جەتپىس جاستاعى تاجىك ستۋدەنتى گيننەسس كىتابىنا ەنۋدەن ءۇمىتتى

2014-جىلى ول نوسير حۋسراۆ اتىنداعى قورعانتوبە مەملەكەتتىك ۋنيۆەرسيتەتىنىڭ تاجىك فيلولوگياسى فاكۋلتەتىنە سىرتتاي وقۋعا ءتۇستى، دەپ حابارلايدى ازاتتىق.

بۇرىن حاتلون وبلىسىنداعى پەداگوگيكالىق، اۋىلشارۋاشىلىق جانە تەحنولوگيالىق كوللەجدەردى بىتىرگەن قاريا تۋعان اۋىلىندا باستاۋىش مەكتەپكە ساباق بەرىپ كەلگەن. زەينەتكەر ەجەلگى ارمانى - ۋنيۆەرسيتەتتە ءبىلىم الۋ ءۇشىن وقۋعا تۇسكەنىن ايتادى. بىرنەشە جىل بۇرىن زايىبى قايتىس بولعان. ەكى ۇلى - رەسەيدە ەڭبەك ميگرانتى، ال ەكى قىزى - ءۇيلى-باراندى، سوندىقتان گۋلومحايدار يسكانداروۆ ءومىردىڭ جاڭا بەلەسىنە بەت بۇرادى. ول فيلولوگيا فاكۋلتەتىن بىتىرگەن سوڭ زاڭ فاكۋلتەتىنىڭ سىرتتاي بولىمىنە ءتۇسۋدى جوسپارلاپ وتىر.

گۋلومحايدار يسكانداروۆ وقۋعا قينالمايتىنىن ايتادى. «سوندىقتان جىلىنا ەكى رەت 40 كۇننەن وقۋ ماعان قيىن ەمەس»، - دەيدى ول.

گۋلومحايدار جاس كەزىندەگى ارمانىن جۇزەگە اسىرىپ، ەگدە تارتقان شاعىندا ۋنيۆەرسيتەتكە تۇسۋگە رەسەيلىك 74 جاستاعى ستۋدەنت ۇلگى بولعانىن ايتادى. ول تۋرالى تەلەديداردان ەستىگەن قاريا «گيننەستىڭ رەكوردتار كىتابىنا مەن تۋرالى جازسا قۋاناتىن ەدىم»، دەيدى.

قورعانتوبە مەملەكەتتىك ۋنيۆەرسيتەتى اكىمشىلىگى «جاڭا ءھام قارت» ستۋدەنتتىڭ وقۋعا تۇسكەنىنە تاڭعالدى. ادەتتە ءداستۇرلى تاجىك قوعامىندا 60 تان اسقان ادامدار وزدەرىن قارتتار ساناتىنا جاتقىزىپ، جۇمىستان الشاقتاپ، دىنگە بەت بۇرادى جانە نەمەرەلەرىن تاربيەلەيدى.

دەگەنمەن ولار گۋلومحايدار يسكانداروۆتىڭ بۇل ارەكەتىن «ەلگە ۇلگى» دەپ باعالاپ، «جاس ستۋدەنتەرگە دە ونەگە» دەپ سانايدى. قورعانتوبەدەگى نوسير حۋسراۆ اتىنداعى ۋنيۆەرسيتەت پرورەكتورى ابدۋلحاي كوميلي يسكانداروۆقا دەيىن ج و و- دا 50 جاستاعى ستۋدەنتتىڭ «ەڭ كارى شاكىرت» سانالىپ كەلگەنىن ايتتى. «ەگەر 70 تەگى ادام ءبىلىم الۋعا ۇمتىلسا، ونى تەك قولداۋ كەرەك»، - دەيدى ول.

ال گۋلومحايدار يسكانداروۆ ءدارىس تىڭداپ، تاجىريبەلىك ساباقتارعا قاتىسىپ، قىسقى سەسسياداعى العاشقى ەمتيحانىن تاپسىرۋعا دايىندالىپ ءجۇر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى