ستامبۇلدا مۇستافا وزتۇرىكتىڭ جالعىز شاكىرتى تۇرادى

قانداسىمىز جاقىندا تاەكۆاندو مەكتەبىن اشىپ، وندا قازاق بالالارىن سپورتقا باۋلىماقشى. «بۇل مەنىڭ مۇستافا وزتۇرىك الدىنداعى پارىزىم»، - دەيدى ول.  

مۇستافا وزتۇرىك 1980- جىلدىڭ باسىندا تۇركياداعى تاەكۆاندو جوعارعى مەكتەبىنىڭ نەگىزىن قالايدى. سول ۋاقىتتا سپورتتىڭ بۇل تۇرىنە تالاي قازاق بالاسى بەت بۇرادى. سولاردىڭ ءبىرى - ىستامبۇلدا تۇراتىن قانداسىمىز ءىلياس كەرىم. تاڭداعان جولىنىڭ ىستىعى مەن سۋىعىنا ءتوزىپ، باستاعان ءىسىن اياقسىز قالدىرمادى.

بۇگىندە ول ۇستازىنان العان ءتالىم-تاربيەسىن جاس بۋىنعا ۇيرەتۋ ءۇشىن، تاەكۆاندو مەكتەبىن اشپاقشى. «وسى جەردە قازاق بالالارى بار. 10-15 جاسىنداعى ءبىر بالانىڭ قالتاسىنا اقشا تۇسسە، سول اقشانى الىپ ينتەرنەتكە بارادى، شاي ىشەتىن جەرگە بارادى. سولاردىڭ ءبارىن جيناعىم كەلىپ وتىر. وسى مۇستافا حودجادان قالعان تاەكۆاندونى وسىندا دامىتقان ءبىر قازاق بولسا مەنمىن. مەنىڭ ارتىمنان ەرىپ كەلە جاتقان بالالاردى ۇيرەتۋىم كەرەك دەيدى مۇستافا وزتۇرىكتىڭ شاكىرتى ءىلياس كەرىم.

ءىلياس - تۇركيادا تاەكۆاندونىڭ تەحنيكاسىن جەتىك مەڭگەرگەن بىردەن ءبىر ادام. 6- داندى ەنشىلەگەن تۇرىك ەلىنىڭ 12 دۇركىن چەمپيونى. الەمدىك دودالاردا دا قانداسىمىز تالاي قارسىلاسىن تىزە بۇكىتىرىپ، قازاقتىڭ اتىن شىعارعان. تاەكۆاندونىڭ قىر سىرىن ۇيرەنگەن ول، شاكىرت تاريبەلەۋدە وزىندىك ءادىسىن ويلاپ تاپقان. قانداسىمىز بولاشاقتا ۇستازى مۇستافا وزتۇرىك سياقتى تاريحي وتانىنا ورالىپ، شاكىرت تاربيەلەگىسى كەلەدى. ازىرگە بۇل جاي ارمان عانا. «دەمەۋشىلەر تابىلىپ، قولداۋ كورسەتسە بار بىلگەنىمدى ۇيرەتۋدەن تايىنباسپىن»، - دەيدى ول.

Baq.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى