ءتورت جىل قاتارىنان ۇزدىك اتانعان «ارلاندار» بيىل توپ جارا الاما؟
جەرلەستەرىمىزدىڭ العاشقى قارسىلاستارى ۆەنەسۋەلانىڭ «Caciques Venezuela» كلۋبى. الماتى قالاسىنداعى بالۋان شولاق اتىنداعى ستاديوندا وتەتىن ايقاستا بوكسشىلار 5 سالماق دارەجەسىندە سىنعا تۇسەدى.
بۇكىلالەمدىك بوكس سەرياسىنىڭ بيىلعى بەسىنشى ماۋسىمىنا ءتورت قۇرلىقتان 16 مەملەكەت ءوز باقتارىن سىناۋعا ءوتىنىش بىلدىرگەن. ەندى ءسال شەگىنىس جاساپ، بۇل WSB قانداي جوبا؟ قانداي ەرەكشەلىكتەرى بار؟ وسىعان دەيىن قانشا كوماندا ونەر كورسەتتى؟ وسى جايىندا قىسقاشا توقتالىپ وتسەك.
بۇكىل الەمدىك بوكس سەرياسى (WSB) - AIBA باسشىلارىنىڭ اشقان جاڭا جوباسى. حالىقارالىق اۋەسقوي بوكس قاۋىمداستىعىنىڭ پرەزيدەنتى دوكتور چينگ-كۋو ۆۋدىڭ باستاماسىمەن 2008-جىلدىڭ تامىز ايىندا ۇسىنىلىپ، 2010-جىلدىڭ كۇز ايلارىندا جۇزەگە استى. وسى جىلى جوباعا العاش رەت 12 كوماندا قاتىسىپ، ولار قۇرلىق بويىنشا ءۇش توپقا (ازيا، امەريكا، ەۋروپا) ءبولىندى.
جارىستىڭ ەرەجەسى بويىنشا جوبانىڭ العاشقى ءۇش ماۋسىمىندا بوكسشىلار بەس سالماق (54, 61, 73, 85, 91+) دارەجەسى بويىنشا كۇش سىناستى. ءار جەكپە-جەك ءۇش مينۋتتان بەس راۋندقا سوزىلدى. بوكسشىلار رينگكە شلەمسىز جانە جەيدەسىز شىقتى. تورەشىلەر بوكسشىلاردىڭ ونەرىن 10 باللدىق جۇيەمەن ەسەپتەدى. ال ءتورتىنشى ماۋسىمدا WSB باسشىلارى جوباعا ءبىرقاتار وزگەرىستەر ەنگىزدى. ناقتىراق ايتساق، العاشقى ءۇش ماۋسىمدا سپورتشىلار بەس سالماق دارەجەسى بويىنشا ونەر كورسەتسە، ءتورتىنشى ماۋسىمدا ون سالماق دارەجەسىندە (49, 52, 56, 60, 64, 69, 75, 81, 91, +91) ونەر كورسەتتى.
بۇل جوبانىڭ باستى ەرەكشەلىگى - ءار سالماقتا جەكەلەي سىنداردا جەڭىلمەي، تولىق ۇپاي جيناعان بوكسشىلار وليمپيادا ويىندارىنىڭ جولداماسىنا يە بولا الادى. وسى جوبا اياسىندا ءبىرىنشى جانە ەكىنشى ماۋسىمدا ۇزدىك شىققان بەس بوكسشى 2012-جىلعى لوندون وليمپياداسىنا قاتىسقان بولاتىن. ونىڭ ءبىرى - 54 كەلىدە ونەر كورسەتكەن جەرلەسىمىز قانات ءابۋتالىپوۆ. بۇل ءداستۇر بيىلدا ءوز جالعاسىن تاپپاق. ناقتىراق ايتساق، 2016-جىلى ريو-دە-جانەيرودا وتەتىن وليمپيادا ويىندارىنا دا جولداما ۇلەستىرىلەدى.
العاشقى ماۋسىمدا بوكس باسشىلارى WSB جوباسى اياسىندا ونەر كورسەتكەن ون ەكى كوماندانى قۇرلىق بويىنشا ءۇش توپقا، ياعني امەريكا، ازيا جانە ەۋروپا قۇرلىعىنا ءبولدى. وندا ءار كوماندا ەكىنشى كوماندامەن ءوز جەرىندە ەكى رەت، سىرت ەلدە ەكى رەت كەزدەستى. وسىلايشا ءار كوماندا ءوز توبىندا ون ەكى جەكپە-جەك وتكىزىپ، قۇرلىقتىڭ ۇزدىگىن انىقتادى. ءوز قۇرلىقتارىنان ءبىرىنشى ورىن العان كوماندالار جارتىلاي فينالعا جولداما الدى. جارتىلاي فينالعا قاتىساتىن ءتورتىنشى كوماندا ءار توپتان ەكىنشى ورىن العان كوماندالاردىڭ اراسىنان ىرىكتەلىپ الىندى. بۇل ماۋسىمدا جەرلەستەرىمىز جەڭىس تويىن تويلاۋعا ءبىر تابان قالعاندا ءسۇرىندى. ناقتىراق ايتساق، فينالعا دەيىن سۇرىنبەي جەتىپ، شەشۋشى سىندا فرانسۋزدىڭ «پاريج يۋنايتەد» كومانداسىنا 6:4 ەسەبىمەن ۇتىلىپ، كۇمىس جۇلدەنى قاناعات تۇتتى.
ال ەكىنشى ماۋسىمدا كورەيا كلۋبى، جانە ا ق ش-تىڭ مەمفيس، مايامي كلۋبتارى جابىلىپ، ورنىنا گەرمانيا، تايلاند پەن ءۇندىستان كوماندالارى قوسىلدى. ال ماسكەۋلىك فرانشيز ماسكەۋلىك دينامو سپورت قوعامىنا اۋىسىپ، اتى دا سايكەسىنشە دينامو ماسكەۋ بولىپ وزگەرتىلدى. بۇل جىلى بارلىق ون ەكى كوماندا التى-التىدان «ا» جانە «ب» بولىپ ەكى توپقا ءبولىنىپ ونەر كورسەتتى. بۇل جىلى جەرلەستەرىمىز «ا» توبىندا باق سىنادى. وكىنىشكە قاراي ەكىنشى ماۋسىمدا جارتىلاي فينالدان ءسۇرىنىپ، ۇزدىك ۇشتىككە تابان تىرەدىك. جارتىلاي فينالدا جەرلەستەرىمىزدىڭ جولىن رەسەيدىڭ «دينامو ماسكەۋ» كلۋبى بوگەگەن ەدى.
ال ءۇشىنشى ماۋسىم «استانا ارلاندارى» ءۇشىن اسا تابىستى بولدى. اقىرى ۋىستان ەكى جىل قاتارىنان سۋسىپ كەتكەن جەڭىسكە قول جەتكىزدى. وسىلايشا، قازاق ەلىنىڭ ابىرويىن اسىرىپ، مەرەيىن ءوسىرىپ، بايراعىن جەلبىرەتتى. ءۇشىنشى ماۋسىمنىڭ فينالىندا «ۋكراينا اتاماندارىن» استانا تورىندەگى رەسپۋبليكالىق «سارىارقا» سپورت سارايىندا ايقىن باسىمدىقپەن ۇتتى. ۋكراينالىق كلۋبتىڭ قۇرامىندا راسىندا دا بوكستىڭ اتاماندارى بولدى. ايتالىق، بوكستان ەكى دۇركىن وليمپيادا چەمپيونى ءارى ۇزدىك بوكسشىعا بەرىلەتىن ۆەل باركەر كۋبوگىنىڭ يەگەرى اتانعان ۆاسيلي لوماچەنكو، لوندون وليمپياداسىنىڭ چەمپيونى الەكساندر ۋسيك، لوندون وليمپياداسىنىڭ كۇمىس جۇلدەگەرى دەنيس بەرينچيك جەرلەستەرىمىزبەن قولعاپ ءتۇيىستىردى. وسىنداي ءبىر ءوزى بىرنەشە بوكسشىعا تاتيتىن سۇيەكتى سايىپقىراندارىن ۋكرايندار ءۇشىنشى ماۋسىمدا فينالدىق سىندا «ارلاندارعا» قارسى سالدى.
مىقتىنى جىعۋ قايدان وڭاي بولسىن، ەكى كۇن بويى جەڭىس ءۇشىن ارپالىسقان جەكپە-جەكتىڭ ءاربىرى دە جۇرتتىڭ دەلەبەسىن قوزدىردى. ءبىراق، ەشكىمنىڭ اتاق-داڭقىنان سەسكەنبەيتىن جەرلەستەرىمىز جەرگىلىكتى جانكۇيەرلەرىنە جەڭىس سىيلادى. ءتورتىنشى ماۋسىمدا دا «ارلاندارىمىز» جەڭىس تۇعىرىنىڭ بيىك ساتىسىنان كورىنبەسە دە ۇزدىك ۇشتىكتىڭ قاتارىنان كورىندى.
قاراپ وتىرساڭىز «استانا ارلاندارى» وسى ءتورت ماۋسىمنىڭ تورتەۋىندە دە جۇلدەسىز قالماعان. بۇل كورسەتكىشكە ەشقانداي كوماندا قول جەتكىزە العان جوق. وسى ورايدا بىردەن ايتا كەتەيىك، جالپى بيىلعى جىلدى قوسا ەسەپتەگەندە، ياعني بەس ماۋسىمدا WSB جوباسى اياسىندا بارلىعى 24 كوماندا باق سىناپتى. ءتىپتى، العاشىندا ا ق ش ەكى كوماندا شىعارعان. ءبىراق ءبىرىنشى ماۋسىمنان سوڭ ەكى كومانداسىن بىرەۋ ەتىپ قايتا جاساقتادى.
ال ءبىرىنشى ماۋسىمدا چەمپيون اتانعان فرانسيا كلۋبى بۇل جوباعا ەكى-اق ماۋسىم قاتىستى دا جوق بولىپ كەتتى. سونداي-اق، گەرمانيا كلۋبى ءۇش، تۇركيا كومانداسى ەكى ماۋسىم ونەر كورسەتتى. ال كورەيا، ءۇندىستان جانە تايلاند كلۋبتارى ءبىر-ءبىر ماۋسىم عانا قاتىستى. ال ءبىزدىڭ «ارلاندار» WSB جوباسىنا تۇراقتى تۇردە بەس جىل قاتارىنان قاتىسىپ كەلە جاتقان التى كوماندانىڭ ءبىرى.
ال، بيىل اتالعان جوبانىڭ بەسىنشى ماۋسىمىندا 16 كوماندا سەگىز-سەگىزدەن «ا»، «ب» ەكى توپقا ءبولىنىپ سىنعا تۇسەدى. ولاردىڭ ۇشەۋى WSB ايقاستارىنا بيىل عانا قوسىلعان - كوماندالار. اتاپ ايتقاندا، ماروككو، پۋەرتو-ريكو جانە ۆەنەسۋەلا بيىل عانا ءوز كوماندالارىن WSB جوباسىنا قوسقالى وتىر. ال ۇلى بريتانيا جانە قىتاي WSB شارشى الاڭىنا قايتا ورالدى.
«ا» توبى: «Algeria Desert Hawks», «British Lionhearts», «China Dragons», «Cuba Domadores», «Mexico Guerreros», «Morocco Atlas Lions», «Russian Boxing Team», «Ukraine Otamans».
«ب» توبى: «Argentina Condors», «Astana Arlans», «Azerbaijan Baku Fires», «Caciques Venezuela», «Italia Thunder Boxing Team», «Puerto Rico», «Rafako Hussars Poland», «USA Knockouts».
بۇل ماۋسىمننىڭ باستى ەرەكشەلىگى ءار كوماندادا لەگيونەرلەر سانى 3 تەن اسپاۋى كەرەك. جالپى 66 جەكپە-جەك ءوتۋى ءتيىس. ءار توپتا 1- ورىن العان كوماندالار اۆتوماتتى تۇردە جارتىلاي فينالعا جولداما الادى. سونداي-اق، ءار توپتاعى 2-3- ورىن العان كوماندالار شيرەك فينالعا جولداما الادى. ال جەكەلەي سىنداردا 49, 91, +91 كەلى سالماقتاردا - 1, 52, 56, 60, 64, 69, 75, 81 كەلى سالماقتاردا - 2 جولدامادان ريو 2016 وليمپياداسىنا جالپى 17 بوكسشىعا جولدامالارى ۇلەستىرىلەدى.
ەندى بۇگىنگى وتەتىن جارىسقا قايتا ورالايىق. بيىلعى بەسىنشى ماۋسىمداعى العاشقى جەكپە-جەكتە «استانا ارلاندارى» كلۋبىنىڭ نامىسىن تەك قازاقستاندىق بوكسشىلار قورعاماق. العاشقى قارسىلاستارىمىز ۆەنەسۋەلانىڭ «Caciques Venezuela» كلۋبى ەكەنىن ماقالامىزدىڭ باسىندا ايتىپ وتتىك.
ولاي بولسا، بۇگىن ەل نامىسىن كىمدەر قورعايدى؟ قارسىلاستارىمىز كىمدەر؟ بۇگىن 49, 56, 64, 75, جانە 91 كەلى سالماقتاعى بوكسشىلار سىنعا تۇسەدى.
«Astana Arlans» - «Caciques Venezuela» اراسىنداعى جەكپە- جەككە قاتىساتىن بوكسشىلاردىڭ ءتىزىمى:
49 كەلى: ماردان بەرىكبايەۆ - يوەل ريۆاس فينول
56 كەلى: مەيىربولات تويىتوۆ - حوسە ۆيسەنتە دياس
64 كەلى: سامات باشەنوۆ - لۋيس مارتين اركون
75 كەلى: مەيىرىم نۇرسۇلتانوۆ - حۋان كارلوس رودريگەس
91 كەلى: ۆاسيلي ليەۆيت - الفونسو حوسە فلورەس
ءسوز سوڭىندا ايتا كەتەيىك، بيىل «استانا ارلاندارىنىڭ» قۇرامىندا دا، باسشىلىعىندا دا وزگەرىستەر بولدى. كلۋبقا جاڭا باپكەر مەن جاڭا بوكسشىلار كەلدى. «ارلانداردىڭ» قاتارىنا قوسىلعان جاڭا بوكسشىلاردىڭ كوپشىلىگى ەل بىرىنشىلىگىنىڭ جەڭىمپازدارى نەمەسە جۇلدەگەرلەرى. ول بوكسشىلار جاڭا جوبانىڭ جۇيەسىنە ءالى توسەلە قويماعانى انىق. ال كومانداعا باس باپكەر بولىپ مارات جاقيەۆ كەلدى. سونداي-اق، كلۋبتىڭ بۇرىنعى باسشىسى بولات مانكەنوۆ كەتىپ، ونىڭ ورىنىنا بەلگىلى بوكسشى، لوندون وليمپياداسىنىڭ چەمپيونى سەرىك ساپيەۆ كەلدى.
ەندى جاڭا باسشى، جاڭا قۇرام ەل سەنىمىن اقتايدى دەگەن ۇمىتتەمىز.. .
بۇكىل الەمدىك بوكس سەرياسىنىڭ 5-ماۋسىمداعى كۇنتىزبەسى: (WSB - 2015)
2015-01-17 «Astana Arlans» vs «Caciques Venezuela» : C1 (49,56,64,75,91)
2015-01-23 «Hussars Poland» vs «Astana Arlans» : C2 (52,60,69,81,+91)
2015-01-31 «Azerbaijan Baku Fires» vs «Astana Arlans»: C1 (49,56,64,75,91)
2015-02-07 «Astana Arlans» vs «USA Knockouts»: C2 (52,60,69,81,+91)
2015-02-14 «Astana Arlans» vs «Puerto Rico»: C1 (49,56,64,75,91)
2015-02-21 «Astana Arlans» vs «Argentina Condors»: C2 (52,60,69,81,+91)
2015-02-28 «Astana Arlans» vs «Italia Thunder»: C1 (49,56,64,75,91)
2015-03-07 «Caciques Venezuela» vs «Astana Arlans»: C2 (52,60,69,81,+91)
2015-03-14 «Astana Arlans» vs «Hussars Poland»: C1 (49,56,64,75,91)
2015-03-21 «Astana Arlans» vs «Azerbaijan Baku Fires»: C2 (52,60,69,81,+91)
2015-03-28 «USA Knockouts» vs «Astana Arlans»: C1 (49,56,64,75,91)
2015-04-11 «Puerto Rico» vs «Astana Arlans»: C2 (52,60,69,81,+91)
2015-04-18 «Argentina Condors» vs «Astana Arlans»: C1 (49,56,64,75,91)
2015-04-25 «Italia Thunder» vs «Astana Arlans»: C2 (52,60,69,81,+91))
2015-05-06 شيرەكفينال
2015-05-07 شيرەكفينال
2015-05-21 جارتىلاي فينال
2015-05-22 جارتىلاي فينال
2015-06-11 فينال
2015-06-12 فينال.
كۇنسۇلتان وتارباي
