جانار دۇعالوۆا: جۇرەك ۇنىمە عانا قۇلاق اسامىن

ونەر جولى قىز ءۇشىن وڭاي ەمەسى انىق. دەگەنمەن، جانار ءانشى بولۋدى بالا كەزدەن ارماندادى. بۇل ءۇشىن تەك دارىندى بولۋ جەتكىلىكسىز، سونىمەن قاتار، كوپ ەڭبەكتەنۋ قاجەت ەكەندىگىن جاقسى ءتۇسىندى. ال قازىر جانار دۇعالوۆا قازاق ەستراداسىنىڭ ناعىز جارىق جۇلدىزىنا اينالدى

-  10 جاستا روزا قۋانىش قىزىمەن ءان سالدىڭىز. بالالىق ارمانىڭىز قالاي ىسكە استى؟

- روزا رىمبايەۆانىڭ ونەرىن جوعارى باعالايمىن. بۇل ءسات مەنىڭ بالالىق شاعىمنىڭ ەڭ ەرەكشە كەزەڭى دەر ەدىم. بالا كەزدە ول كىسىمەن بىرگە ءان ايتۋ كەز كەلگەن كىشكەنتاي قىز ءۇشىن ۇلكەن ماقتانىش ءارى جەتىستىك دەپ ويلايمىن. ول كىسىمەن بىرگە ساحناعا شىعۋ شابىتىما قانات ءبىتىردى. وسى ءساتتى ەرەكشە ىستىق ساعىنىشپەن ەسىمە الامىن.

- ەسترادا ءانشىسى بولۋدى ارماندايتىن ارۋلارعا نە جەتىسپەيدى دەپ ويلايسىز؟ قانداي كەڭەستەر بەرە الاسىز؟

 - وكىنىشكە وراي، قازىر اقشامەن دە ءانشى بولىپ جۇرگەندەر بار. بۇل بىزدە عانا ەمەس، الەمدىك تاجىريبەدە كەزدەسەتىن ماسەلە. «ونەرگە اركىمنىڭ بار تالاسى» دەمەكشى، ءار ءانشىنىڭ ءوز تىڭدارمانى بار. حالىق ءوز باعاسىن بەرەدى. مەنىڭ ويىمشا، ەڭ ءبىرىنشى «تانىمال بولامىن» دەپ ەمەس، ونەرىمدى تانىتامىن دەگەن ماقسات قويۋ كەرەك. كەيبىرى دارىنىمەن، ەندى ءبىرى تەك تارتىمدىلىعىمەن ايگىلى بولادى. ەڭ باستىسى، ساحناعا دەگەن ماحاببات بولۋى كەرەك دەپ ويلايمىن. ال قىزدارعا ايتارىم، ەگەر بويىندا دارىنى بولسا، اللا جولىن اشادى. جەتىستىكتەرگە تەك ادال ەڭبەكپەن جەتۋگە بولاتىندىعىنا سەنىم كەرەك. مەن ءۇشىن تانىمال بولۋ ماقسات ەمەس. ءارى ول ونەرىڭنىڭ جالعىز كورسەتكىشى ەمەس دەپ ويلايمىن.

 - ال ءوزىڭىز سىنعا قالاي قارايسىز، قالاي قابىلدايسىز؟

- سىنعا قارسى ەمەسپىن، دۇرىس قابىلدايمىن. ءوزىم قۇرمەت تۇتاتىن كىسىلەردىڭ سىنى مەن ءۇشىن پايدالى دەپ ويلايمىن. «سىن تۇزەلمەي، ءمىن تۇزەلمەيدى» دەمەكشى، سول سىندى كىمنىڭ ايتقانىنا اسا ءمان بەرەمىن. ەشبىر دەرەكسىز بوس سىنعا ءمان بەرمەۋگە تىرىسامىن.

- ال قارا پيارعا كوزقاراسىڭىز قانداي؟

- قارا پيار ارقىلى تانىمالدىلىعىن ارتتىرۋ باتىستا قالىپتاسقان ءۇردىس. حالقى دا بۇعان ۇيرەنگەن. قارا پيار ءبىزدىڭ دىلىمىزگە ساي ەمەس. ءوز باسىم قارا پيارعا قىزىقپايمىن ءارى قولدانبايمىن دەپ سەنىمدى تۇردە ايتا الامىن.

- وتباسىڭىز تۋرالى بىلسەك؟

- اكەمنىڭ ەسىمى اسىلبەك. ەنەرگەتيكا سالاسىندا قىزمەت اتقارعان ادام. ال انامنىڭ اتى رايا. قازىر پاۆلودار قالاسىندا حور ديريجەرى رەتىندە جاس انشىلەرگە ۇستاز بولىپ ءجۇر. انام ءوزى جەتپەگەن بەلەستەردى مەنىڭ باعىندىرعانىمدى قالايدى. وسى ءۇمىتىن اقتاۋعا تىرىسىپ ءجۇرمىن. ارتىمنان ەرگەن ايجان ەسىمدى ءسىڭلىم بار.

-  ماماندىعىڭىز بويىنشا كاسىبي اكتريساسىز. ءان ايتۋدى تاستاپ، اكتريسا بولىپ كەتۋىڭىز مۇمكىن بە؟

- بولاشاعىم اللاعا ايان. سوڭعى كەزدە «مۇمكىن ەمەس» دەگەن ءسوزدى قولدانباۋعا تىرىسامىن. سەبەبى، ومىردە ءبارى دە مۇمكىن ەكەن. ونەردىڭ ەكى سالاسىن دا قاتار الىپ جۇرۋگە تىرىسامىن. اكتەرلىك شەبەرلىك انشىگە دە كەرەك قاسيەت قوي. تىڭدارمان قاۋىمعا جۇرەك تۇكپىرىڭدەگى ءاندى ادەمى جەتكىزۋ ءۇشىن دە اكتەرلىك دارىن كەرەك دەپ ويلايمىن. سوندىقتان، ءانشى بولا تۇرىپ اكتريسا بولۋىم دا مۇمكىن نارسە. ءبىر سالانى عانا تاڭداپ، ەكىنشىسىنەن باس تارتۋىم مۇمكىن ەمەس. اكتريسا رەتىندە حالىق مەنى «عاشىق جۇرەك-2» ، «ماحابباتىم جۇرەگىمدە» فيلمىنەن بايقادى. بولاشاقتا ءالى دە قىزىقتى رولدەردى سومداۋعا نيەتىم بار. ءوزىمنىڭ تابيعاتىما دراما، كومەديا جاقىن. ونەر ادامى بولعان سوڭ جان- جاقتىلىق قاجەت.

- ءالي وقاپوۆتىڭ «بيلە» دەگەن انىندە بەك- ۆوكالدا ءسىزدىڭ داۋسىڭىزدى تانىدىق. كوپشىلىك نازارىنا اليمەن بىرگە ءجيى ىلىنەسىز. ارالارىڭىزدا سەزىم بار دەگەن سىبىس قانشالىقتى راس؟

 - «بيلە» انىنە بەك- ۆوكالدا مەنىڭ قاتىسۋىم ويلاماعان جەردەن بولدى. ەڭ قىزىعى، «بيلە» دەگەن ءبىر اۋىز ءسوزدىڭ وزىنەن كوبى مەنىڭ داۋىسىمدى تانىپ قويىپتى (كۇلدى) . ال ءالي مەنىڭ باۋىرىمداي بولىپ كەتكەن جىگىت. ارامىزدا تەك دوستىق قارىم- قاتىناس قانا بار. ءبىر- ءبىرىمىزدىڭ ونەرىمىزدى باعالاپ، قولداۋ كورەستىپ وتىرامىز.

- ءسىزدىڭ جۇرەگىڭىزدى قانداي جىگىت جاۋلاپ الۋى مۇمكىن؟

- اللاعا سەنەتىن، رۋحاني باي، اقىلدى، سابىرلى جىگىتتەر ۇنايدى. ال كوركى ءوزىم ءۇشىن تارتىمدى بولسا جەتكىلىكتى. وزگەلەردىڭ پىكىرى مەن ءۇشىن ماڭىزدى ەمەس. سوندىقتان، جۇرەك ۇنىمە عانا قۇلاق اسامىن.

- ءبىر كورگەننەن عاشىق بولۋعا سەنەسىز بە؟

- ءيا، سەنەمىن. سەبەبى، ومىردە وسىلاي عاشىق بولىپ، وتاۋ قۇرعان جاندار جەتەرلىك. سوندىقتان، بۇل دا مۇمكىن سەزىم دەر ەدىم. عاشىق بولۋ كەرەمەت نارسە.

- ال «ماحاببات جاسقا قارامايدى» دەگەن پىكىرگە كوزقاراسىڭىز قانداي؟

- ارينە، بۇل پىكىرمەن كەلىسەمىن. ءبىراق 18 جاستاعى قىز 88 جاستاعى اتاعا عاشىق دەگەن سەزىمگە سەنبەيمىن (كۇلدى) . جاس ايىرماشىلىعى اسا كوپ بولماسا، باياندى ماحاببات سەزىمىنىڭ پايدا بولۋى مۇمكىن.

- ءۇي شارۋاسىنا قالايسىز؟ تاماقتى ءدامدى ازىرلەيسىز بە؟

- ونەر ادامى بولعاندىقتان ۋاقىتىم تاپشى. تاماق ازىرلەۋدى ەندى ۇيرەنىپ ءجۇرمىن. بولاشاقتا ون ساۋساعىنان بال تامعان كەرەمەت اسپازشى بولاتىنىما سەنىمىم مول.

- قازىر جۇرەگىڭىز بوس پا؟

- ونەر ادامى عاشىق بولماي تۇرا المايدى دەپ ويلايمىن. سەزىمسىز شابىت بولمايدى. سەبەبى، ءىشىڭ بوس بولىپ تۇرسا، كەرەمەت ءان جازۋ مۇمكىن ەمەس. ءتىپتى، ءاندى دە ادەمى جەتكىزە المايسىڭ. «ماحابباتسىز دۇنيە بوس» دەمەكشى، ءارقاشان عاشىقتىق سەزىمىن باستان كەشىرەمىن. ءارقاشان عاشىقپىن دەۋگە بولادى. ۇناتىپ جۇرگەن ادامىم بار. ال قازىر مەن ءۇشىن ونەرىم ماڭىزدى.

- ەگەر جىگىتىڭىز سىزگە «وتباسى نەمەسە ونەر» دەگەن تالاپ قويسا قايسىسىن تاڭدار ەدىڭىز؟

- مەن ونداي ادامدى سۇيە الماس ەدىم. ونەرىمدى تۇسىنەتىن، باعالايتىن جىگىتكە قانا تۇرمىسقا شىعامىن. ويتكەنى، مەن ءۇشىن وتباسىلىق ءومىر دە، ونەرىم دە ماڭىزدى. تۇسىنىگى مول ادام بۇنداي تالاپ قويمايدى دەپ بىلەمىن.

- قانشا بالانىڭ اناسى بولۋدى ارماندايسىز؟

- مەن وتە بالاجان اداممىن. مەن ءۇشىن انا بولۋ ۇلكەن باقىت. كەم دەگەندە ءۇش بالانىڭ اناسى بولۋدى ارماندايمىن. ەگەر مۇمكىندىگىم بولىپ جاتسا، جەتىم بالالالاردى دا اسىراپ الۋعا قارسى ەمەسپىن. قايىرىمدىلىق شارالارىنا ءجيى قاتىسىپ تۇرۋعا تىرىسامىن. اتا- اناسىز، قاراۋسىز قالعان سابيلەرگە جۇرەگىم قاتتى اۋىرادى. بارلىق ءسابي باقىتتى بولۋعا لايىق!

- باسقا قانداي ونەرىڭىز بار؟

 - ءان ايتۋ، ءان شىعارۋ مەنىڭ سۇيىكتى ءىسىم. ىشتەگى سەزىمىم، جۇرەك تەبىرەنىسىم وسى اننەن كورىنىس تابادى. شابىتتى كەزىمدە ورىس تىلىندە ولەڭ جازعاندى ۇناتامىن. ەگەر ءانشى بولماعانىمدا جازۋشى بولار ەدىم. بيلەۋ ارقىلى دا جانىم جادىراپ قالادى.

- ورىس تىلىندە ولەڭ جازامىن دەدىڭىز. جالپى، ءوزىڭىز قاي تىلدە ويلاناسىز ءارى ءجيى سويلەيسىز؟

- ءوزىم پاۆلودار قالاسىندا ءوستىم. ورىس ءتىلدى ورتادا بولسام دا، قازاق تىلىندە ءبىلىم الدىم. ەكى تىلدە دە ويلانىپ، ويىمدى ەركىن جەتكىزە الاتىن دەڭگەيدەمىن. «وزگە ءتىلدىڭ ءبارىن ءبىل، ءوز ءتىلىڭدى قۇرمەتتە» دەمەكشى، انا تىلىمە دەگەن قۇرمەتىم ەرەكشە ءارى باسقا ءتىلدى دە مەڭگەرۋ ارتىقتىق ەتپەيدى دەپ ويلايمىن.

- «جۇلدىز» اۋرۋىمەن اۋىرمايسىز با؟

 - جوق، اۋىرمايمىن. ءوزىن «جۇلدىزبىن» دەپ سىرقاتتانۋ اقىماقتىڭ ءىسى دەر ەدىم. ول تانىمال بولۋى مۇمكىن. ناعىز جۇلدىزدار تەك اسپاندا ەمەس پە؟ ! ەگەر ول مايكل دجەكسون سياقتى الەمدىك دەڭگەيدى باعىندىرسا، تۇسىنەر ەدىم. ءبىراق ءاردايىم ونەرىڭدى كىمگە ارناپ وتىرعانىڭدى ۇمىتپاعانىڭ دۇرىس. ول قاراپايىم حالىق. سوندىقتان، «ۇلىق بولساڭ، كىشىك بول» دەگەندى ەستەن شىعارماي، ءوزىڭدى قاراپايىم ۇستاعان دۇرىس دەپ ويلايمىن.

- ساحناداعى جانار مەن ومىردەگى جاناردىڭ ايىرماشىلىعى بار ما؟

- ايتارلىقتاي ايىرماشىلىعى جوق. ءبىراق مۇڭلى ءاندى كوڭىلدى ايتپايسىڭ عوي. سول سەكىلدى ساحناداعى بەينەم سول ءاننىڭ مازمۇنىنا دا بايلانىستى دەر ەدىم. ال جاساندى بولۋعا جانىم قاس. ءبارىبىر ادامنىڭ تابيعي بولمىسى ءبىلىنىپ تۇرادى. سوندىقتان، ءوزىمدى شىنايى، تابيعي ۇستاۋدى ءجون كورەمىن.

- جانكۇيەرلەرىڭىز مازاڭىزدى ءجيى الا ما؟

- اسا مازامدى الاتىن ادامدار جوق. كەرىسىنشە، ۇنەمى ماعان قامقور بولىپ، تىلەگىن جازىپ، گۇل سىيلايتىن تۇراقتى جانكۇيەرىم بار. «جولدا ابايلاپ ءجۇرىڭىز» دەپ كولىگىمە قاعاز تاستاپ كەتكەن كەزدەرى بولعان. وسى جۋرنال ارقىلى وعان سالەم جولداعىم كەلەدى. وسىنداي جىلى لەبىزدەرىن ءبىلدىرىپ، ونەرىمدى باعالايتىن جانكۇيەرلەرىم العا جىلجۋعا شابىت سىيلايدى

- سۇلۋلىعىڭىزدىڭ قۇپياسى بار ما؟

- ارنايى قۇپيام جوق. ۋاقىتىم بولعاندا كوسمەتولوگقا بارىپ تۇرامىن. دۇرىس تاماقتانىپ، سالاماتتى ءومىر سالتىن ۇستانۋعا تىرىسامىن. ادامنىڭ كورىكتى بولۋى تىكەلەي كوڭىل- كۇيىنە بايلانىستى. ىشكى دۇنيەڭ جايدارى، ماحابباتقا، سۇيىسپەنشىلىككە تولى بولسا، سىرتقى بەينەڭ دە سۇلۋ بولادى. سونىمەن بىرگە تازا سۋدى ءجيى ىشكەن ابزال جانە ۇيقىڭ سەرگەك بولۋى كەرەك.

- بوس ۋاقىتتى قالاي وتكىزەسىز؟

- كىتاپ وقىعان ۇنايدى. سوندىقتان، قىزىقتى كىتاپ وقۋدان باس تارتپايمىن. ءماندى كوركەم فيلمدەردى كورەمىن، جاقىن دوستارىممەن سەرۋەندەپ، اڭگىمەلەسۋگە تىرىسامىن.

- قىزدار اراسىندا ادال دوستىق بولادى دەگەنگە سەنەسىز بە؟ سىرالعى قۇربىلارىڭىز بار ما؟

- ارينە سەنەمىن! ەڭ ءبىرىنشى دوستىققا ادال بولۋ ادامنىڭ نيەتىنە بايلانىستى دەر ەدىم. ەگەر دوسىڭا دەگەن كوڭىلىڭ اق، قۋانىشى مەن قايعىسىنا ورتاق بولا بىلسەڭ، ىشىڭدەگى سىرىڭمەن ەركىن بولىسە الساڭ، مىنە، بۇل ناعىز دوستىق. مەنىڭ دە جاقىن ارالاساتىن ءۇش قۇربىم بار. وسىنداي دوستارىمدى ماقتان تۇتامىن. ولار ءۇشىن ءاردايىم كومەككە دايىنمىن، ولار دا قاجەت كەزدە قاسىمنان ۇنەمى تابىلادى.

- اڭگىمەڭىزگە كوپ راحمەت! ونەر شىڭىن ءالى دە كوپتەگەن جەتىستىكتەرمەن باعىندىرا بەرۋىڭىزگە شىن جۇرەكتەن تىلەكتەسپىز!

comode.kz 

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى