تۇركيادا «قازاق مادەنيەتى اپتالىعى» باستالدى
شاراعا ەسكى شاھار پروۆينتسياسىنىڭ گۋبەرناتورى گيۋنگور ازيم تۋنا، «تۇركىسوي» حالىقارالىق ۇيىمىنىڭ باس حاتشىسى دۇيسەن قاسەيىنوۆ، قازاقستاننىڭ تۇركياداعى ەلشىسى جانسەيىت تۇيمەبايەۆ، اكادەميالىق توپتار، قوعامدىق-ساياسي جانە گۋمانيتارلىق توپتار وكىلدەرى، قازاقستاندىق ستۋدەنتتەر جانە تۇركياداعى قازاق دياسپوراسىنىڭ وكىلدەرى قاتىستى.
«تۇركياداعى قازاق مادەنيەتى اپتالىعى» اۋقىمىندا ەسكى شاھاردىڭ، انكارانىڭ، بولۋدىڭ جانە ىستامبۇلدىڭ ءىرى كونسەرت زالدارىندا تاتتىمبەت اتىنداعى اكادەميالىق قازاق حالىق اسپاپتارى وركەسترىنىڭ، ك. بايجانوۆ اتىنداعى قاراعاندى كونسەرت بىرلەستىگىنىڭ، ك س ر و حالىق ءارتىسى، ك س ر و جانە ك. بايسەيىتوۆا اتىنداعى قازاق ك س ر مەملەكەتتىك سىيلىقتارىنىڭ لاۋرەاتى، لەنين جانە ەڭبەك قىزىل تۋ وردەندەرىنىڭ يەگەرى، اتاقتى كولوراتۋرالىق سوپرانو يەگەرى بيبىگۇل تولەگەنوۆانىڭ كونسەرتتەرى وتەدى»، - دەلىنگەن حابارلامادا.
قازاقستاندىق شىعارماشىل توپ تۇركيا بويىنشا تۋرنەنى 2013-جىلعى تۇركى الەمىنىڭ مادەني استاناسى ەسكى شاھار قالاسىنان باستادى. كورنەكتى قازاق ءانشىسى ب. تولەگەنوۆا تاتتىمبەت اتىنداعى اكادەميالىق وركەسترگە قوسىلىپ، ءوزىنىڭ رەپەرۋارىنداعى شىعارمالارىن ورىنداپ، تۇرىك كورەرمەندەرىنە زور اسەر قالدىردى.
ەسكى شاھار پروۆينتسياسىنىڭ گۋبەرناتورى تۇركيادا «قازاق مادەنيەتىنىڭ اپتالىعى» وتكىزىلۋى مادەنيەت جانە ونەر سالاسىنداعى قازاقستان-تۇرىك ىنتىماقتاستىعىن ودان ءارى تەرەڭدەتە تۇسۋگە ۇلەس قوسادى، دەپ اتاپ ءوتتى. «قازاقستان ادامزاتتىڭ مادەني-گۋمانيتارلىق مۇراسىنا زور ۇلەس قوسىپ وتىرعانىنا مەنىڭ تاعى دا كوزىم جەتتى»، - دەدى گ. تۋنا.
ق ر ەلشىسى قازاقستاندىق شىعارماشىل توپتى جىلى شىرايمەن قابىلداعانى ءۇشىن ەسكى شاھار پروۆينتسياسىنىڭ گۋبەرناتورىنا العىس ايتتى.
تۇرىك كورەرمەندەرى قازاقستاندىق ونەر شەبەرلەرىنىڭ ورىنداۋ شەبەرلىگىن جوعارى باعالادى.
