شىمكەنتتە قالا كوشەلەرىنە گازبەن جۇرەتىن اۆتوبۋستار شىعارىلماق

ستانسا قۇرىلىسى ءۇشىن 5 ميلليون ا ق ش دوللارى جۇمسالدى.

جوبانى قالا اكىمدىگى مەن ينۆەستورلار بىرلەسىپ قولعا الىپ وتىر، دەپ حابارلايدى و ق و اكىمدىگىنىڭ باسپا ءسوز قىزمەتىنەن.

- ەكولوگيالىق تۇرعىدان تازا قالا اتانۋ ءۇشىن ءبىز الداعى ۋاقىتتا جولاۋشىلار تاسىمالدايتىن جاڭا قوعامدىق كولىكتەر الۋدى جوسپارلاپ وتىرمىز. ياعني، گازبەن جۇرەتىن 200 اۆتوبۋس باعىتقا قويىلاتىن بولادى، - دەيدى قالا اكىمى دارحان ساتىبالدى.

اۆتوبۋستارعا قازىرگى زامان تالابىنا ساي GPS- ناۆيگاتورلار ورناتىلادى. جانە وندا مادەنيەتتى قىزمەت كورسەتىلىپ، بارلىق سانيتارلىق تالاپتار ورىندالاتىن بولادى.

قالا اكىمدىگىنىڭ الداعى ۋاقىتتىڭ ەنشىسىندەگى مەجەسى بويىنشا، مۋنيتسيپالدى اۆتوبۋس پاركىنىڭ قۇرىلىسى قولعا الىنباق. ياعني، اۆتوپارك جارتىلاي مەملەكەتتىك، جارتىلاي جەكە مەنشىك يەلىگىندە بولماق.

- قازىرگى تاڭدا، مۋنيتسيپالدى اۆتوبۋس پاركىنىڭ ورنالاساتىن ورنى بەلگىلەنگەن، - دەيدى قالا باسشىسى. - ەندىگى جەردە مەملەكەت مەنشىگىندە 100، جەكە مەنشىك يەلىگىندە تاعى ءبىر 100 جاڭا اۆتوبۋس الىنۋى ءتيىس.

قازىرگى تاڭدا قالا كوشەلەرىندە 1625 اۆتوبۋس 86 باعىت بويىنشا قوعامدىق قىزمەت كورسەتۋدە. جىل سوڭىنا دەيىن بۇل كورسەتكىش اناعۇرلىم وسە تۇسپەك. سەبەبى، قالا اۋماعىنا قوسىلعان 40 ەلدى مەكەنگە تۇراقتى تۇردە جاڭا باعىتتا اۆتوبۋستار جۇرەتىن بولادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى