولۋى شارت.
«ال ەكىنشى باقىتىم - ءتىلىم مەنىڭ» كەزەڭىندە قاتىسۋشىنىڭ ءتىل تاقىرىبىنا ارنالعان ولەڭى وقىلادى. شىعارمادا انا ءتىلىمىزدىڭ باعا جەتپەس بايلىعى، سونىمەن بىرگە بابالاردان قالعان اسىل قازىنامىز جانە مەملەكەتتىڭ باستى ءتىلى ەكەندىگى كورىنىس تابۋى ءتيىس.
«بولاشاعىم، سەن تۇرساڭ مەن ولمەسپىن!» تاپسىرماسىندا «كۇندەلىك جاز، جارقىنىم!» تاقىرىبىندا اقىننىڭ كۇندەلىگىنەن سىر شەرتۋ، وي تولعاۋ نەمەسە «ەسىڭە مەنى العايسىڭ» تاقىرىبىندا اقىننىڭ ولەڭىنە جازىلعان ءاندى ورىنداۋى قاجەت.
بايقاۋعا قاتىسۋشى ۇمىتكەر ولەڭدەرىن (قاعاز تۇرىندە جانە ەلەكتروندى نۇسقاسىمەن) 2015 -جىلدىڭ 13 - اقپانىنا دەيىن استانا قالاسىنىڭ تىلدەردى دامىتۋ باسقارماسىنا تاپسىرۋى ءتيىس. وقىلاتىن شىعارمالار كولەمى 2-3 مينۋتتان اسپاۋى كەرەك.
قاتىسۋشىلاردىڭ ولەڭدەرىن قازىلار القاسى ساراپتايدى، تالاپقا ساي ەمەس ولەڭدەر بايقاۋعا جىبەرىلمەيدى. بايقاۋ جەڭىمپازدارى باعالى سىيلىقتارمەن، ديپلومدارمەن ماراپاتتالادى. I ورىن يەگەرىنە رەسپۋبليكالىق بايقاۋعا جولداما بەرىلەدى، دەپ حابارلايدى adebiportal.kz.
