پرەزيدەنت سايلاۋىنا قاتىساتىن يسلام كارىموۆتىڭ قارسىلاستارى انىقتالدى
وزبەكستاننىڭ «ادولات» سوتسيال-دەموكراتيالىق پارتياسىنىڭ ساياسي كەڭەسىنىڭ پلەنۋمى 16- قاڭتاردا وتىرىستا پرەزيدەنت سايلاۋىنا پارتيا ساياسي كەڭەسىنىڭ ءتوراعاسى ناريمون ۋماروۆتىڭ كانديداتۋراسىن قولدادى. مەملەكەت باسشىسىنىڭ لاۋازىمىنا ۇمىتكەر 10 اقپانعا بەلگىلەنگەن كۋرۋلتايدا ۇسىنىلادى، دەپ حابارلادى پارتيا باسپا ءسوز قىزمەتىنەن.
وزبەكستاننىڭ «ميللي تيكلانيش» دەموكراتيالىق پارتياسى ورتالىق كەڭەسىنىڭ بۇگىن وتكەن پلەنۋمىندا پرەزيدەنتتىككە ۇمىتكەر رەتىندە زاڭنامالىق پالاتاداعى پارتيا فراكتسياسىنىڭ مۇشەسى اكمال سايدوۆتىڭ كانديداتۋراسىن ۇسىنۋدى ماقۇلدادى. «ميللي تيكلانيش» اقپاراتتىق قىزمەتىنىڭ دەرەكتەرىنە سۇيەنسەك، سايدوۆ كانديداتۋراسى 7- اقپاندا پارتيا سەزىندە ۇسىنىلادى.
كۇندىز وزبەكستاننىڭ باسقا ەكى پارتياسى ۇسىناتىن كانديداتتاردىڭ ەسىمى بەلگىلى بولدى. كاسىپكەرلەر مەن ىسكەر ادامدار قوزعالىسى، ليبەرالدىق-دەموكراتيالىق پارتيا پرەزيدەنتتىككە قازىرگى مەملەكەت باسشىسى يسلام كارىموۆتىڭ كانديداتۋراسىن ۇسىنۋعا نيەتتى. حالىقتىق-دەموكراتيالىق پارتيا پرەزيدەنتتىككە پارتيا ورتالىق كەڭەسىنىڭ ءتوراعاسى حاتامجون كەتمونوۆتىڭ كانديداتۋراسىن ۇسىنباق.
وزبەكستان پرەزيدەنتىن سايلاۋ 29- ناۋرىزدا وتەدى. پرەزيدەنتتىككە ۇمىتكەر ۇسىنۋعا تەك ساياسي پارتيانىڭ عانا قۇقىعى بار، كانديدات پارتيا مۇشەسى نەمەسە پارتيادا جوق بولۋى مۇمكىن.
